حه‌فتیا ساخله‌میا جیهانی ب چه‌ند چالاكیان هاته‌ گێران

ئه‌ڤرۆ 11/4/2010 ب چاڤدێریا به‌رێز پارێزگه‌رێ‌ دهۆكێ‌ و ب ئاماده‌بوونا (د.فازل عومه‌ر) نوونه‌ریًَ پارێزگاری و (ماجد سه‌ید سالح) قایمقامێ‌ قه‌زا دهۆكێ‌ و نوونه‌رێ‌ لقێ‌ ئێكێ‌ پارتی و چه‌ند رێڤه‌به‌رێن دام و ده‌زگایێن حزبی و حكومی و ب سپونسه‌ریا كومه‌لگه‌ها مازی ل دهوكێ‌ و ل باخچه‌یێ، درێم ستی حه‌فتیا ساخله‌میا جیهانی ب چه‌ند چالاكیان ده‌ستپێكر.
پشتی راوه‌ستیان ده‌قیقه‌كێ‌ بۆ گیانێ‌ شه‌هیدان، په‌یڤا پارێزگه‌ها دهۆكێ‌ ژلایێ‌ (د. فازل عومه‌ر) هاته‌ خواندن و تێدا دیاركر كو ساخله‌میێ‌ به‌رامبه‌ر نه‌ساخیێ‌ گه‌له‌ك به‌هایێ‌ خو هه‌یه‌ و گوت: نوكه‌ هه‌ولدان دهێنه‌ كرن كو هه‌ر ژ ده‌ستپێكێ‌ مرۆڤه‌كێ‌ ساخله‌م بهێته‌ ئاڤاكرن و ئه‌و ده‌م نه‌مایه‌ كو نوژدار بتنێ‌ ده‌رمانان بنڤیسیت و نشته‌رگه‌ریان بكه‌ت، به‌لكو هشیاری و ره‌وشه‌نبیریا ساخله‌میێ‌ ژی رۆلێ‌ خۆ هه‌یه‌.
د دووڤدا په‌یڤا رێڤه‌به‌ریا گشتی یا ساخله‌میا پارێزگه‌ها دهۆكێ‌ ژلایێ‌ ( د.عه‌بدوللا سه‌عید عه‌بدوللا) هاته‌ خواندن و تێدا خویاكر كو ئارمانج ژ گێرانا ڤێ‌ حه‌فتیێ‌ ئه‌وه‌ ئه‌م نیشا خه‌لكی بده‌ین كو گرنگیێ‌ ب ده‌وروبه‌رێن خو بده‌ن و گوت: نوكه‌ دورێن 50% ژ خه‌لكی ل باژێران دژین و پێشبینی دهێته‌ كرن ئه‌ڤ رێژه‌یه‌ ل سالێن بهێت بگه‌هیته‌ 90% كو ئه‌ڤێ‌ دێ‌ ره‌نگڤه‌دانێن خو ل سه‌ر ساخله‌میێ‌ هه‌بن.
پاشی په‌یڤێن ( ده‌زگه‌هێ‌ خانی یێ‌ ره‌وشه‌نبیری و راگه‌هاندنێ‌، سه‌رۆكاتیا باژێرڤانیا دهۆكێ‌، هێزا پاراستنا ژینگه‌هێ‌) هاتنه‌ خواندن و تێدا ته‌كه‌ز كر كو پێدڤیه‌ گرنگی ب ره‌وشه‌نبیری و راگه‌هاندنا ساخله‌میێ‌ و پاقژراگرتنا باژێری و سه‌ره‌ده‌ریه‌كا باش و ساخله‌م ل سه‌ر ژینگه‌هێ‌ و دناڤ باژێری دا بهێته‌ كرن.
ل دووماهیێ‌ چه‌ند چالاكی ژلایێ‌ قوتابیێن قوتابخانا سه‌رۆك هاتنه‌ كرن كو تێدا چه‌ند دیمه‌نێن شاش و چه‌ندێن راست هاتنه‌ به‌راوردكرن و پاشان ژلایێ‌ كومه‌لگه‌ها مازی دیاری ل سه‌ر وان قوتابیێن چالاكی ئه‌نجام داین هاتنه‌ به‌لاڤكرن و دگه‌لدا دیاریه‌كا تایبه‌ت هاته‌ پێشكێشكرن بۆ رێڤه‌به‌ریا گشتی یا ساخله‌میا پارێزگه‌ها دهۆكێ.