شاندهكێ كادر و نوژدارێن شورهشا گولانا پێشكهفتن خواز سهرهدانا چهند دهزگههێن ساخلهمیێ ل پارێزگهها دهوكێ كر
هاتیه بلاڤکرن روژا ئێک شهمبێ, 24 گولان 2009 - 2:11pm
ژبو نێزیك ڤهدیتنا رهوشا خزمهتێن ل دهزگههێن ساخلهمیێ دهێنه پێشكێشكرن، شاندهكێ نوژدارێن شورهشا گولانا پێشكهفتن خواز ل رۆژا 24/5/2009 سهرهدانا رێڤهبهریا گشتی یا ساخلهمیا پارێزگهها دهوكێ كر و ژ لایێ (د.عهبدوللا سهعید عهبدوللا) رێڤهبهرێ گشتیێ ساخلهمیا پارێزگهها دهوكێ و ژمارهكا كارمهندان پێشوازی لێ هاته كرن.
د روونشتنهكێدا (ئیبراهیم محهمهد صالح) بهرپرسێ لیژنا ناوچا پێشكهفتن یا پارتی دیموكراتی كوردستان، مهرهمێن سهرهدانێ وهكو پشكهك ژ پروگرامێ چالاكیێن لقا ئێك یا پارتی دیموكراتی كوردستان ب ههلكهفتا شورهشا گولانا پێشكهفتن خواز دا زانین و دیاركر كو شاندێ ناڤبری د رۆژانێن شورهشێ دا ماندیبوونهكا مهزن دیتیه و ب بهرههمێ وێ خهباتێ ئهڤرۆ كوردستان بویه خودان حكومهت و پهرلهمان و وهرارهكا ئێكجار مهزن ژلایێ بجهئینانا پروژهیان و ب تایبهت دوارێ ساخلهمیێ دا بخوڤه دیتیه.
د.عهبدوللا سهعید عهبدوللا، رێڤهبهرێ گشتیێ ساخلهمیا پارێزگهها دهوكێ سوپاسیا ئامادهبویان كر ل دور سهرهدانا وان بو دهزگههێن ساخلهمیێ و دیاركر ژی كو ئهڤ وهرارا نوكه ل دهزگههێن ساخلهمیێ پهیدابوی ئهنجامێ رهنج و خزمهتا وان كهسانه یێن ب شهڤ و رۆژ د خهباتێ دا ژبوونا كێمكرنا ئێش و ئازارێن پێشمهرگهی و گوت:ئهم خو ب وان سهربلند دزانین و گیانێ پیروزێ شههیدان ژی ئهڤرۆ ب ڤان دهستكهفتان شاده و هندی خزمهت بهێته كرن دبیاڤێ ساخلهمیێ دا بهرامبهر خێزان و كهس و كارێن شههید و پێشمهرگهیێن شورهشێن كوردی ههر كێمه و سهرفرازیا مه ب بهردهوامیا وان خهبات و شورهشان پهیدابویه.
شاندێ ناڤبری كو پێكهاتی بو ژ بهرێزان( محهمهد حهسهن و خالد هیرو و تهها محهمهد و عهدنان لهزگین و عهبدولكهریم تهها مایی) زێدهباری رێڤهبهریا گشتی یا ساخلهمیا پارێزگهها دهوكێ سهرهدانا نهخوشخانێن (ئازادی یا فێركرنێ و تهنگاڤیان و سوتنێ و نشتهرگهریا جوانكاریێ) و دگهل سهنتهرێن چێكرنا پهلێن دهستكرد و گههان و چارهسهریا سروشتی و سهنتهرێ دهوك یێ دلی و چاندنا گولچیسكان و دهروونی و بهنكا خوینێ ل دهوكێ كرن.
كاك محهمهد حهسهن، كو ل دهمێ شورهشا گولانا پێشكهفتن خواز سهرپهرشتیا پشكا تهندروستی ل لقێ ئێكێ پارتی دیموكراتی كوردستان دكر وههان دا خویاكرن كو دناڤ شورهشێ دا ژیان یا ب زهحمهت بو و نهخوش و بریندار د بهلاڤهبوون و چ جهێن تایبهت نهبوون وهكو كلینیك یان بنگهه پێشمهرگه قهست بكهنێ لهوا ژی چانتێن وان ههردهم ب مللێ وان ڤهبوون و ههر چی جهێ بریندار یان نهخوش ههبان نهچاربوون قهست بكهنێ و چارهسهربكهن.
كاك محهمهد حهسهنی ئهوژی دیاركر كو ژبلی پێشمهرگهیان ئهوان زاروك و نهخوشێن ههر گوندهكی چارهسهردكرن ب رێكا تیمێن نوژداری ل ناڤ بارهگایێن ناوچهیان و گوت: ئهڤرۆ ئهم خو سهرفراز دبینین ل ههمبهر ڤهكرنا ڤێ ژمارا زور یا دهزگههێن ساخلهمیێ ل پارێزگهها دهوكێ و ئهم شادین كو دبینین بێ جێوازی خزمهت بو ههموو خهلكێ دهڤهرێ دهێته پێشكێشكرن.
حهمزه رهزیكی