وورك شوپه‌ك ل دور ساخله‌میا ده‌روونی یا زاروكان هاته‌ ئه‌نجامدان

ل رۆژا 15/10/2009 و ل ده‌مژمێر 9ێ‌ سپێدێ‌ ب ئاماده‌بوونا د.عه‌بدوللا سه‌عید عه‌بدوللا رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ و رێڤه‌به‌رێن گشتی یێن چاڤدێریا كومه‌لایه‌تی ل پارێزگه‌هێن هه‌ولێر و دهوك و به‌رپرسا رێكخراوا دیاكونیا یا سوێدی و نوونه‌رێن چه‌ندین رێڤه‌به‌ریێن میری و به‌رپرسێ‌ لیژنا ناوچا پێشكه‌فتن یا پارتی و ژماره‌كا زور ژ تایبه‌تمه‌ندێن ده‌روونیا زاروكان و ڤه‌كوله‌رێن ده‌روونی و جڤاكی نوژدارێن ساخله‌میا گشتی ل سه‌ر ئاستێ‌ عیراقێ‌ و به‌رپرسێن رێكخراوێن پاراستنا مافێن ژنان و زاروكان و ل هولا رێڤه‌به‌ریا گشتی یا ساخله‌میا پارێزگه‌ها دهۆكێ‌ و ب هه‌ڤكاری دگه‌ل رێكخراوا دیاكونیا یا سوێدی  وورك شوپه‌ك هاته‌ ئه‌نجامدان.
پشتی ب خێرهاتنێ‌، د.عه‌بدوللا سه‌عید عه‌بدوللا رێڤه‌به‌رێ‌ گشتیێ‌ یا ساخله‌میا پارێزگه‌ها دهوكێ‌ په‌یڤه‌ك پێشكێشكر و تێدا ئارمانجێن گرێدانا ڤێ‌ وورك شوپێ‌ بو ئاماده‌بویان دانه‌ خویاكرن و خواست ( ده‌زگه‌هێن ساخله‌میێ‌ و راگه‌هاندن و په‌روه‌رده‌ و فێركرن) پتر گرنگیێ‌ ب ساخله‌میا ده‌رونیا زاروكان بده‌ن و گوت: ساخله‌می نه‌ بتنێ‌ ئه‌وه‌ له‌شێ‌ مرۆڤی یێ‌ ساخله‌م بیت، به‌لكو ده‌روون پشكه‌كا گرنگه‌ د ساخله‌میا هه‌ر كه‌سه‌كی دا و ب هیڤیا ده‌مه‌كێ‌ خوش بو مێهڤانان ل پارێزگه‌ها دهۆكێ‌ و ده‌ڤه‌رێن وێ‌ گه‌شت و گوزاری په‌یڤا خو ب دووماهی ئینا.
ددوڤدا به‌رپرسا رێكخراوا دیاكونیا یا سوێدی په‌یڤا لیژنا ئاماده‌كاریا وورك شوپێ‌ پێشكێشكر و ب درێژی ل سه‌ر خالێن نه‌رێنی یێن كارتێكرنێ‌ ل ساخله‌میا ده‌روونی یا زاروكان دكه‌ن شروڤه‌كرن و ژ ئاماده‌بویان خواست د ته‌وه‌رێن خودا پتر ل سه‌ر ب راوه‌ستن و گه‌نگه‌شه‌بكه‌ن داكو ببنه‌ هێڤێنی ده‌ستپێكرنێ‌ ب دارشتنا پلانه‌كا نوی د ڤی بیاڤی دا.
ل ده‌مژمێر 9,30ێ‌ سپێدێ‌ بابه‌تێن وورك شوپێ‌ ده‌ست ب پێشكێشكرنێ‌ كرن و بابه‌تێن( رۆلێ‌ شاره‌زایێن ده‌روونی د ساخله‌میا ده‌روونیا زاروكان دا، پێكڤه‌گرێدانا خزمه‌تێن ساخله‌میا ده‌روونی دگه‌ل خزمه‌تێن چاڤدێریا ده‌ستپێكی ل بنگه‌هێن ساخله‌مێ و خواندنا ساخله‌میا ده‌روونی یا زاروكان ل كولیژه‌یان و نه‌دروست ب كارئینانا ده‌رمان و كه‌رستێن بێهوشكرنێ‌) د ماوێ‌ دو رۆژان هاتنه‌ گه‌نگه‌شه‌كرن و ل دووماهیێ‌ ئاماده‌بویان ئه‌ڤ داخوازیه‌ كرن:
1- پێدڤی یه‌ ساخله‌میا ده‌روونی یا زاروكان ببیته‌ پشكه‌ك ژ خزمه‌تێن چاڤدێریا ساخله‌میا ده‌سپێكێ‌.
2- پێدڤیه‌ ساخله‌میا ده‌روونی یا زاروكان ببیته‌ پارچه‌یه‌ك ژ پروگرامێ‌ كولیژێن په‌یوه‌ندیدار وه‌ك( پزیشكی، په‌روه‌ده‌ و په‌روه‌دا بنیات  و زانستێ‌ ده‌روونی و ...هتد).
3-پشته‌ڤانی ل پێكئینانا ڤه‌كولینان د بیاڤێ‌ ساخله‌میا ده‌روونی یا زاروكان دا بهێته‌ كرن و هه‌موو پێدڤیێن تایبه‌ت ژبو ئه‌نجامدانا وان ڤه‌كولینان بهێنه‌ دابینكرن.
4- دیتنا هنده‌ك رێك و ئالاڤان بو زێده‌كرنا خزمه‌تێن دهێنه‌ پێشكێشكرن بو هنده‌ك زاروكان وه‌ك( ئێتیم، زارۆیێن ل سه‌ر جاده‌یان، زارویێن تووشی توندوتیژیێ‌ ب هه‌موو شێوازان دبن و ئه‌وێن ماددێن بێهوشكه‌ر ب كاردئینن و ئه‌وێن ژلایێ‌ ئایدولوژی ڤه‌ دهێنه‌ ئیستغلال كرن).
5- ل دووماهێی لیژنه‌یه‌ك بهێته‌ پێكئینان ژبو دووڤچونا چاوانیا ب جهئینانا خالێن ل سه‌ری دیاركرین.
ئاماده‌بویێن وورك شوپێ‌ ژبلی وه‌رگرتنا سمیناران، سه‌رادانا سه‌نته‌رێ‌ نه‌خوشیێن ده‌روونی و پشكا نه‌خوشیێن ده‌روونی  سه‌ر ب رێڤه‌به‌ریا گشتی یا ساخله‌میا پارێزگه‌ها دهۆكێ‌ دا.