به‌رێ‌ بنیاتی بو سه‌نته‌رێ‌ هه‌ماهه‌نگی فریاگوزاری ل دهۆكێ‌ هاته‌ دانان

ب ئاماده‌بوونا د.زریان عوسمان وه‌زیرێ‌ ته‌ندروستی ل هه‌رێما كوردستانێ‌ و گورگیس شلیمون جێگرێ‌ پارێزگارێ‌ دهۆكێ‌ و د. عه‌بدوللا سه‌عید عه‌بدوللا رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌، ئه‌ڤرۆ 20/10/2009 و ل ده‌مژمێر 10,30ێ‌ سپێدێ‌ به‌رێ‌ بنیاتی بۆ پروژێ‌ سه‌نته‌رێ‌ هه‌ماهه‌نگیا فریاگوزاری ل پارێزگه‌ها دهوكێ‌ هاته‌ دانان.
د رێ‌ و ره‌سمێن دانانا به‌رێ‌ بنیاتی دا كو نوونه‌رێن به‌نكا نێڤ ده‌ولی و رێكخراوا UNOPS یا نه‌ته‌وه‌یێن ئێكگرتی ژی تێدا ئاماده‌ببون، د. زریان عوسمان بۆ ده‌زگایێن راگه‌هاندنێ‌ دیاركر كو هزرا دانانا توره‌كا تایبه‌ت ب سه‌نته‌رێن هه‌ماهه‌نگیێ‌ ژلایێ‌ وه‌زاره‌تا ته‌ندروستی یا حكومه‌تا هه‌رێما كوردستانێ‌ ب هه‌ڤكاریا بانكا نێڤ ده‌ولی و رێكخراوا یونیپس دێ‌ هه‌موو كوردستان پێكڤه‌ هێته‌ گرێدان و ژماره‌كا تایبه‌ت یا په‌یوه‌ندیێ‌ ژی دێ‌ بو هه‌بیت ژ پێخه‌مه‌ت كێمكرنا روودانان و د هه‌وارهاتنا هه‌ر حاله‌ته‌كێ‌ ب قه‌ومیت و وه‌زیرێ‌ ته‌ندروستی دیاركر ژی كو ژ بو ئه‌نجامدانا ڤی پروژه‌یبه‌نكا نیڤ ده‌ولی  گوژمێ‌ 8 ملیون دولارێن ئه‌مریكی بو هه‌ر سێ‌ پارێزگه‌هێن (هه‌ولێر و دهوك و سلێمانی) هاتینه‌ ته‌رخانكرن و بو ڤی ئاڤاهی ژی000 165 دولار ئه‌مریكی  هاتینه‌ ته‌رخانكرن و تێدا زێده‌باری ستافه‌كێ‌ مه‌شق دای چه‌ندین ترومبێلێن هه‌وارهاتنێ‌ ب هه‌موو پێدڤی ڤه‌ د 24 ده‌مژمێران دا دێ‌ خزمه‌تا وه‌لاتیان كه‌ن.
ژلایێ‌ خوڤه‌ د. عه‌بدوللا سه‌عید عه‌بدوللا، رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ دیاكر كو نوكه‌ ل ده‌وروبه‌رێن باژێرێ‌ دهۆكێ‌ 4 بنگه‌هێن هه‌وارهاتنێ‌ هه‌نه‌ و ئه‌ڤ بنگه‌هه‌ ب شێوه‌یه‌كێ‌ راسته‌وخو دێ‌ گرێدای ڤی سه‌نته‌ری بن ل ده‌مێن ته‌نگاڤیان ب شێوه‌یه‌كێ‌ راسته‌وخو دێ‌ ئاگه‌ه ژ نه‌خوش و كه‌سانێن تووشی روودانان دبن هه‌بیت و هه‌موو خزمه‌تێن به‌ری نه‌خوشخانێ‌ دێ‌ بو وان كه‌سان هێنه‌ پێشكێشكرن.
هه‌ژی گوتنێ‌ یه‌ كو دهۆك ئێكه‌مین پارێزگه‌ه بو به‌رێ‌ بنیاتی بو هاتیه‌ دانان و بریار ئه‌وه‌ د هه‌ردو رۆژێن بهێت دا سه‌نته‌رێن مینا وی ل پارێزگه‌هێن هه‌ولێر و سلێمانیێ‌ به‌رێ‌ بنیاتی بو بهێته‌ دانان.
حه‌مزه‌ ره‌زیكی