شانده‌كێ‌ نوژداری ل وه‌لاتێ‌ ئیتالیا گه‌هشته‌ پارێزگه‌ها دهوكێ‌

ب پشته‌ڤانیا سه‌روكێ‌ جڤاتا وه‌زیرێن حكومه‌تا هه‌رێما كوردستانێ‌ و ب هه‌ڤكاریا رێڤه‌به‌ریا گشتی یا ساخله‌میا پارێزگه‌ها دهوكێ‌ و رێكخراوا هیڤی/نازدار یا زارۆكان,ل رۆژا 21/2/2009 تیمه‌كێ‌ نوژدار و ئه‌ندازیارێن وه‌لاتێ‌ ئیتالیا ب سه‌روكاتیا (د.گاردی) به‌رپرسێ‌ رێكخراوا (Medchild) و خاتوون ( ئیلی پێنتو) به‌رپرسا رێكخراوا (SIA) یێن ئیتالی گه‌هشتنه‌ پارێزگه‌ها دهوكێ‌. ل ده‌مژمێر(9)ێ‌ سپێدێ‌ و ل سه‌نته‌رێ‌ دهوك یێ‌ دلی ل ئاڤاهیێ‌ نه‌خوشخانا ئازادی یا فێركرنێ‌ ل دهوكێ‌ ده‌ست ب چه‌ند كریارێن قه‌سته‌را دلی كر بو زارۆكێن نه‌خوشیێن زكماكی یێن دلی هه‌ین و بریار ئه‌وه‌ دماوێ‌ (6) رۆژان دا كریارێن قه‌سته‌را دلی بو دورێن (30) زارۆكان ئه‌نجام بده‌ن و دگه‌لدا ستافه‌كێ‌ پزیشكی ل دهوكێ‌ بهێته‌ مه‌شقدان بو ئه‌نجامدانا ڤان كریاران. ل ده‌مژمێر(10,30)ێ‌ سپێده‌هیا هه‌مان رۆژ و ب ئاماده‌بوونا (د.عه‌بدولا سه‌عید عه‌بدولا) رێڤه‌به‌رێ‌ گشتی یێ‌ ساخله‌میا پارێزگه‌ها دهوكێ‌ و به‌رپرسێن هه‌ردو رێكخراوێن ئیتالی و ژماره‌كا ئه‌ندازیارێن د وارێ‌ ساخله‌میێ‌ دا كاردكه‌ن,كومبونه‌ك ل رێڤه‌به‌ریا گشتی یا ساخله‌میا پارێزگه‌ها دهوكێ‌ گرێدان و د كومبوونێ‌ دا گه‌نگه‌شه‌ ل دور پرۆژێ‌ " باژێرێ‌ ساخله‌میێ‌" ل دهوكێ‌ و نه‌خشه‌یێن پێدڤی ژبو بجهئینانا پروژێ‌ ناڤبری و چاوانیا بجهئینانا پرۆژه‌ی هاته‌ كرن. ئه‌ڤه‌ ژ سالا 2006ێ‌ وه‌ره‌ تیمێن نوژدارێن ئیتالی سه‌ره‌دانا پارێزگه‌ها دهوكێ‌ دكه‌ن و دڤان سه‌ره‌دانان دا شیاینه‌ (415) نه‌خوشان ب رێكا برنا ئیتالیا و ل نه‌خوشخانێن هه‌رێمێ‌ چاره‌سه‌ربكه‌ن و بریار ئه‌وه‌ كو دئه‌ڤ ساله‌دا (3) جارێن دی بهێنه‌ پارێزگه‌ها دهوكێ‌. حه‌مزه‌ ره‌زیكی