ژبۆ گه‌نگه‌شه‌كرنا چه‌ند ته‌وه‌رێن ساخله‌میێ كومبوونه‌كا به‌رفره‌ه هاته به‌ستن
هاتیه بلاڤکرن روژا پێنج شه‌مبێ, 1 تیرمه‌هـ 2010 - 12:44pm
ب ئاماده‌بوونا د. عه‌بدوللا سه‌عید عه‌بدوللا، رێڤه‌به‌رێ گشتیێ ساخله‌میا پارێزگه‌ها دهۆكێ دوهی 30/6/2010 و ل ده‌مژمێر 12،30 نیڤرۆ، كومبوونه‌كا به‌رفره‌ه ل هولا رێڤه‌به‌ریا گشتی هاته به‌ستن.
دڤێ كومبوونێ دا راگرێن كولیژێن پزیشكی و ده‌رمانسازی و په‌رستاری زێده‌باری نوونه‌رێن سه‌ندیكایێن نوژداران و ده‌رمانسازان و ددانان دگه‌ل رێڤه‌به‌رێن پشكێن رێڤه‌به‌ریا گشتی یا ساخله‌میا پارێزگه‌ها دهۆكێ و رێڤه‌به‌رێن نه‌خوشخانا و كه‌رتێن ساخله‌میێ و چه‌ند نوژدارێن تایبه‌تمه‌ند ئاماده‌ببون.
ل ده‌ستپێكێ د. عه‌بدوللا سه‌عید عه‌بدوللا روناهیه‌ك دا ل سه‌ر ئه‌نجامێن شاندێ وه‌زاره‌تا ساخله‌میێ ب سه‌روكاتیا د. تاهر هه‌ورامی وه‌زیرێ ساخله‌میێ بۆ وه‌لاتێ ئوردن و دیاركر كو ئه‌نجامێن سه‌ره‌دانێ گه‌له‌ك دباش بوون و خالێن هاتینه به‌حسكرن و ئه‌و پروتوكولێن دناڤبه‌را وه‌زاره‌تا ساخله‌میا هه‌رێمێ و یا وه‌لاتێ ئوردن دا دیاركرن.
پاش رێڤه‌به‌رێ گشتی بۆ ئاماده‌بوویان دیاركر كو بریار ئه‌وه ل هه‌تیڤا دو یا سالا 2011 كونگره‌یه‌كێ به‌رفره‌ه ل دور پێشڤه‌برنا ره‌وشا ساخله‌میا هه‌رێمێ بهێته گرێدان و دیاركر كو جه‌نابێ وی وه‌ك سه‌رپه‌رشتێ گشتیێ ڤی كونگره‌ی هاتیه هه‌لبژارتن و داخواز ژ ئاماده‌بوویان كر كو پێشنیار و ڤه‌كولینێن خۆ ئاماده‌بكه‌ن بۆ كونگرێ ناڤبری، هه‌روه‌سان دیاركر كو ئه‌ڤ كونرگره دێ ( ئابوریێن ساخله‌میێ و كارگێریا ساخله‌میێ و مه‌زاختنێن كه‌رتێ ساخله‌میێ، زێده‌باری چه‌ندین ته‌وه‌رێ، دی یێ، گرێدای سیسته‌مێ ساخله‌میێ ل هه‌رێما كوردستانێ) بخوڤه‌گریت .
دووڤدا د. سه‌روه‌ر سادق به‌هائه‌دین رێڤه‌به‌رێ پشكا پلاندانانێ ل دور بابه‌تێ ژمێریایێن نیشتمانی یێن كه‌رتێ ساخله‌میێ ئاخفت و دیاركر كو نوكه وه‌زاره‌تا ساخله‌میا به‌غدا ل به‌ره ب چه‌ند ڤه‌كولینان دڤی بیاڤی دا راببیت دا بزانیت كا سالانه چه‌ند مه‌زاختن ل كه‌رتێ ساخله‌میێ دهێنه كرن و خواست كو ئاماده‌بووی هه‌ر ئێك ل جهێ خو راپورته‌كێ دڤی بیاڤی دا ئاماده‌بكه‌ت.
ل دووماهیا كومبوونێ ئاماده‌بوویان ب پرسیار و پێشنیارێن خۆ پشكداری د كومبوونێ دا كر و به‌رسڤێن وان هاتنه دان.و بریاره پشتی دو حه‌فتیێن دی كومبوونه‌كا به‌رفره‌هتر ل دۆر بابه‌تێ كونگره‌ی بهێته گرێدان.
راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ
ئه‌ڤ مالپه‌ره فرێکه
