ب گوژمێ 1,150,000 ملیاره‌ك و سه‌د و پێنجی ملیون دیناران
هاتیه بلاڤکرن روژا دوو شه‌مبێ, 9 چریا دووى 2009 - 1:10pm
نه‌خوشخانا ته‌نگاڤیان یا فێركرنێ و كلینیكا ژ ده‌رڤه یا نه‌خوشخانێ ل ژێر كارێن نووژه‌نكرن و به‌رفره‌هكرنێ دانه
ژ بو پتر خزمه‌تكرنا نه‌خوشان و به‌رفره‌هكرنا سنورێ خزمه‌تكاریێن ساخله‌میێ و ل سه‌ر بودجا وه‌زاره‌تا دارای یا حكومه‌تا هه‌رێما هه‌رێما كوردستانێ، نه‌خوشخانا ته‌نگاڤیان یا فێركرنێ و كلینیكا ژده‌رڤه یا سه‌ر ب نه‌خوشخانا ناڤبری د كارێن به‌رفره‌هكرن و نووژه‌نكرنێ دانه.
ل ده‌مژمێر 8,30ێ ئه‌ڤرۆ 9/11/2009 , د. عه‌بدوللا سه‌عید عه‌بدوللا رێڤه‌به‌رێ گشتیێ ساخله‌میا پارێزگه‌ها دهۆكێ سه‌ره‌دانا پروژێن ناڤبری دا و ل به‌راهیێ و ژبو زانینا ئاریشه‌یێن دكه‌ڤنه درێكا كاركرنێ دا كومبونه‌ك دگه‌ل رێڤه‌به‌رێ نه‌خوشخانا ته‌نگاڤیان و ئه‌ندازیارێن سه‌رپه‌رشتێن پروژه‌یان ئه‌نجام دا و تێدا چاوانیا خزمه‌تكرنا نه‌خوشان دگه‌ل كارێن نووژه‌نكرنێ هاتنه گه‌نگه‌شه‌كرن.
د سه‌ره‌دانا خو دا رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو ئارمانج ژ به‌رفره‌هكرنا نه‌خوشخانا ته‌نگاڤیان ئه‌وه پتر نه‌خوشان ب حه‌وینیتن ب تایبه‌ت كو گه‌له‌ك نه‌خوشێن ده‌وروبه‌رێن پارێزگه‌ها مویسل ل شنگال و زومار و تلعفه‌ر رۆژانه سه‌ره‌دانا ڤێ نه‌خوشخانێ دكه‌ن و گوت: بنگه‌هێ خه‌بات یێ كه‌ڤن ژی دێ ب سه‌ر نه‌خوشخانا ته‌نگاڤیان ڤه هێته به‌ردان و بیته پشكه‌ك ژوێ نه‌خوشخانێ كو خزمه‌تێن وێ به‌رفره‌هتر لێ بهێن.
د.عه‌بدوللا سه‌عید عه‌بدوللا دا زانین ژی كو قاته‌كێ دی ل سه‌ر نه‌خوشخانێ دێ هێته زێده‌كرن و تێدا ل دورێن 50 ته‌ختان دێ ل نه‌خوشخانێ هێنه زێده‌كرن و ئه‌ڤ پروژه ب پشته‌ڤانیا حكومه‌تا هه‌رێما كوردستانێ دهێته ئه‌نجامدان.
هه‌ر ئه‌ڤرۆ رێڤه‌به‌رێ گشتیێ ساخله‌میا پارێزگه‌ها دهۆكێ سه‌ره‌دانا بنگه‌هێ خه‌بات یێ ساخله‌میێ یێ نوی كر و ل نێزیك ل دور ره‌وشا وی و كێماسیێن وی ئاگه‌هدار بوو.
ئه‌ڤ مالپه‌ره فرێکه
