دهۆك پێشوازیێ ل كونفرانسێ نهخۆشیێن ڤهگرێن ژێدهرێ وان ئاژهلی دكهت
حهمزه رهزیكی:
ل ژێر درووشمێ ( دا پێكڤه كاربكهین بۆ كونترولكرن و دانانا سنورهكی بۆ نهخوشیێن ژێدهرێ وان ئاژهلی) و ب ئامادهبوونا بهرێزان ( د.فازل عمر) سهرۆكێ جڤاتا پارێزگهها دهۆكێ و ( ماج سهید صالح) قایمقامێ قهزا دهۆكێ و(د. عهبدوللا سهعید عهبدوللا) رێڤهبهرێ گشتیێ ساخلهمیا پارێزگهها دهۆكێ و ژمارهیهكا بهرپرسێن وهزارهتا ساخلهمیا بهغدا و راگرێن گولیژهیان و نوونهرێن كولیژێن چاندن و ڤیتهرنهریێ و خواندنا بلند، ل رۆژا 2/8/2010 و ل دهمژمێر (9)ێ سپێدێ و ل هۆلا ئوتێلا ژیان كونفرانسێ ناڤبری ب خواندنا چهند ئایهتێن قورئانا پیروز و راوهستیان دهقیقهكێ بۆ گیانێ شههیدان دهستپێكر.
ل پێشیێ پهیڤا وهزارهتا ساخلهمیا عیراقا فیدرال ژلایێ د. ئیحسان جهعفهر، رێڤهبهرێ فهرمانگهها كونترولكرنا نهخۆشیێن ڤهگر ل وهزارهتا ساخلهمیا عیراقا فیدرال هاته خواندن و تێدا دیاركر كو پشكهكا نهخوشیان ههیه كو ژ گیانهوهران بۆ مرۆڤان دهێنه ڤهگوهاستن، نوكه ههموو وهلات و ب تایبهت رێكخراوا ساخلهمیا جیهانی گهلهك گرنگیێ ددهنێ چونكه ههتا ئهگهر بهێنه كونترولكرن ژی دوباره ڤهدگهرنهڤه ژوانژی نهخوشیێن ئهنتراكس و كیسكێن ئاڤێ و ریبیس و لشمانیا و ...هتد و گوت: ههتا نوكه ل عیراقێ مه ئاریشهیهكا مهزن ههیه چونكه گهلهك جه ل عیراقێ ههنه كو نوكه كاودانێن ژینگههێ لێ تیكچووینه و ئهم د ئارام نینین كو ئهڤ نهخوشیه لێ بهلاڤ نهبن،
پاشی پهیڤا د.عهبدوللا سهعید عهبدوللا، رێڤهبهرێ گشتیێ ساخلهمیا پارێزگهها دهۆكێ هاته خواندن و دیاركر مهترسیا ڤان نهخۆشیان دوێ چهندێ دایه كو كارتێكرنێ ل ساخلهمیا مرۆڤی دكهن و دیسان كارتێكرنێ ل سامانێ ئاژهلی و ژێدهرێن خوارنا مرۆڤی دكهن و دژواری و مهترسیا وان ل سالێن بوری زێدهبوویه ژبهركو داخوازی ل سهر خوارنێن ئاژهلی زێدهبوویه و وهرارهكا مهزن كهتیه ناڤا خهلكی بهرامبهر وێ چهندێ سامانێ ئاژهلی ئهو وهرار بخوڤه نهدیتیه و دیسان ژبهركو زێده هاتن و چوونا ئاژهلان دناڤبهرا وهلات و كیشوهران دا ههیه و گوهورین كهتیه شێوازێن چهراندن و ب خودانكرنا ئاژهلان و ژینگهها وان و گوت ژی: سهرهرای ل ڤێ دووماهیێ كونترولهكا باش ل سهر ڤان نهخوشیان هاتیه كرن، بهلێ هێشتا ئهڤ نهخوشیه ئهگهرێ سهرهكیێ مرنێ نه ل وهلاتێ عیراقێ.
رێڤهبهرێ گشتیێ ساخلهمیا پارێزگهها دهۆكێ دیاركر كو ل دهۆكێ گهلهك ژ ئارمانجێن خۆ دوارێ كونترولكرنا نهخوشیێن ڤهگر دناڤبهرا مرۆڤ و ئاژهلان دا بجهئیناینه و ژ سالا 2006ێ وهره تانوكه چ حالهتێن نهخوشیا مهلاریێ نههاتینه توماركرن و كێمترین رێژا تووشبونێ ب نهخوشیا كولێرایێ هاتیه توماركرن و ژ سالا 1996ێ وهره چ حالهتێن نهخوشیا فالنجا زارۆیان نههاتینه توماركرن و دهربارهی نهخوشیا سوركان ژی دهوكێ كێمترین حالهت ههبووینه و گوت: دوارێ نهخوشیێن ههڤپشك دا ژی ل سالا 2008ێ رادهیهك بۆ نهخوشیا كولكا سوتنێ هاته دانان و بتنێ 42 حالهت ل دهڤهرا ئاكرێ هاتنه توماركرن و ل سالا 2009ێ بتنێ 3 حالهت ل دهڤهرا بهردهرهش هاتنه توماركرن.
د. سومهیا بهدری حهسهن، رێڤهبهرا هوبا لشمانیا و نهخۆشیێن ههڤپشك، پهیڤهك پێشكێشكر و تێدا دیاركر كو هوبا نهخوشیێن ههڤپشك و ژێدهرێ وان ئاژهلی ل سالا 1970ێ وهره هاتیه دانان و ژ هینگی وهره كاردكهت بۆ كونترولكرن و پاراستنا وهلاتیان ژ نهخوشیێن ڤهگر و سالانه پلانهك دڤی بیاڤی دا ههیه و ل ههموو پارێزگههێن عیراقێ دهێته بجهئینان، ههروهسا دیاركر ههردهمێ پهژیهك پهیداببیت ئهو پلانێن راستهوخو ددانن و ب ههڤكاریا ههموو لایهنان دهست ب حهئیناناوێ دكهن و وان لیژنهیێن فرعی ل ههموو پارێزگههان داناینه و ههڤكاری دناڤبهرا وهزارهتێن پهیوهندیدار ( چاندن، ناڤخو، ژینگهه، باژێرڤانی) یا بهردهوامه و ههیڤانه ژی كومبوون و ڤهكولینێن ههڤپشك دناڤبهرا واندا ههنه و گوت: ماندیبوونهكا مهزن دڤێت ههتا بشێن نهخوشیێن كو ژێدهرێ وان ئاژهل بن كونترول بكهن و ههكه ههڤكاری نهبیت كار ب زهحمهت دكهڤیت.
ل دووماهیا رێ و رهسمان ژی چهند دیاری ل سهر ئالیێن پشكدار دڤی كونفرانسیدا هاتنه بهلاڤكرن و بریار ئهوه ئهڤ كونفرانسه ب چهند راسپارده و رێنمایان ل رۆژا 3/8/2010 دووماهیێ ب كارێن خۆ بینیت.
حهمزه رهزیكی: