هه‌وا ڤاكسیندانێ‌ ب دژی نه‌خوشیا فالنجا زاروكان ده‌ستپێكر

ب ئاماده‌بونا به‌رێزان( گورگیس شلیمون) جێگرێ‌ پارێزگارێ‌ دهۆكێ‌ و (خالد عه‌زیز) نوونه‌رێ‌ قایمقامیا قه‌زا دهۆكێ‌ (د.عه‌بدوللا سه‌عید عه‌بدوللا) رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ و نوونه‌را ئه‌نجومه‌نێ‌ پارێزگه‌ها دهوكێ‌ یا ئێكه‌تیا ئافره‌تێن كوردستانێ‌ و ژماره‌كا نوژدارێن تایبه‌تمه‌ند، ئه‌ڤرۆ 28/9/2009 و ل ده‌مژمێر 9,30ێ‌ سپێدێ‌ و ل بنگه‌هێ‌ دهۆك یێ‌ ساخله‌میێ‌ ل تاخێ‌ گه‌لی رێ‌ و ره‌سمێن ب رێڤه‌چوونا گه‌را ئێكێ‌ یا هه‌وا ڤاكسیندانا دژی نه‌خوشیا فالنجا زاروكان ب ڤاكسیندانا چه‌ند زاروكان ب رێڤه‌چوون.
(گورگیس شلیمون) جێگرێ‌ پارێزگارێ‌ دهۆكێ‌ دیاركر كۆ ئه‌نجامدانا سالانه‌ یا هه‌وێن ڤاكسیندانێ‌ بویه‌ ئه‌گه‌رێ‌ وێ‌ چه‌ندێ‌ ئه‌ڤ ه‌نه‌خوشیه‌ دناڤ باژێرێ‌ مه‌دا بنبربیت  و داخواز ژ ده‌زگه‌هێن راگه‌هاندنێ‌ كر كۆ پتر گرنگیێ‌ ب هشیاری و ره‌وشه‌نبیریا ساخله‌میێ‌ بده‌ن ژبۆ پاراستنا جڤاكێ‌ مه‌ ژ نه‌خوشیان.
ژلایێ‌ خوڤه‌(د.عه‌بدوللا سه‌عید عه‌بدوللا) رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ دیاركر د ڤێ‌ هه‌وێ‌ دا پتر ژ 160000 هزار زاروكێن ئێك رۆژی هه‌تا پێنچ سالی دێ‌ هێنه‌ ڤاكسیندان و دیاركر ژی كو هژماره‌كا زور یا كارمه‌ندێن ساخله‌میێ‌ پشكداری دڤێ‌ هه‌وێ‌ دا كریه‌ و (334) تیمێن ڤاكسیندانێ‌ ل سه‌رانسه‌ری پارێزگه‌ها دهۆكێ‌ دێ‌ پشكداریێ‌ د هه‌وا ناڤبری دا كه‌ن.
رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ گوت: ژبه‌ركو تیمێن ساخله‌میێ‌ دێ‌ سه‌ره‌دانا هه‌موو مالان كه‌ن بۆ ڤاكسیندانا زاروكێن وان، له‌ورا خواست هه‌موو خێزان هاریكاریێ‌ دگه‌ل تیمێن ڤاكسیندانێ‌ بكه‌ن داكو ئارمانجا وان بجه بهێت.
هه‌ژی یه‌ كو گه‌را ئێكێ‌ یا هه‌وا ڤاكسیندانێ‌ ل رۆژا 27/9 – 1/10/2009 دێ‌ یا به‌رده‌وام بیت و بریار ئه‌وه‌ ل رۆژێن 1-5/11/2009 گه‌را دوێ‌ ژی ده‌ست پێبكه‌ت.

حه‌مزه‌ ره‌زیكی