رێڤه‌به‌رێ گشتیێ ساخله‌میا دهۆكێ ژلایێ نڤیسكاریا رۆژنامه‌یا ئه‌ڤرۆ هاته خه‌لاتكرن
هاتیه بلاڤکرن روژا پێنج شه‌مبێ, 20 چریا ئيكى 2011 - 10:18am
ب هه‌لكه‌فتا بوورینا دو سالان ل سه‌ر رۆژانه‌بوونا رۆژنامه‌یا ئه‌ڤرۆ ل دهۆكێ، كارگێری و ده‌سته‌یا نڤیسكاریا رۆژنامه‌یا ناڤهاتی رابوون ب خه‌لاتكرنا ژماره‌یه‌كا نڤیسه‌ر و رێڤه‌به‌رێن كو پشكداری د بهێزئێخستنا ناڤه‌رۆكا رۆژنامه‌یا ناڤبری دا كری، رێڤه‌به‌رێ گشتیێ ساخله‌میا پارێزگه‌ها دهۆكێ د.عه‌بدوللا سه‌عید عه‌بدوللا ئێك ژ وان رێڤه‌به‌ران بوویه.
د.عه‌بدوللا سه‌عید دیاركر كو وه‌رگرتنا خه‌لاتێ رێزلێنانێ ژلایێ رۆژنامه‌یا ئه‌ڤرۆ ڤه پێنگاڤه‌كا باشبوو ژلایێ نڤیسكاریا رۆژنامه‌یا ناڤهاتی هاتیه هاڤێتن و گۆت: سه‌ره‌رای كو كارێ رۆژنامه‌ڤانیێ زێره‌ڤانیا ده‌زگه‌هێن حكوومه‌تێ ب گشتی یه، به‌لێ پێدڤیه هه‌ڤكاری و هاریكاری ژی دناڤبه‌را دام و ده‌زگه‌هێن حكوومه‌تێ و رۆژنامه‌ڤانیێ دا هه‌بیت، و ل ده‌مێن خزمه‌ت دهێته كرن بهێته به‌رچاڤكرن و ده‌مێ كو گازنده ژی هه‌بن، ب شێوه‌یه‌كێ نورمال بگه‌هینن و ئه‌ڤ جورێ هه‌ڤكاریێ ل دووماهیێ دێ د خزمه‌تا وه‌لاتیان بشێوه‌یه‌كێ گشتی دا بیت، و هه‌ر ده‌زگه‌هه‌ك ژی دێ ب كارێ چاره‌كرنا كێماسیان ژلایێ خۆڤه رابیت.
رۆژنامه‌ڤان حه‌مزه ره‌زیكی، سكرتێرێ نڤیسینێ ل رۆژنامه‌یا ئه‌ڤرۆ كو دیسان ب سه‌رپه‌رشتیا پشكا ساخله‌میێ ل رۆژنامه‌یا ناڤهاتی رادبیت بۆ مالپه‌رێ رێڤه‌به‌ریا گشتی یا ساخله‌میا پارێزگه‌ها دهۆكێ دیاركر كو ب پشته‌ڤانیا رێڤه‌به‌رێ گشتی و نوشدار و كارمه‌ندێن ساخله‌میێ ئه‌و شیاینه د پتریا ده‌مان دا پێشه‌نك بن د ڤه‌گوهاستنا په‌یام و چالاكی و بویه‌رێن كو ل ده‌زگه‌هێن ساخله‌میێ روودده‌ن.
حه‌مزه ره‌زیكی دیاركر ژی هه‌ر ب وێ پشته‌ڤانیێ ئه‌و وه‌كو روژنامه‌یا ئه‌ڤرۆ شیاینه ژلایێ زانستی ژی پێزانینێن باش یێن ساخله‌میێ بگه‌هینن خوانده‌ڤانێن خۆ و گۆت: به‌رده‌وامبوونا ڤێ هه‌ڤكاریێ دێ بیته هانده‌ر كو روژنامه‌ڤان و ده‌زگایێن میری پتر د ئێكدو بگه‌هن داكو ب شێوه‌یه‌كێ باشتر خزمه‌ت بهێته كرن
ئه‌ڤ مالپه‌ره فرێکه
