كونفرانسێ شهشێ (6) یێ رێڤهبهریا گشتی یا ساخلهمیا پارێزگهها دهۆكێ هاته گێران
ل دهمژمێر 9,30ێ سپێدههیا رۆژا پێنجشهمبی رێكهفتی (4/2/2010) و ل هۆلا رێڤهبهریا گشتی یا ساخلهمیا پارێزگهها دهوكێ، و ل ژێر درووشمێ ( ئارمانجا مه خزمهتكرنا وهلاتیانه) كو ل سهر وێنێ كومهكا نوژدار و كارمهندێن ساخلهمیێ و ئهندازیاری هاتبوو هلاویستن، كونفرانسێ شهشێ (6) یێ رێڤهبهریا گشتی یا ساخلهمیا پارێزگهها دهۆكێ هاته گێران.
د.تاهر ههورامی، وهزیرێ ساخلهمیێ ل حكومهتا ههرێما كوردستانێ ب شاندهكێ رێڤهبهریا گشتی یا ساخلهمیا پارێزگهها سلێمانیێ ژ كهسێن پێشین بوون كو بهرههڤی كونفرانسی بووین.
ب نوونهریا پارێزگهرێ دهۆكێ ژی (د.فازل عومهر) سهرۆكێ جڤاتا پارێزگههێ ئامادهببوو, و بهرێز ( سهربهست لهزگین) بهرپرسێ لقێ ئێكێ پارتی دیموكراتی كوردستان ب ههڤالینیا چهند بهرپرسیارێن لیژنهیێن ناڤخوی ژی بهرههڤی رێ و رهسمێن كونفرانسی بوو و دیسان ژ مێڤانێن كونفرانسی (ماجد سهید سالح) قایمقامێ قهزا دهۆكێ و چهندین رێڤهبهرێن دام و دهزگایێن حزبی و حكومی ئامادهبوون.
دگهل ڤێ چهندێ ژی چهندین ریه سپی و خودانێن كومپانیێن بازرگانی ژی پشكداری كونفرانسی بوون.
پشتی رێزگرتن بۆ گیانێ شههیدێن ئێكێ شواتێ و تهڤایا شههیدێن كوردستانێ و سهروهرێ وان (بارزانیێ نهمر) دهقیقهكا رێزگرتنێ بێ دهنگ ماین.
د. تاهر ههورامی، وهزیرێ ساخلهمیێ ئێكهم پهیڤا كونفرانسی ب پیروزباهیێ ل رێڤهبهریا گشتی یا ساخلهمیا پارێزگهها دهۆكێ پێشكێشكر و تێدا خوشحالیا خو ب ئهنجامدانا ڤان جوره كونفرانسان دهربری.
د. فازل عومهر، ب نوونهریا پارێزگهرێ دهۆكێ پهیڤهك خواند و تێدا خزمهتێن ساخلهمیێ دوارێن جودا جودا یێن ژیانێ دا گرێدای رهوشا نهو یا ههرێما كوردستانێ كرن و خواست كو پێشنیازێن كونفرانسی ب گرنگی ژلایێ لایهنێن پهیوهندیدار بهێنه پهیرهوكرن.
پاشان پێداچوونا گرنگترین كار وچالاكیێن رێڤهبهریا گشتی یا ساخلهمیا پارێزگهها دهوكێ ژلایێ (د. عهبدوللا سهعید عهبدوللا) هاته كرن و تێدا رێڤهبهرێ گشتی یێ ساخلهمیا پارێزگهها دهۆكێ كوتیهك ل دور گرنگترین پرۆژه و پلانێن داهاتی یێن ساخلهمیا دهۆكێ دانه خویاكرن.
د. عهبدوللا سهعید دیاركر كو ل سالا 2009ێ 114 ملیار دینار بۆ رێڤهبهریا گشتی هاتینه مهزاختن و ژوان ب رێژا 43% بۆ مووچهیان بووینه و سهبارهت گرنگترین پرۆژهیان ژی رێڤهبهرێ گشتی دیاركر كو نهخوشخانهیهكا 100 تهختی ل قهزا ئاكرێ هاتبوو ڤهكرن و سهنتهرێ چاندنا گولچیسكان ل سهنتهرێ باژێرێ دهوكێ و پشكا تهنگاڤیان ل نهخوشخانا زاخو یا گشتی و ب دههان پرۆژهیێن دیتر و ب دههان پرۆژهیان ژی ل ژێر جێبهجێكرنێ نه.
د كونگرهیهكێ رۆژنامهڤانی دا ژی كو دگهل بهرێزان(وهزیرێ ساخلهمیێ و رێڤهبهرێ گشتیێ ساخلهمیا پارێزگهها دهۆكێ و رێڤهبهرێ پشكا پلاندانانێ و رێڤهبهرێ نهخوشخانا ئازادی یا فێركرنێ) هاته بهستن، بهرێزان دیاركر كو ئارمانج ژ گێرانا ڤان كونفرانسان ئهوه كو ههر تشتهك ب روونی بهێنه دیاركرن و وهلاتی ههر تشتهكی بزانن و بزانن كا ئهو هاریكاریا دگهل دهزگههێن ساخلهمیێ دهێته كرن د ژ بیاڤ دا دهێته مهزاختن.
پاشان كونگرهی ب دو تهوهرێن سهرهكی ل دور چارهسهری و خوپاراستنێ بهردهوامی ب كارێن خو دا و چهندین تایبهتمهندێن وارێ پزیشكی و ساخلهمیێ بابهت تێدا پێشكێشكرن.
ل دووماهیێ ژی بهرێزان (د. تاهر ههورامی) وهزیرێ ساخلهمیێ و (د. عهبدوللا سهعید عهبدوللا) رێڤهبهرێ شگتیێ ساخلهمیا پارێزگهها دهوكێ سوپاسیا بهرههڤبوویان كر كو ئامادهی كونفرانس بووین.