ئێكه‌مین قاره‌مانیا ته‌پا پێی یا بچووك كری دناڤبه‌را ده‌زگه‌هێن ساخله‌میێ دا
هاتیه بلاڤکرن روژا دوو شه‌مبێ, 1 خزیران 2009 - 9:41am
ب ئاماده‌بوونا (د.عه‌بدوللا سه‌عید عه‌بدوللا) رێڤه‌به‌رێ گشتیێ ساخله‌میا پارێزگه‌ها دهوكێ و (سه‌عید خه‌لیل) نوونه‌رێ نوونه‌راتیا لیژنا ئولومپی یا وه‌رزشی ل پارێزگه‌ها دهوكێ و ب پشكداریا 16 تیمێن سه‌ر ب ده‌زگه‌هێن ساخله‌میێ ڤه ل سنورێ پارێزگه‌ها دهوكێ,ب هه‌لكه‌فتا رۆژا جیهانی یا نه‌هێلانا جگاره‌كێشانێ رۆژا 31/5/2009 ل ده‌مژمێر 7ێ ئێڤاری ل یاریگه‌ها لاوان یا بچووك كری ل تاخێ ماسیكێ ئێكه‌مین قاره‌مانیا ته‌پا پێی ب رێڤه‌چوو.
قاره‌مانیا ناڤبری كو ژلایێ رێڤه‌به‌ریا گشتی یا ساخله‌میا پارێزگه‌ها دهوكێ ب هه‌ڤكاری دگه‌ل سه‌ندیكا ده‌رمانسازێن كوردستانێ لقی دهوك و ژماره‌كا ده‌رمانگه‌ه و ده‌رمانخانان هاتیه رێكخستن، ب ده‌قیقه‌كا رێزگرتنێ بو گیانێ شه‌هیدان ده‌ستپێكر.
پاشی رووپیڤانا تیمێن پشكدار ده‌ستپێكر و تێدا ب شێوه‌یه‌كێ رێك و پێك هه‌موو تیمان پشكداری كر و پاشان په‌یڤا لیژنا سه‌رپه‌رشتا قاره‌مانیێ ژلایێ (د.عه‌بدوللا سه‌عید عه‌بدوللا)رێڤه‌به‌رێ گشتیێ ساخله‌میا پارێزگه‌ها دهوكێ هاته خواندن و د په‌یڤا خودا ئاماژه دا وێ چه‌ندێ كو رێكخستنا ڤێ قاره‌مانیێ په‌یامه‌كا دیتره ژبو هشیاركرنا وه‌لاتیان ل دور نه‌كێشانا جگاره‌یان ل جهێن گشتی و دێ هه‌ول ده‌ین كو وه‌رزش وه‌كو رێیه‌ك ژبو گرنگیدانێ ب ساخله‌میێ بهێته ب كارئینان و ڤه‌كرنا قاره‌مانیه‌كێ ب هه‌لكه‌فتا رۆژا جیهانی یا نه‌هێلانا جگاره‌كێشانێ ب گرنگی دا زانین و خواست كو تیمێن پشكدار د قاره‌مانیێدا ب گیانه‌كێ وه‌رزشی رێزێ ل هه‌ڤدو بگرن.
ددووڤدا سووندا وه‌رزشی ژلایێ تیمێن پشكدار هاته خواندن و پشتی هه‌ڤناسینێ دناڤبه‌را رێڤه‌به‌رێ گشتیێ ساخله‌میا پارێزگه‌ها دهوكێ و نوونه‌رێ لیژنا ئولومپی دگه‌ل یاریكه‌رێن هه‌ردو تیمێن ده‌ستپێكێ ( تیما رێڤه‌به‌ریا گشتی یا ساخله‌میا پارێزگه‌ها دهوكێ) و ( تیما پشكا خوپاراستنا ساخله‌میێ) ئێكه‌م یاری ده‌ستپێكر و د ئه‌نجامدا تیما پشكا خوپاراستنێ ب سه‌ركه‌فت ب (3) گولان بێ به‌رامبه‌ر.
ژ ئه‌نجامێن دی یێن هه‌ڤركیێن رۆژا ئێكێ كو دناڤبه‌را تیما زووده‌م و تیما سه‌نته‌رێ شووتنا گولچیسكان هاته كرن و تێدا تیما (زووده‌م) ب سه‌ركه‌فت ب ( 4) گولا به‌رامبه‌ر (2) گولا.
ژڤان ئه‌وه كو رۆژانه دو یاری دنڤ قاره‌مانیێ دا بهێنه كرن و هه‌تا رۆژا 6/6/2009 یا به‌رده‌وام بیت
حه‌مزه ره‌زیكی
ئه‌ڤ مالپه‌ره فرێکه
