رۆژا جیهانیا په‌ره‌ستاران هاته ساخكرن
هاتیه بلاڤکرن روژا جارشه‌مبێ, 13 گولان 2009 - 9:31am
ب ئاماده‌بوونا (ماجد سه‌ید صالح) قایمقامێ قه‌زا دهوك و (فاروق ئاكره‌ی) نوونه‌رێ لقێ ئێكێ پارتی دیموكراتی كوردستان و چه‌ندین نوونه‌رێن دام و ده‌زگه‌هێن حزبی و حكومی ل پارێزگه‌ها دهوكێ,ب هه‌لكه‌فتا رۆژا جیهانیا په‌ره‌ستاران، رۆژا 12/5/2009 رێڤه‌به‌ریا گشتی یا ساخله‌میا پارێزگه‌ها دهوكێ ب هه‌ڤكاری دگه‌ل سه‌ندیكا كارمه‌ندێن پێشه‌یێن ساخله‌میێ و ل هولا رێڤه‌به‌ریا گشتی ئه‌ڤ بیره‌وه‌ریه هاته ساخكرن.
پشتی ده‌قیقه‌كا رێزگرتنێ راوه‌سیان بو گیانێ شه‌هیدان، رێڤه‌به‌رێ گشتیێ ساخله‌میا پارێزگه‌ها دهوكێ ( د.عه‌بدوللا سه‌عید عه‌بدوللا) د په‌یڤه‌كێدا پیروزباهی ل په‌ره‌ستارێن دهوكێ كر و رۆلێ وان دنڤ دام و ده‌زگایێن ساخله‌میێدا بلند هه‌لسه‌نگاند و دیاركر كو په‌ره‌ستار تویژا هه‌ره‌سه‌كینه دده‌زگه‌هێن ساخله‌میێ دا و خواست كو پتر كاركرن و پتر دلوڤانی ژ ئارمانجێن وان بن.
په‌یڤا سه‌ندیكا كارمه‌ندێن پێشه‌یێن ساخله‌میێ ژلایێ نزار سه‌عید به‌رپرسێ لقێ دهوك یێ سه‌ندیكا ناڤبری هاته خواندن و تێدا دیاركر كو ساخكرنا ڤێ بیره‌وه‌ریێ رێزگرتنه ل په‌رستارێن پارێزگه‌ها دهوكێ دهێته كرن و خه‌لاتكرنا په‌ره‌ستاران سالانه د ڤێ رۆژێ دا ب پێنگاڤه‌كا باش یا رێزگرتنێ ل خزمه‌تا وان هژمارت.
د دو سمینارێن ژێك جودا دا ماموستایان ( سه‌ردار ئه‌ترووشی و ره‌سول صه‌بری) به‌حسێ زانستێ په‌ره‌ستاریێ و په‌ره‌ستاریا خێزانێ كرن و چه‌ند پێشنیاز و بوچوون بو ئاماده‌بویان پێشكێشكرن ل دور چاوانیا پێشڤه‌برنا ره‌وشا په‌ره‌ستاران ل هه‌رێمێ ب شێوه‌یه‌كێ گشتی.
ل دووماهیا ئاهه‌نگێ پتر ژ (150) په‌ره‌ستاران ل سنورێ پارێزگه‌ها دهوكێ ژلایێ رێڤه‌به‌ریا گشتی یا ساخله‌میا پارێزگه‌ها دهوكێ و ب هه‌ڤكاری دگه‌ل سه‌ندیكا كارمه‌ندێن پێشه‌یێن ساخله‌میێ و لقێ ئێك یێ پارتی دیموكراتی كوردستان و لیژنا ناوچا ئاشتی یا پارتی دیموكراتی كوردستان و چه‌ند نوونه‌رێن دام و ده‌زگایێن ساخله‌میێ هاتنه خه‌لاتكرن.
بریا ژی ئه‌وه ل رۆژێن بهێت سه‌یرانه‌ك بهێته رێكخستن بو هه‌موو په‌رستاران و دناڤ سه‌یرانێ دا ئاهه‌نگه‌كا هه‌مه‌ره‌نگ بهێته گێران.
حه‌مزه ره‌زیكی
ئه‌ڤ مالپه‌ره فرێکه
