رۆژا جیهانی یا نهخۆشێن گولچیسكان دێ هێته ساخكرن
هاتیه بلاڤکرن روژا سێ شهمبێ, 10 ئادار 2009 - 4:30pm
سالانه رۆژا پێنچشهمبیا دوێ ژ ههیڤا ئادارێ هاتیه دهستنیشانكرن بو رۆژا جیهانی یا نهخوشیێن گولچیسكان, رێڤهبهریا گشتی یا ساخلهمیا پارێزگهها دهوك ل رۆژا پێنچشهمبی رێكهفتی 12/3/2009 و ب چاڤدێریا (ماجد سهید صالح) قایمقامێ قهزا دهوكێ, ل سهنتهرێ تایبهتمهند ب شووشتنا گولچیسكان دێ رابیت ب ساخكرنا ڤێ رۆژێ و ب ڤی رهنگێ ل خوارێ دیاركری:
- ل دهمژمێر 10ێ سپێدێ سهرهدانا سهنتهرێ تایبهتمهند ب شووشتنا گولچیسكان دناڤ ئاڤاهیێ نهخوشخانا ئازادی یا فێركرنێ ل دهوكێ و بهلاڤكرنا چهند دیاریان ل سهر نهخوشێن گولچیسكان.
- ل دهمژمێر (10,30) سپێدێ سهرهدانا پروژێ نووژهنكرن و بهرفرههكرنا سهنتهرێ گولچیسكا دهستكرد ل تهنشت نهخوشخانا هیڤی یا زارۆكان.
چهند پێزانین ل دور رهوشا نهخوشێن گولچیسكان ل پارێزگهها دهوكێ
رێڤهبهریا گشتی یا ساخلهمیا پارێزگهها دهوكێ گرنگیهكا تایبهت ب نهخوشێن گولچیسكان دایه و دبیاڤێ چاندنا گولچیسكان دا و ل دووڤ گوتنێن رێڤهبهرێ نهخوشخانا یا ئازادی یا فێركرنێ ل دهوكێ ههتا نوكه (16) كریارێن چاندنا گولچیسكان ل نهخوشخانا ناڤبری هاتینه كرن و (2) ژوان نهخوشان ئاكنجیێن كوردستانا باشور بوینه و نوكه كار دهێته كرن كو ب رهنگهكێ بهردهوام ئهڤ كریاره بهێنه ئهنجام دان.
ژلایێ خوڤه بهرپرسێ سهنتهرێ تایبهتمهندێ شووشتنا گولچیسكان دیاركر كو نوكه (70) نهخوش ب شێوهیهكێ رێكخستی سهرادانا سهنتهرێ ناڤبری دكهن ب مهرهما گولچیسك شووشتنێ و داكو بهرئاتافی چ سهرباركێن ڤان جوره نهخوشیان نهبن و سهنتهرێ وان ب رهنگهكێ بهردهوام چاڤدێریا نهخوشێن گولچیسك بو هاتینه چاندن دكهت كو ژمارا وان ل پارێزگهها دهوكێ (104) نهخوشن.
نوكه كار یێ دهێته كرن بو نووژهنكرن و بهرفرههكرنا سهنتهرێ تایبهتمهند یێ گولچیسكا دهستكرد ل پارێزگهها دهوكێ و سهنتهرێ ناڤبری دێ ههموو خزمهتێن پێدڤی بو نهخوشێن گولچیسكان دابین كهت و پروژه ب كوژمێ(1,146,935,000)دینارێن عیراقی یێ دهێته نووژهنكرن و ژڤان ئهوه ل ههیڤا (10) یا ئهڤ ساله ب دووماهی بهێت.
حهمزه رهزیكی