كومبونهكا بهرفرهه دگهل رێڤهبهرێن قوتابخانهیان هاته ئهنجامدان
ل دهمژمێر 11,30ێ سپێدههیا ئهڤرۆ 23/11/2009 ب ئامادهبوونا د.عهبدوللا سهعید عهبدوللا، رێڤهبهرێ گشتیێ ساخلهمیا پارێزگهها دهۆكێ و رێڤهبهرێن پشكا خوپاراستنا ساخلهمیێ و بنگههێ زانین یێ ساخلهمیا قوتابخانهیان و نوونهرێ رێڤهبهرێ پهروهردا قهزا دهۆكێ و سهروكاتیا زانكویا دهۆك و ئهوقافا دهۆكێ، ل هولا رێڤهبهریا پهروهردا قهزا دهوكێ كومبونهك دگهل رێڤهبهرێن قوتابخانهیێن بنهرتی هاته سازكرن. ل بهراهیێ رێڤهبهرێ گشتیێ ساخلهمیا پارێزگهها دهۆكێ دیاركر كو نه بتنێ ساخلهمی بهلكو ئهم ههموو بهرپرسین ژ ژیان و ژیارا خهلكی و پێدڤی یه ههر رێڤهبهرهك و ماموستایهك ل جهێ خو گرنگیێ ب ساخلهمیا قوتابیان بدهن، نهخاسمه ل كاودانهكێ وهكو ئهڤرۆ كو نهخۆشیا ئهنفلاوهنزایێ رۆژ ب رۆژێ بهر ب زێدهبوونێ یه و ب ههنڤكاریا ماموستایان دێ شێن ژیانا خو و یا زارۆكان پێكڤه پارێزن. دیسان ب درێژی ل دور نیشان و رێكێن خوپاراستن و چارهسهریێ ژ نهخوشیێ ئاخفت و داخواز ژێ كر كو ب دیتنا ههر نیشانهكا نهسروشتی قوتابیان بهنێرنه دهزگایێن ساخلهمیێ بو ئهنجامدانا پشكنینان و وهرگرتنا چارهسهریێ. رێڤهبهرا پشكا خوپاراستنێ ژی ل دور گرنگیا ههوا ڤاكسیندانێ دژی نهخوشیا سوركان ئاخفت ئهوا بریاره ل رۆژا 5/12/2009 بۆ ههموو قوتابیێن 1 تا 6 بنهرتی دهستپێ بكهت و خواست كو رێڤهبهرێن قوتابخانهیان ههڤكاریهكا باش دگهل تیمێن ڤاكسیندانێ بكهن ژبۆ سهركهفتنا ههوا ناڤبری. ل دور ساخلهمیا قوتابخانهیان ژی، بهرپرسێ بنگههێ زانین یێ ساخلهمیا قوتابخانهیان چهند شیرهت و رێنمای ئاراستهی ئامادهبوویان كرن. ل دووماهیێ دهرگههێ دان و ستاندنێ هاته ڤهكرن و بهرسڤا بوچوونێن ئامادهبویان هاته دان.