ساخله‌میا دهۆكێ هژماره‌كا بڕیاران ل دور ده‌واما دەزگەهێن ساخلەمیێ و پاراستنا ساخله‌میا وه‌لاتیان ددەت

ساخله‌میا دهۆكێ هژماره‌كا بڕیاران ل دور ده‌واما دەزگەهێن ساخلەمیێ و پاراستنا ساخله‌میا وه‌لاتیان ددەت
د. نزار عسمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دچه‌ند كۆمبوونان دا دگه‌ل رێڤه‌به‌رێن هه‌موو نه‌خۆشخانێن گشتى و ئه‌هلى و سه‌ندیكا نۆشداران و نۆشدارێن ددانا و كارمه‌ندێن ساخله‌میێ كۆمبوو د وان كۆمبوونان دا چه‌ند بڕیار هاتنه‌ دان ژبۆ كاودانێن نها ئه‌و بڕیار ژى پێکهاتیبوون کو لیژنا بلند به‌رهنگاریا ڤایرۆسێ كۆرۆنایێ دێ به‌رده‌وام دكاری دا بن، ده‌وام ل نه‌خۆشخانه‌ و سەنتەرێن تایبەتمەن دێ ب شێوه‌یێ نۆبه‌داریێ بیت و شێره‌تكاریێن نۆبەدار ل نه‌خۆشخانێن گشتى و بنگەهێن نۆبەدار دێ بۆ ده‌مێ سپێدێ هێنە ڤەکرن، هه‌روه‌سا بنگه‌هێن ساخله‌میێ دناڤ ناحیان دا دێ نۆبەداری هەبن. هەروەسا بڕیار هاتە دان نشه‌گه‌رى بهێنه‌ راگرتن و ب تنێ بو حاله‌تێن ته‌نگاڤ دێ هێنه‌ کرن. ده‌ربارەى نه‌خۆشخانێن ئه‌هلی ژى دێ پێگیریێ ب هەموو رێنمایێن حكومه‌تا هه‌رێما كوردستانێ كه‌ن و نابیت بهایێن كه‌رتێ تایبه‌ت بهێنه‌ بلندكرن و پێدڤیە هاریکاربن دگەل وەڵاتیان و بو ڤێ چەندێ دووڤچوون رۆژانە دێ ل سه‌ر هه‌بیت. دیسان ل نەخۆشخانێن تایبەت کەسەک دێ ل گەل نه‌خۆشی بیت. دەربارەی کلینیکێن تایبەت ژی پێدڤیه‌ ژڤان بۆ نه‌خۆشان بهێنه‌ دانان و نابیت ل كلینیكێ ببیته‌ قه‌ره‌بالغ. هەروەسا نه‌خۆشخانێن ئه‌هلى پێدڤیە پێگیریێ ب پاراستنا نه‌خۆشان وستافێ نه‌خۆشخانێ بكه‌ن و هه‌موو نه‌خۆشخانە بهێنه‌ ره‌شاندن و تافلیكرن.