وه‌زیرێ‌ ساخله‌میا هه‌رێما كوردستانێ‌ سه‌ره‌دانا پارێزگه‌ها دهۆكێ‌ كر

ژ بو ئاشنابوون ل دور ره‌وشا ساخله‌میێ‌ ل پارێزگه‌ها دهۆكێ‌ و ژ نێزیك دیتنا ده‌زگه‌هێن ساخله‌میێ‌ و ب مه‌ره‌ما موكمكرنا په‌یوه‌ندیان، به‌رێز (د.تاهر هه‌ورامی) وه‌زیرێ‌ ساخله‌میێ‌ ل كابینا شه‌شێ‌ یا حكومه‌تا هه‌رێما كوردستانێ‌ و ب هه‌ڤالینیا به‌رێز (د.عه‌بدوللا سه‌عید عه‌بدوللا)ل ده‌ژمێر 9,30ێ‌ سپێده‌هیا رۆژا 10/11/2009 سه‌ره‌دانا به‌رێز (ته‌مه‌ر ره‌مه‌زان) پارێزگه‌رێ‌ دهۆكێ‌ كرن و د هه‌ڤدیتنه‌كێدا هه‌ردو لایان پروژێن خزمه‌تكاری دوارێ‌ ساخله‌میێ‌ دا و پێدڤیا پارێزگه‌ها دهۆكێ‌ ب ده‌زگه‌هێن ساخله‌میێ‌ و ستراتیژیا پێشڤه‌برنا كه‌رتێ‌ ساخله‌میێ‌ ل هه‌رێمێ‌ گه‌نگه‌شه‌كرن.
ددووڤدا به‌رێزان وه‌زیرێ‌ ساخله‌میێ‌ و رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ سه‌ره‌دانا بنگه‌هێ‌ گولان یێ‌ ساخله‌میێ‌ ل قه‌زا سێمێلێ‌ دان و گه‌ریانه‌ك دناڤ پشكێن بنگه‌هێ‌ ناڤهاتی هاته‌ كرن.
ل ده‌مژمێر 11ێ‌ سپێدێ‌، ب ئاماده‌بوونا هه‌ردو به‌رێزان كومبونه‌ك دگه‌ل رێڤه‌به‌رێن رێڤه‌به‌ری و كه‌رتێن ساخله‌میێ‌ ل سنورێ‌ پارێزگه‌هێ‌ و سه‌روك پشكێن رێڤه‌به‌ریا گشتی و رێڤه‌به‌رێن نه‌خوشخانێن (ئازادی و ته‌نگاڤیان و هیڤی و سوتنێ‌ و نشته‌رگه‌ریا جوانكاری) سازكر.
د ڤێ‌ كومبوونێ‌ دا گوهداریا داخوازیێن ئاماده‌بوونا ژ دامه‌زراندنا كادرێ‌ ساخله‌میێ‌ و ئاڤاكرنا نه‌خوشخانه‌یان و نووژه‌نكرن و به‌رفره‌هكرنا ده‌زگه‌هان و باشكرنا ژیارا نوژدار و كارمه‌ندێن ساخله‌میێ‌ و ب تایبه‌ت ل ده‌ڤه‌رێن ده‌رڤه‌ی سه‌نته‌رێ‌ قه‌زایان و خزمه‌تێن خوپاراستنێ‌ هاتنه‌ كرن.
هه‌ر د كومبوونێ‌ دا به‌رێز رێڤه‌به‌رێ‌ گشتیێ‌ ساخله‌میا پارێزگه‌ها دهوكێ‌ كورتیه‌ك ل دور ره‌وشا ساخله‌میێ‌ ل دهوكێ‌ و هه‌ڤكاریا وان دگه‌ل ده‌زگایێن حكومی و زانكویا دهوكێ‌ و پێدڤیێن پارێزگه‌هێ‌ ژ ده‌زگه‌هێن ساخله‌میێ‌ دانه‌ زانین.
ددووڤدا به‌رێزان سه‌ره‌دانا ( نه‌خوشخانێن ئازادی و ته‌نگاڤیان یێن فێركرنێ‌ و نه‌خوشخانا سوتنێ‌ و نشته‌رگه‌ریا جوانكاریێ‌ و سه‌نته‌رێ‌ زانست یێ‌ نوژداریا خێزانێ‌) ل دهۆكێ‌ كرن و ژ نێزیك ل سه‌ر ره‌وشا وان ئاگه‌هداربوون.
د.تاهر هه‌ورامی، وه‌زیرێ‌ ساخله‌میێ‌ ل حكومه‌تا هه‌رێما كوردستانێ‌ د داخویانیه‌كا تایبه‌ت دا راگه‌هاند كو ئه‌و گه‌له‌ك ژ خزمه‌تێن ساخله‌میا پارێزگه‌ها دهۆكێ‌ یێ‌ رازی یه‌ و گه‌شبینیا خو ده‌ربری ل هه‌مبه‌ر به‌رفره‌هكرنا خزمه‌تكاریێن ساخله‌میێ‌ و سوپاسیا رێڤه‌به‌رێ‌ گشتی یێ‌ ساخله‌میا پارێزگه‌ها دهۆكێ‌ كر كو ب رێك و پێكی كار د ده‌زگه‌هێن ساخله‌میێ‌ دا رێكخستی یه‌ و به‌لێن دا كو ل ده‌مێ‌ وه‌زاره‌تا خۆ پتر پویته‌ی ب بوارێ‌ ساخله‌میا پارێزگه‌ها دهۆكێ‌ و هه‌رێما كوردستانێ‌ بده‌تن.