رۆژا جیهانیا نهخۆشیا تالاسیمیا هاته ساخكرن
هاتیه بلاڤکرن روژا ئێک شهمبێ, 10 گولان 2009 - 9:31am
ب ههلكهفتا رۆژا جیهانیا نهخۆشیا تالاسیمیا رێڤهبهریا گشتی یا ساخلهمیا پارێزگهها دهوكێ ب ههڤكاری دگهل كومهلا تالاسیمیا دهوك ل رۆژا شهمبی رێكهفتی 9/5/2009 و ل دهمژمێر 9ێ سپێدێ رابوون ب دابهشكرنا چهند دیاریان ل سهر 16 كارمهندێن سهنتهرێ نهخوشیا تالاسیمیا و دگهل 50 زاروكێن نهخوش ب نهخوشیا تالاسیمیا.
ل دهستپێكا رێ و رهسمێن بهلاڤكرنا دیاریان,د.عهبدوللا سهعید عهبدوللا رێڤهبهرۆێ گشتیێ ساخلهمیا پارێزگهها دهوكێ د پهیڤهكێدا ئهڤ رۆژه ل نهخوشێن تالاسیمیا پیروزكر و دیاركر كو ب هاریكاریا حكومهتا ههرێما كوردستانێ چوویه نهخاسمه كو سهنتهرهكێ تایبهت بو ڤان نهخوشان هاتیه ڤهكرن و تێدا ههموو خزمهتێن پێدڤی بو نهخوشان دهێنه پێشكێشكرن و رێڤهبهرێ گشتی ئهوژی دیاركر كو بریارا حكومهتا ههرێمێ ب تهرخانكرنا مووچهیهكێ ههیڤانه بو نهخوشێن تالاسیمیا بویه ئهگهر كو رهوشا ڤان نهخوشان بهر ب باشتر بچیت.
ههروهها دیاركر ژی كو ب هاریكاریا چهند لایهنان ب تایبهت رێكخراوا هیڤی ئهو شیاینه چهند نهخوشان ب هنێرنه وهلاتێ ئیتالیا ژبوی چارهسهریێ.
رێڤهبهرێ گشتیێ ساخلهمیا پارێزگهها دهوكێ دیسا گوت:نوكه 608 نهخوشێن تالاسیمیا ل پارێزگهها دهوكێ ههنه كو ل دورێن 150 ژوان نهخوشان ل دهڤهرێن نوو رزگاركری یێن ههرێمێ ل سنورێ پارێزگهها دهوكێ مفای ژ خزمهتێن پێدڤی دبینن.
ل دهمژمێر 7ێ ئێڤاری و ب ئامادهبوونا ماجد سهید صالح قایمقامێ قهزا دهوك و د.عهبدوللا سهعید رێڤهبهرێ گشتیێ ساخلهمیا پارێزگهها دهوكێ ل هولا گهلی ل دهوكێ ئاههنگهكا خێزانی بو نهخوشێن تالاسیمیا هاته سازكرن و تێدا چهندین پهیڤ هاتنه خواندن و ب پشكداریا چهند هونهرمهندان ئاههنگ برێڤهچوو.
حهمزه رهزیكی