پتر ژ 205 هزار زارۆكان دێ هێنه ڤاكسیندان ب دژی نه‌خۆشیا سوركا
هاتیه بلاڤکرن روژا ئێک شه‌مبێ, 6 کانونا بچیک 2009 - 1:09pm
ب ئاماده‌بوونا (ماجد سه‌ید سالح) قایمقامێ قه‌زا دهۆكێ و (د.عه‌بدوللا سه‌عید عه‌بدوللا) رێڤه‌به‌رێ گشتیێ ساخله‌میا پارێزگه‌ها دهۆكێ و (وه‌یسی سلێمان) رێڤه‌به‌رێ په‌روه‌ردا قه‌زا دهۆكێ و ژماره‌كا نوژدارێن تایبه‌تمه‌ند و ماموستایان و ل قوتابخانا رێباز یا بنه‌رتی، دوهی 5/12/2009، هه‌وه‌كا ڤاكسیندانێ ب دژی نه‌خۆشیا سۆركان بۆ قوتابیێن پولا ئێكێ هه‌تا شه‌شێ بنه‌ره‌تی ده‌سپێكر و بریار ئه‌وه ئه‌ڤ هه‌وه بۆ ده‌مێ 10 رۆژان یان به‌رده‌وام بیت.
د.عه‌بدوللا سه‌عید عه‌بدوللا، رێڤه‌به‌رێ گشتیێ ساخله‌میا پارێزگه‌ها دهۆكێ بۆ رۆژنامه‌یا ئه‌ڤرۆ دیاركر كو به‌رهه‌ڤكاریێن باش ژبۆ سه‌ركه‌فتنا ڤێ هه‌وێ هاتینه كرن و گوت: 205499 زارۆكێن قوناغێن به‌ره‌تی دێ هێنه ڤاكسیندان و خواست ئه‌گه‌ر زارۆكێن 6-12 سالیێدا هه‌بن كو نه‌چنه قوتابخانێ بلا قه‌ستا بنگه‌هێن ساخله‌میێ بكه‌ن داكو ژمفایێ ڤاكسینی بێ به‌هر نه‌بن و دیاركر ژی كو 285 تیم بۆ برێڤه‌برنا ڤێ هه‌وێ هاتینه پێكئینان.
د.به‌ختیار ئه‌حمه‌د ره‌شید، سه‌رپه‌رشتكارێ هه‌وا ڤاكسیندانێ بۆ رۆژنامه‌یا ئه‌ڤرۆ گوت: ل هه‌یڤا ئه‌یارا ئه‌ڤ ساله زاروكێن ل ژێر پێنچ سالیێ هاتنه ڤاكسیندان و ئه‌ڤ هه‌وه ژی به‌رده‌وامی یه ب هه‌وا بوری كو زاروكێن ژ 6-12 سالی بخوڤه‌دگریت.
د.كاوه محه‌مه‌د ئه‌مین، نوونه‌رێ رێكخراوا ساخله‌میا جیهانی دیاركر كو پارێزگه‌ها دهوكێ كێمترین زارۆك تووشی نه‌خوشیا سۆركان بووینه ل سه‌ر ئاستێ عیراقێ و دیاركر كو ل سالا 2009 ژمارا تووشبویێن نه‌خۆشیێن سۆركان ل عیراقێ ژ 30 هزار زارۆكان بوری یه و ل هه‌رێما كوردستانێ ژی دورێن 2% ژ زاروكان تووش دبنێ و گوت: دئه‌ڤ ساله‌دا هه‌تا ژیێ 12 سالیێ هه‌موو زارۆك هاتنه ڤاكسیندان و ره‌نگه بۆ سالا بهێت ئه‌ڤ پلانه به‌رفره‌ه ببیت و ده‌ست ب ڤاكسیندانا هه‌موو كه‌سێن 13-28 سالی بكه‌ین كو هه‌تا قوناغا زانكویێ ژی دێ بخوڤه گریت.
دهۆك، حه‌مزه ره‌زیكی
ئه‌ڤ مالپه‌ره فرێکه
