حكومه‌تا هه‌رێمێ دێ پشته‌ڤانیه‌كا به‌رده‌وام بۆ كه‌رتێ ساخله‌میا شێخان كه‌ت
هاتیه بلاڤکرن روژا سێ شه‌مبێ, 10 ته‌باخ 2010 - 8:54am
ژبه‌ركو هاریكاریێن ساخله‌میا پارێزگه‌ها مووسل وه‌كو پێدڤی ناگه‌هنه ده‌ڤه‌رێن كوردنشین ل سنورێ مادێ 140 و ئه‌ڤه بوویه ئه‌گه‌رێ په‌یدابوونا كێماسیان دگه‌له‌ك بیاڤان دا، دوهی 8/8/2010 د. تاهر هه‌ورامی وه‌زیرێ ساخله‌میێ ل حكومه‌تا هه‌رێما كوردستانێ ب سه‌روكاتیا شانده‌كی و ب هه‌ڤالینیا( د. عه‌بدوللا سه‌عید عه‌بدوللا) رێڤه‌به‌رێ گشتیێ ساخله‌میا پارێزگه‌ها دهۆكێ سه‌ره‌دانا ده‌ڤه‌را شێخان كر.
د كومبوونه‌كێ دا دگه‌ل ئالیێن ساخله‌میێ ل ده‌ڤه‌رێ، شه‌عبان خه‌لیل قایمقامێ قه‌زا شێخان ب وه‌كاله‌ت دیاركر كو چ گرنگی ژلایێ ساخله‌میا مووسل ب ساخله‌میا شێخان ناهێته دان و گوت: نه‌خوشخانا شێخان یا سالێن حه‌فنێیانه و چ پشكێن ته‌نگاڤیان و هولێن نشته‌رگه‌ریێ وه‌كو پێدڤی لێ نینن و خواست كو كارێن نووژه‌نكرنێ لێ بهێنه ئه‌نجامدان و ژماره‌كا بنگه‌هێن ساخله‌میێ ل ده‌ڤه‌رێ بهێنه ئاڤاكرن.
د. تاهر هه‌ورامی وه‌زیرێ ساخله‌میێ دیاركر كو ب شیانێن حكومه‌تا هه‌رێما كوردستانێ ئه‌و دێ ل رۆژێن بهێت ب هاریكاریا رێڤه‌به‌ریا گشتی یا ساخله‌میا پارێزگه‌ها دهۆكێ دێ ڤه‌دیتنه‌كێ ل سه‌ر نه‌خوشخانێ ئه‌نجام ده‌ن بۆ كارێن به‌رفره‌هكرن و نووژه‌نكرنا نه‌خوشخانا ناڤبری و گوت: ئامیره‌یێن پێدڤی بۆ ژیانا نه‌خوشان یا رۆژانه ژی دێ هێنه دابینكرن و بۆ هه‌ر چه‌ند گوندێن پێدڤی بنگه‌هێن ساخله‌میێ ل دووڤ پلانه‌كێ دێ هێنه ئاڤاكرن.
ژلایێ خۆ ڤه د. عه‌بدوللا سه‌عید عه‌بدوللا رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو رێڤه‌به‌ریا ناڤبری ب پشته‌ڤانیا حكومه‌تا هه‌رێما كوردستانێ هاریكاریه‌كا به‌رچاڤ پێشكێشی ده‌ڤه‌رێن ( ته‌لعفه‌ر و زومار و شنگار و شێخان) كریه و گوت: ب گوژمێ پتر ژ 101 ملیون دیناران ئاڤاهی هاتینه ئاڤاكرن و ب بهایێ ( 92,237,000) دیناران ئامیرێن پزیشكی بۆ ڤان ده‌ڤه‌ران كرینه و دیسان ب گوژمێ نێزیكی 247 ملیون دیناران ئه‌وان ده‌رمان و كه‌ل و په‌لێن پزیشكی دابینكرینه، دگه‌ل ڤێ چه‌ندێ چه‌ندین جاران پشته‌ڤانیا دارایی دایه ده‌زگه‌هێن ساخله‌میێ ل ده‌ڤه‌رێن ناڤبری كو هه‌تا نوكه پتر ژ 137 ملیون دیناران پێشكێشی وان كرین، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر ژی كو 7 ترومبێل وه‌كو هاریكاری داینه ده‌ڤه‌رێن ناڤبری و هه‌تا نوكه پتر ژ 50 فه‌رمانبه‌ران ژی ل سه‌ر میلاكێ رێڤه‌به‌ریا گشتی یا ساخله‌میا پارێزگه‌ها دهوكێ خزمه‌تێ ل وان ده‌ڤه‌ران پێشكێش دكه‌ن و گوتژی كو ئه‌ڤ هاریكاریه دێ د به‌رده‌وام بن و هندی دشیان دابیت دێ خزمه‌تا ده‌ڤه‌رێن ناڤبری هێته كرن.
ئه‌ڤ مالپه‌ره فرێکه
