ئەڤرۆ دێ بنگەهێ ڤاکسینا نەخوشخانا ئازادی بیت و رۆژا شەمبیا بهێت بنگەهەک ل ئاکرێ دەست بکار بیت

مەسعود حەسەن صالح، سەرپەرشتێ ئای تی iT یێ ڤاکسینا کۆرۆنایێ ل پارێزگەها دهوکێ دیار کر: پشتی هاتنا ڤێ پێلا نوو یا دژوار یا کۆرۆنایێ، داخوازی لسەر وەرگرتنا ڤاکسینا کۆرۆنایێ زێدە بوویە، گوت ژی، تنێ د چەند رۆژێن بوری دا حەفت هزار کەسان ناڤێ خوە ل بنگەهێ ڤاکسینی ل نەخۆشخانا ئازادی تومار کریە.
ناڤاتی ئاشکرا ژی کر: رێڤەبەریا گشتی ساخلەمیا پارێزگەها دهوکێ هەمی هەولان ددەت کو بنگەهێن ڤاکسینێ زێدە بکەت، دا کو زێدەترین رێژەیا ڤاکسینی بۆ هاولاتیان بهێتە دانان.
گوت ژی: ئەڤرۆ رێکەفتی 29 ێ 7ـێ 2021 ێ ل بنگەهێ نەخۆشخانا ئازادی ڤاکسینا دژی کۆرۆنایێ ل دەمژمێر 3:00ـێ ئێڤاری هەتا 7:00 ـێ ئێڤاری ڤاکسینێ کۆرنایێ بۆ هاولاتیان هێتەدانن.
ئاشکرا ژی کر: د پلان ساخلەمیا دهوکێ دایە ل هەموو قەزایێن سەر پارێزگەها دهوکێ بنگەهێن ڤاکسینی بۆ دەمێ ئێڤاریان بهێتە ڤەکرن و بریارە رۆژا شەمبیا داهاتی بنگەهەک ڤاکسینی بۆ دەمێ ئێڤاری ل قەزا ئاکرێ بهێتە ڤەکرن.
ل سەرانسەری پارێزگەها پارێزگەها دهوکێ ب هەموو قەزاو ناحیەیان ڤە 38 بنگەهێن دانانا ڤاکسینێ دژی کۆرۆنایێ هەنە.ل دوف ئامارا رێڤەبەریا کاروبارێن خوپاراستنێ 8% خەلکێ پارێزگەها دهوکێ ڤاکسینا دژی کۆرۆنایێ وەرگرتیە.