ل نهخۆشخانا گولان یا گشتی ل ئاكرێ 50 هاریكارێن پهرهستاری دهرچوون و ئامیرێ CT.scan كهته كاری
هاتیه بلاڤکرن روژا جارشهمبێ, 19 تهباخ 2009 - 9:13am
ب ههلكهفتا 16ێ تهباخێ و بورینا 63 سالان ل سهر دامهزراندنا پارتی دیموكراتی كوردستان، ل رۆژا سێ شهمبی رێكهفتی 18/8/2009 و ب ئامادهبوونا بهرێز ( جهوههر عهلی عهزیز) قایمقامێ قهزا ئاكرێ و نوونهرێ قایمقامێ قهزا بهرهدهرهش و ( صهباح بهیتوالله) جێگرێ بهرپرسیارێ لقی 9 یێ پارتی دیموكراتی كوردستان و نوونهرێن چهندین دام و دهزگایێن حزبی و حكومی ل قهزا ئاكرێ.
ب چاڤدێریا بهرێز ( د.عهبدوللا سهعید عهبدوللا) رێڤهبهرێ گشتی یێ ساخلهمیا پارێزگهها دهۆكێ، ئاههنگهك بۆ 50 دهرچوویێن خۆلا پهرستاری ل قهزایێن ئاكرێ و بهردهرهش هاته گێران.
پشتی دهقیقهكێ راوهستیان بۆ گیانێ شههیدێن كوردستانێ و سهروهرێ وان بارزانیێ نهمر و ئدریسێ ههردهم زیندوو، د.فازل بالندی رێڤهبهرێ ساخلهمیا ئاكرێ د پهیڤهكێدا سوپاسیا ههموو وان لایهنان كر یێن بووینه هاندهر بۆ ب سهركهفتنا خولا 6 ههیڤی بۆ چهند دهڤهرێ داكۆ بشێن بهردهوامیێ ب خزمهتێ ل دهزگههێن ساخلهمیێ بدهن.
د.عهبدوللا سهعید عهبدوللا، رێڤهبهرێ گشتیێ ساخلهمیا پارێزگهها دهۆكێ ژی د پهیڤهكێدا دیاركر كۆ ژ بهركو ئهڤ قوتابیه نه دشیان بهێنه سهنتهرێ پارێزگهها دهۆكێ بۆ خواندنێ، لهوران ئهو شیان ستافهكێ پێك بینن و ل ئاكرێ خول بهێته ڤهكرن و گوت: دێ ب ههموو شیانێن خۆ ههول دهین دهرچوویێن ڤێ خولێ ل دام و دهزگایێن ساخلهمیێ بهێنه دامهزراندن داكۆ بشێن ب ئهركێ خۆ راببن و خزمهتا وهلاتیێن دهڤهرێ بكهن.
پاشان فلمهكێ دكیومێنتی ل دور رۆژانێن خولێ و شێوێ وانه گوتنێ هاته پێشاندان و ل دووماهیێ دیاری و باوهرنامه ل سهر دهرچوویێ، خولێ هاتنه بهلاڤكرن.
* پشتی ب ئاههنگا دهرچوونێ ب دووماهی هاتی، د گهریانهكێ دا بهرێز د.عهبدوللا سهعید عهبدوللا رێڤهبهرێ گشتیێ ساخلهمیا پارێزگهها دهۆكێ بۆ پشك و هوبێن نهخوشخانا گولان یا گشتی، ئامیرێ CT.scan كهته كاری و ههبوونا ڤی ئامیرهی ل نهخوشخانا گولان یا گشتی ل ئاكرێ تایبهتمهندی ههیه و رۆژانه دێ خزمهتا نهخوشێن پێدڤی كهت.
پاشی سهرهدانا پشكا تاقیگههێ ل نهخوشخانا ناڤبری دا و بریار دا پێدڤیێن تاقیگههێ یێن پشكنینا ب زووترین دهم بۆ بهێنه دابینكرن.
ههر وههان چهند شیرهت و رێنما ئاراستهی ستافێ نهخوشخانێ هاتنه كرن ل دور چاوانیا ب رێڤهبرنا كاروبارێن رۆژانه یێن نهخوشان.