• كانونی یه‌كه‌م 7, 2022

د.فەرهاد ئیسماعیل، رێڤەبەرێ خۆپاراستنا ساخلەمیێ ل دهۆکێ: ئه‌و پێلا كۆرۆنایێ یا دهۆك ڤه‌گرتى گه‌له‌ك زوو به‌لاڤبوو و پلانه‌ك باش هاتبوو دانان بۆ به‌رهه‌نگاربوونا وێ

د. فه‌رهاد ئیسماعیل، رێڤه‌به‌رێ كارۆبارێن خۆپاراستنا ساخله‌میا دهۆكێ دیاركر:” نوكه‌ پێلا سیێ یا كۆرۆنایێ ل دهۆكێ یا كێم دبیت، و رێژا پشكنینێن پوزه‌تیڤ گه‌له‌ك كێمتربوویه‌ به‌رامبه‌ر دو حه‌فتێن بۆرى، به‌لێ ئه‌ڤه‌ نابیته‌ نیشانا هندێ ئه‌م ژ نه‌خۆشیێ ب دووماهى هاتین، ئه‌و پێلا كۆرۆنایێ یا دهۆك ڤه‌گرتى گه‌له‌ك زوو به‌لاڤبوو و پلانه‌ك باش هاتبوو دانان بۆ به‌رهه‌نگاریا وێ و نه‌خۆشخانه‌ هاتبوونه‌ به‌رهه‌ڤكرن و ژمارا ته‌ختێن چاڤدێریا چر ژى هاتبوونه‌ زێده‌كرن.
د. فه‌رهاد ئیسماعیل، گۆتژى: رێژا ڤاكسیندانێ ل ده‌ڤ كه‌سێن سه‌ر 18 سالیێ دا ل دهۆكێ گه‌هشتیە 15% و نوكه‌ گه‌له‌ك وه‌لاتى ڤاكسینێ وه‌ردگرن، ئه‌ڤه‌ ژى بوو ئه‌گه‌ر رێژا تووشبوویان به‌ر ب كێمبوونێ بچیت و نوكه‌ رێژا ڤاكسیندانانێ گه‌له‌ك یا باشه‌ و بۆ پێلێن بهێت ژى دێ ڤاكسیندان هێته‌ به‌رفره‌هكرن و ئه‌ڤه‌ دێ بیته‌ ئه‌گه‌ر كێمتر خه‌لك تووشى كۆرۆنایێ دبن و به‌رده‌وام پلان دهێنه‌ دانان بنگه‌هێن ڤاكسیندانێ بهێنه‌ زێده‌كرن و حه‌زا وه‌لاتیان بۆ وه‌رگرتنا ڤاكسینێ كۆرۆنایێ گه‌له‌ك زێده‌بوویه‌ “.
رێڤه‌به‌رێ كارۆبارێن خۆپاراستنا ساخله‌میا دهۆكێ ئاشكه‌را كر كو:” پلان هاتیه‌ دانان مه‌زنترین هژمارا وه‌لاتیان ڤاكسینێ دژى كۆرۆنایێ وه‌ربگرن به‌رى پێله‌كا دى یا كۆرۆنایێ ب سه‌ر پارێزگه‌ها دهۆكێ دا بهێت نوكه‌ پتر ڤاكسین بۆ كه‌سێن دانعه‌مر هێته‌ دانان ئه‌وژى ب رێیا خوه‌تۆماركرنێ، هه‌روه‌سا پلان هاتیه‌ دانان هه‌موو ماموستا بهێنه‌ ڤاكسیندان به‌رى ده‌ستپێكا سالا خواندنێ”.
ته‌كه‌ز كركو:” ئه‌گه‌ر ڤاكسین بۆ دهۆكێ وه‌سا باش بهێت هه‌تا دووماهیا ئه‌ڤ ساله‌ دێ رێژا ڤاكسیندانێ گه‌هیته‌ 50% و دبیت هێشتا ژى زێده‌ببیت، نوكه‌ كار یێ دهێته‌ كرن پشتى هه‌موو ماموستا ڤاكسینێ وه‌ردگرن، د دووڤدا ده‌زگه‌هێن ئه‌منى وه‌كو پولیس وئاسایش وقوتابیێن زانكۆیێ ڤاكسینێ وه‌ربگرن و د پلانێ دایه‌ سه‌نته‌ره‌كێ ڤاكسیندانێ د ناڤ زانكۆیا دهۆكێ دا بهێته‌ ڤه‌كرن بۆ ڤاكسیندانا قوتابیان و دێ مه‌زنترین ریژا قوتابیان هێنه‌ ڤاكسیندان.
ده‌رباره‌ى كه‌مپێن ئاواره‌ و په‌نابه‌ران، د. فه‌رهاد ئیسماعیل گۆت: هنده‌ك كه‌مپان سه‌نته‌ر هاتینه‌ دانان بۆ ڤاكسیندانا ئاواره‌ وپه‌نابه‌ران لێ هه‌تا نوكه‌ حكومه‌تا عیراقێ به‌هرا ئاواره‌ و په‌نابه‌ران یا ڤاكسیندانێ نه‌هنارتیه‌، به‌لێ مه‌ بنگه‌هه‌كێ ڤاكسیندانێ ل كه‌مپا دومیز یا په‌نابه‌رێن رۆژئاڤایێ كوردستانێ دانایه‌ و هه‌ر ئاواره‌ و په‌نابه‌ره‌كێ بڤێت ڤاكسینێ وه‌ربگریت دشێت خوه‌ ل لینكێ ساخله‌میێ تۆماربكه‌ت و هه‌ر جهه‌كێ وى بڤێت ل دهۆكێ دشێت ڤاكسینێ وه‌ربگریت و پلان ئه‌وه‌ هژماره‌كا زۆر یا ئاواره‌ وپه‌نابه‌ران ڤاكسینێ دژى كورۆنایێ وه‌ربگرن.
رێڤه‌به‌رێ كارۆبارێن خۆ پاراستنا ساخله‌میا دهۆكێ ته‌كه‌ز كركو:” نوكه‌ رۆژانه‌ هه‌تا پێنج هزار ڤاكسین دهێنه‌ دانان بۆ وه‌لاتیان، ئه‌ڤه‌ژى هژماره‌كا زۆره‌ و پلان هاتیه‌ دانان ل قوناغا بهێت هه‌وا ڤاكسیندانێ بهێته‌ به‌رفره‌هكرن داكو كونترول ل سه‌ر رێژا تووشبوویێن كۆرۆنایێ بهێته‌كرن ل دووڤ رێژا ئاكنجیان به‌غدا ڤاكسینێ بۆ دهۆك و هه‌موو پارێزگه‌هیێن عیراقى و هه‌رێما كوردستانێ ره‌وانه‌دكه‌ت.

Read Previous

د.داوود سلێمان ئەتروشی، سەرۆکێ زانکۆیا دهۆک: هەکە مە بڤێت کەمپێ زانکۆیێ چالاک ببیت، پێدڤیە ماموستا و قوتابی ڤاکسینێ وەربگرن

Read Next

مەسرور بارزانی: ئێک ملیۆن ڤاکسینێ كۆرۆنایێ مە دابین كری یە و دۆرا هاولاتیانە ئەرکێ خوە بجهبینن

Leave a Reply

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *