پارێزگه‌رێ‌ دهۆكێ‌ سه‌ره‌دانا چه‌ند پرۆژه‌یێن ساخله‌میێ‌ كر

ب مه‌ره‌ما ژ نیك دیتنا ره‌وشا پروژه‌یێن ساخله‌میێ‌ ئه‌وێن ل ژێر ئه‌نجامدانێ‌ كو ژ بودجێ‌ پارێزگه‌ها دهۆكێ‌ دهێنه‌ ئه‌نجامدان، ئه‌ڤرۆ 31/1/2010، به‌رێز ته‌مه‌ر ره‌مه‌زان پارێزگه‌رێ‌ دهۆكێ‌ دگه‌ل شانده‌كی سه‌ره‌دانا چه‌ند پرۆژه‌یێن ساخله‌میێ‌ كر. ل كلینیكا ده‌رڤه‌ یا نه‌خوشخانا ته‌نگاڤیان هاته‌ پێشوازیكرن ژلایێ‌ د.عه‌بدوللا سه‌عید عه‌بدوللا، رێڤه‌به‌رێ‌ گشتیێ‌ ساخله‌میا پارێزگه‌ها دهوكێ‌ و رێڤه‌به‌رێ‌ نه‌خوشخانا ته‌نگاڤیان یا فێركرنێ‌ و چوند نوژدار و ئه‌ندازیاران، پرۆژێ‌ نووژه‌نكرن و به‌رفره‌هكرنا كلینیكا ده‌رڤه‌ یا نه‌خوشخانا ته‌نگاڤیان كو ل رۆژا 29/10/2009ێ‌ ده‌ستپێكربوو و ل رۆژا 13/1/2010 ب دووماهی هاتیه‌ و بریاره‌ ل رۆژێن بهێت بكه‌ڤیته‌ كاری ژپێخه‌مه‌ت پێشكێشكرنا خزمه‌تێن ساخله‌میێ‌ بۆ كه‌سێن تووشی روودان و حاله‌تێن ته‌نگاڤیان دبن. پاشی شاندێ‌ ناڤبری سه‌ره‌دانا پرۆژێ‌ نه‌خوشخانا به‌رفره‌هكرنا نه‌خوشخانا ته‌نگاڤیان یا فێركرنێ‌ دا كو پێكهاتیه‌ ژ زێده‌كرنا قاته‌كێ‌ تایبه‌ت كو ژ 27 ژوورێن رازاندنا نه‌خوشان پێك دهێت. هه‌ر ئه‌ڤرۆ به‌رێز پارێزگارێ‌ دهوكێ‌ سه‌ره‌دانا پرۆژێ‌ ئاڤاكرنا سه‌نته‌رێ‌ تایبه‌تمه‌ند ب نشته‌رگه‌ریا دلی ل نه‌خوشخانا ئازادی یا فێركرنێ‌ ل دهوكێ‌ دا و ژ نێزیك ل دور ره‌وشا قوناغێن ئاڤاكرنێ‌ ئاگه‌هداربوو. سه‌نته‌رێ‌ نشته‌رگه‌ریا دلی دێ‌ هه‌موو خزمه‌تێن نشته‌رگه‌ریێ‌ ژ ڤه‌كرنا سینگی و قه‌سته‌را دلی بخوڤه‌گریت. د.عه‌بدوللا سه‌عید عه‌بدوللا، رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ دیاركر كو پرۆژێ‌ نه‌خوشخانا ته‌نگاڤیان دگه‌ل كلینیكا ژده‌رڤه‌ پرۆژه‌یه‌كێ‌ گرنگه‌ ژلایێ‌ كارگێریا پارێزگه‌ها دهۆكێ‌ ڤه‌ كوژمێ‌ (1,152,000,000) دینار بۆ هاتینه‌ ته‌رخانكرن كو دێ‌ ب ئاڤاكرنا ڤی پرۆژه‌ی پتر خزمه‌ت دێ‌ بۆ وه‌لاتیێن پێدڤی هێته‌ كرن، هه‌روه‌سان گوت ژی كو بۆ ئێكه‌م جاره‌ سه‌نته‌ره‌كێ‌ تایبه‌تمه‌ند ب نشته‌رگه‌ریا دلی ل پارێزگه‌ها دهۆكێ‌ ڤه‌ببیت، كو دیسان ل سه‌ر بودجا پارێزگه‌ها دهۆكێ‌ كوژمێ‌ ( 4) ملیار دینار بۆ ئاڤاهی و (5) ملیون دولار بو كرینا ئامیره‌ و كه‌ل و په‌لێن پزیشكی بۆ هاتینه‌ ته‌رخانكرن و تێدا هه‌موو خزمه‌تێن پێدڤی ب پشته‌ڤانیا نوژدارێن ئیتالی دێ‌ لێ‌ هێنه‌ پێشكێشكرن و بریار ئه‌وه‌ ل ده‌ستپێكا سالا 2011 بكه‌ڤیته‌ دخزمه‌تا وه‌لاتیان دا.