شانده‌كێ نوشدارێن ئه‌مریكی گه‌هشته نه‌خوشخانا ئازادی یا فێركرنێ ل دهۆكێ
هاتیه بلاڤکرن روژا دوو شه‌مبێ, 29 ئادار 2010 - 11:31am
ئه‌ڤرۆ 29/3/2010 شانده‌كێ نوشدارێن ئه‌مریكی ب سه‌رپه‌رشتیا پروفیسور دكتور غازی زێباری گه‌هشته رێڤه‌به‌ریا نه‌خوشخانا ئازادی یا فێركرنێ و ژلایێ د. عه‌بدوللا سه‌عید عه‌بدوللا رێڤه‌به‌رێ گشتیێ ساخله‌میا پارێزگه‌ها دهۆكێ و رێڤه‌به‌رێ نه‌خۆشخانا ئازادی یا فێركرنێ و چه‌ند نوژداران هاتنه پێشوازیكرن.
د. عه‌بدوللا سه‌عید عه‌بدوللا دیاركر كو ئارمانج ژ هاتنا شاندێ ناڤبری ئه‌وه كو راببن ب ئه‌نجامدانا چه‌ند نشته‌رگه‌ریێن جودا جودا دا ژوانژی چه‌ند نشته‌رگه‌ریێن په‌نجه‌شێرێ و چاندنا گولچیسكان.
دیسان د. عه‌بدوللا سه‌عید گوت: ئه‌ڤ شانده دێ بۆ ده‌مێ حه‌فتیه‌كێ ل پارێزگه‌ها دهۆكێ مینیت و تێدا دو رۆژان دێ سه‌ره‌دانا نه‌خوشخانا گولان یا گشتی ل ئاكرێ كه‌ن هه‌ر ژبو وێ مه‌ره‌مێ و گوت: بریاره هنده‌ك نوشدارێن كو دگه‌ل هێزێن ئه‌مریكی كاردكه‌ن ژی بگه‌هنه پارێزگه‌ها دهوكێ و حه‌فت نوژدار ژی ژ پارێزگه‌ها سلێمانیێ دێ گه‌هنه پارێزگه‌ها دهۆكێ داكو پشكداریێ دگه‌ل وان بكه‌ن.
ل دووماهیێ ژی دیاركر كو تیمێ ناڤبری كومه‌كا پێدڤیێن نشته‌رگه‌ریان ژی دگه‌ل خۆ ئیناینه.
ئه‌ڤ مالپه‌ره فرێکه
