140 هزار زارۆك ب دژی سوركا دێ هێنه ڤاكسیندان
هاتیه بلاڤکرن روژا دوو شه‌مبێ, 25 گولان 2009 - 1:40pm
ئه‌ڤرۆ 25/5/2009 و ل بنگه‌هێ سه‌رسنك یێ ساخله‌میێ، ب ئاماده‌بوونا ئیسماعیل محه‌مه‌د ئه‌حمه‌د قایمقامێ قه‌زا ئامێدیێ و رێڤه‌به‌رێ ناحیا سه‌رسنكێ و د.عه‌بدوللا سه‌عید عه‌بدوللا رێڤه‌به‌رێ گشتیێ ساخله‌میا پارێزگه‌ها دهوكێ و رێڤه‌به‌رێ ساخله‌میا ئامێدیێ و رێڤه‌به‌رێ په‌روه‌ردا قه‌زا ئامێدیێ و نوونه‌رێن رێكخراوێن یونسێف و ساخله‌میا جیهانی رێ و ره‌سمێن هه‌وا ڤاكسیندانا دژی نه‌خوشیا سوركا ب رێڤه‌چوون.
د.عه‌بدوللا سه‌عید عه‌بدوللا رێڤه‌به‌رێ گشتیێ ساخله‌میا پارێزگه‌ها دهوكێ دیاركر كو بریار ئه‌وه هه‌وا ڤاكسیندانێ بو ده‌مێ 10 رۆژان ڤه‌كێشیت و تێدا هه‌موو زاروكێن 9 هه‌یڤی هه‌تا 5 سالی كو ژمارا وان 140 هزار زاروكن دێ هێنه ڤاكسیندان و تیمێن ڤاكسیندانێ مال ب مال دێ گه‌رن و هنده‌ك ژی ل بنگه‌هێن ساخله‌میێ نه داكو بشێن ڤێ ئارمانجێ بجه بینن.
د.عه‌بدوللای ئه‌وژی دیاركر كو ئه‌ڤه چه‌ندین ساله ل دووڤ پروگرامه‌كێ رێكخستی ئه‌ڤ هه‌وه دهێنه ئه‌نجامدان و راسته ئه‌ڤ نه‌خوشیه هاتینه كونترولكرن,به‌لێ ژبه‌ركو ل پارێزگه‌هێن دی یێن عیراقێ هه‌نه له‌ورا پروگرامێ ڤاكسیندانێ دگه‌ل هه‌وێن ڤاكسیندانێ د به‌رده‌وامن.
ئیسماعیل محه‌مه‌د ئه‌حمه‌د، قایمقامێ قه‌زا ئامێدیێ گرنگیا ڤان هه‌وان ب وێ چه‌ندێ گرێدا كو خه‌لك هاریكاره دگه‌ل تیمێن ساخله‌میێ و ب شێوه‌یه‌كێ باش پێشوازی لێ دهێته كرن و خواست كو وه‌لاتی د هاریكاربن دگه‌ل تیمێن ڤاكسیندانێ ژبه‌ركو ئه‌ڤه كاره‌كێ گشتی یه و خزمه‌تا هه‌موو زاروكان دكه‌ت ژبوی كو ل پاشه‌روژێ ئه‌ڤ نه‌خوشیه په‌یدانه‌بن.
ئه‌ڤ مالپه‌ره فرێکه
