ئێدی نه‌خۆشێن هه‌رێمێ بێی ڤیزه دێ ل وه‌لاتێ ئوردن هێنه پێشوازیكرن
هاتیه بلاڤکرن روژا دوو شه‌مبێ, 20 ئه‌یلول 2010 - 9:07am
ل رۆژا 18/9/2010 و ل ده‌مژمێر 10ێ سپێدێ و ل ئوتێلا ژیان ل دهۆكێ و ب ئاماده‌بوونا به‌رێزان د.نائف هائل الفایز وه‌زیرێ ساخله‌میێ وه‌لاتێ ئوردن و شانده‌كێ بلندێ وه‌زاره‌تا ناڤهاتی و به‌رێزان (د.تاهر هه‌ورامی) وه‌زیرێ ساخله‌میێ ل هه‌رێما كوردستانێ و د. عه‌بدوللا سه‌عید عه‌بدوللا رێڤه‌به‌رێ گشتیێ ساخله‌میا پارێزگه‌ها دهۆكێ، پروتوكوله‌كا پێكهاتی ژ 12 خالان د ناڤبه‌را هه‌ردو وه‌زاره‌تێن ساخله‌میێ ( ئوردن و هه‌رێما كوردستانێ) دبیاڤێ چاره‌سه‌ریا نه‌خوشان و پێشڤه‌برنا ره‌وشا ساخله‌میێ ب گشتی هاته ئیمزاكرن.
د.نائف هائل الفایز، وه‌زیرێ ساخله‌میا وه‌لاتێ ئوردنێ ته‌كه‌ز ل وێ چه‌ندێ كر كو هه‌ر ئێكسه‌ر دێ ده‌ست ب بجهئینانا به‌ندێن پروتوكولا ناڤبری هێته كرن و گوت: هه‌ڤكاریا مه دگه‌ل هه‌رێما كوردستانێ د هه‌موو وارێن ساخله‌میێ دا دێ پێنگاڤه‌كا باش بیت، دیاركر ژی كو به‌ندێن پروتوكولێ د پێكهاتینه ژ پێشكێشكرنا خزمه‌تێن ساخله‌میا ده‌ستپێكێ و شاندنا نوژدارێن تایبه‌تمه‌ند بۆ هه‌رێمێ ل دووڤ پێدڤیا وان و وه‌رگرتنا قوتابیێن خواندنا بلند و ڤه‌كرنا خولێن مه‌شقدانێ د بیاڤێن ( پزیشكی، په‌رستاری، ئه‌ندازه‌ی، كارگێری و ..هتد).
د. فائز ئه‌وژی گوت كو پشتی دو هه‌یڤێن دی قونسلخانه‌یا ئوردنێ ل هه‌ولێرا پایته‌خت دێ هێته ڤه‌كرن و پشكه‌كا تایبه‌ت یا ساخله‌میێ دێ دناڤدا هێته دانان ژبۆ ب ساناهیكرنا پێشكێشكرنا ده‌ستێ هاریكاریێ بۆ نه‌خۆشێن هه‌رێمێ و دیاركر كو ئێدی هه‌ر نه‌خۆشه‌ك دشێت بێی ڤیزه بچیته دناڤ ئاخا وه‌لاتێ ئوردنێ دا بۆ چاره‌سه‌ریێ و ب هه‌مان سره‌ره‌ده‌ریا وه‌لاتیێ ئوردنی دێ ره‌فتار دگه‌ل هێته كرن و گوتژی ل نێزیك ئه‌و دێ ده‌ست ب ئاڤاكرنا نه‌خوشخانه‌یه‌كا گشتی ل هه‌ولێرێ كه‌ن و پشكه‌كا تایبه‌ت یا كارگه‌هێن ده‌رمانان ل وه‌لاتێ ئوردن ژی دێ لێ هێته ڤه‌كرن.
د.تاهر هه‌ورامی، وه‌زیرێ ساخله‌میا هه‌رێما كوردستانێ زێده‌باری خالێن ل سه‌ری دیاركری خویاكر كو ئه‌ڤ پروتوله دێ ده‌رگه‌هه‌ك بیت بۆ پشته‌ڤانیا كه‌رتێ ساخله‌میێ و گوت: بڕیار ئه‌وه ل هه‌یڤا شواتا 2011 كونفرانسێ گوهۆرینا سیسته‌مێ ساخله‌میێ ل هه‌رێما كوردستانێ ده‌ستپێ بكه‌ت و وه‌لاتێ ئوردنێ دێ ئاماده‌باشیه‌كا باش هه‌بیت كو مفای ل یاسا و رێنمایێن سیسته‌مێ وان وه‌ربگرین.
پاشی شاندێ ناڤبری سه‌ره‌دانا سه‌نته‌رێ ساخله‌میا ده‌روونی كرن و پێشوازیه‌كا گه‌رم ژلایێ به‌رپرس و كارمه‌ندێن سه‌نته‌ری لێ هاته كرن و گه‌ریانه‌ك دناڤ پشكێن سه‌نته‌ری دا هاته كرن و شاندێ پێخوشحالیا خۆ ده‌ربری كو پارێزگه‌ها دهۆكێ شیایه خزمه‌تێن ساخله‌میا ده‌روونی ب شێوه‌یه‌كێ باش و سه‌ركه‌فتی پێشكێشی نه‌خوشێن ده‌روونی بكه‌ت.
_ ل ده‌مژمێر 10,30ێ سپێدێ شاندێ ناڤهاتی سه‌ره‌دانا رێڤه‌به‌ریا گشتی یا ساخله‌میا پارێزگه‌ها دهۆكێ كرن و ژلایێ به‌رێز (د. عه‌بدوللا سه‌عید عه‌بدوللا) رێڤه‌به‌رێ گشتیێ ساخله‌میا پارێزگه‌ها دهۆكێ و هه‌موو رێڤه‌به‌رێن ساخله‌میێ ل قه‌زایێن دهۆكێ و كه‌رتێن ساخله‌میێ و نه‌خوشخانه‌یان پێشوازی لێ هاته كرن.
د روونشتنه‌كێدا رێڤه‌به‌رێ گشتیێ ساخله‌میا پارێزگه‌ها دهۆكێ ره‌وشا ساخله‌میا پارێزگه‌ها دهۆكێ ژلایێ پێشكێشكرنا خزمه‌تان بۆ نه‌خوشان و ئالیێ خوپاراستنێ ب درێژاهی بۆ شاندی شروڤه‌كر و هه‌ردو به‌رێزان وه‌زیرێ ساخله‌میا وه‌لاتێ ئوردن و هه‌رێما كوردستانێ ژی پێخوشحالیا خۆ ده‌ربرین كو پارێزگه‌ها دهۆكێ بوویه ئێك ژ پارێزگه‌هێن پێشكه‌فتی ژلایێ پێَشكێشكرنا خزمه‌تێن ساخله‌میێ ڤه. و پاشی چه‌ند دیاریێن كو ده‌ربرینێ ژ كولتورێ كورده‌واریێ دكه‌ن هاتنه پێشكێشكرن بۆ سه‌رۆك و ئه‌ندامێن شاندی.
شاندێ ناڤهاتی پاشان سه‌ره‌دانا چه‌ند ده‌زگه‌هێن ساخله‌میێ كر وه‌ك ( نه‌خوشخانا ئازادی یا فێركرنێ و سه‌نته‌رێ نشته‌رگه‌ریا دلی كو د قوناغێن دووماهیێ یێن ئاڤاكرنێ دایه و سه‌نته‌رێ زانست یێ نوژداریا خێزانێ و نه‌خوشخانا سوتنێ و نشته‌رگه‌ریێن جوانكاریێ) و ژ نێزیك ل دور ره‌وشا وان ده‌زگه‌هان ئاگه‌هداربوون.
ئه‌ڤ مالپه‌ره فرێکه
