وه‌زاره‌تا ساخله‌میێ 22 ته‌نێن ده‌رمانان بۆ ئاوه‌ره‌یێن كه‌مپا دومیز كرنه دیاری
هاتیه بلاڤکرن روژا سێ شه‌مبێ, 18 ئه‌یلول 2012 - 8:40pm
د.رێكه‌وت حه‌مه ره‌شید وه‌زیرێ ساخله‌میێ ل حكوومه‌تا هه‌رێما كوردستانێ ل گه‌ل د.نزار عصمه‌ت رێڤه‌به‌رێ گشتیێ ساخله‌میا پارێزگه‌ها دهۆكێ ئه‌ڤرۆ 18/9/2012 سه‌ره‌دانا نه‌خوشخانا 200 ته‌ختی و نه‌خوشخانا زارۆبوونێ ل زاخۆ و دیسان گومركا ئیبراهیم خه‌لیل و كه‌مپا مشه‌ختێن رۆژئاڤایێ كوردستانێ ل ده‌ڤه‌را دومیز كرن. د به‌رسڤا پرسیاره‌كێ دا ل دۆر چاوانیا كاركرنا چوار ده‌زگه‌هێن نوو یێن ساخله‌میێ ل پارێزگه‌ها دهۆكێ، د.رێكه‌وت حه‌مه ره‌شید، وه‌زیرێ ساخله‌میێ ل حكوومه‌تا هه‌رێما كوردستانێ دیاركر كو ئه‌و چاڤه‌رێنه پلانه‌كێ بدانین بۆ ب كارخستنا نه‌خوشخانێن (چاڤا و زارۆبوونێ ل دهۆكێ و دیسان نه‌خوشخانا 200 ته‌ختی و یا زارۆبوونێ ل زاخۆ و گۆت: مه رازیبوون یا وه‌رگرتی بۆ 2500 پله‌یێن دامه‌زراندنێ و ئه‌و ب تنێ دێ بۆ نه‌خوشخانێن نوو بیت و دۆرێن 800-1000 پله‌یان دێ بۆ باژێرێ دهۆكێ بن، چونكو ژماره‌یه‌كا زور یا پرۆژه‌یێن ساخله‌میێ ل دهۆكێ هاتینه ئاڤاكرن و بڕیاره د سێ هه‌یڤێن بهێت دا پله‌یێ، دامه‌زراندنێ یێن تایبه‌ت ب وه‌زاره‌تا ساخله‌میێ ب دووماهی بهێن و بكه‌ڤنه دخزمه‌تا وه‌لاتیان دا. وه‌زیرێ ساخله‌میێ، پشتی سه‌ره‌دانا تاقیگه‌هێن نوو یێن پشكنینا كه‌رسته‌یێن بازرگانی یێن ژ توركیا دهێن ل گه‌مركا ئیبراهیم خه‌لیل كری دیاركر كو وان بڕیار دایه گه‌نگه‌شێ ل سه‌ر بكه‌ن و ئامیرێن نوو دابین بكه‌ن داكو ب زووترین ده‌م پشكنین بۆ كه‌رسته‌یان بهێته كرن و كه‌رسته‌یێن كوالیتیا وان یا باش نه‌بیت نه‌هێنه دناڤ هه‌رێما كوردستانێ دا. د سه‌ره‌دانه‌كێ دا بۆ كه‌مپا مشه‌ختێ، رۆژئاڤایێ كوردستانێ ل دومیز، وه‌زیرێ ساخله‌میێ دیاركر كو وان 22 ته‌نێن ده‌رمانان و پێدڤیێن ساخله‌میێ پێشكێشی مشه‌ختیێن وێ كه‌مپێ كرن و گۆت: ئه‌ڤ ده‌رمانه ژلایێ رێڤه‌به‌ریێن گشتی یێ، ساخله‌میێ ل پارێزگه‌هێن ( دهۆك، هه‌ولێر و سلێمانی) هاتینه كۆمكرن و ئه‌و دێ د به‌رده‌وام بن دوارێ ساخله‌میێ دا خزمه‌تا ئاكنجیێن كه‌مپێ ناڤبری بكه‌ن.
ئه‌ڤ مالپه‌ره فرێکه
