ل دهۆكێ ئاماده‌كاری بۆ كونترولكرنا نه‌خۆشیا كولێرایێ دهێنه كرن
هاتیه بلاڤکرن روژا شه‌مبی, 29 ئه‌یلول 2012 - 10:59pm
ژ ئه‌گه‌رێ دیاربوونا هنده‌ك حاله‌تێن نه‌خۆشیا كولێرایێ ل پارێزگه‌ها كه‌ركووكێ، ب سه‌رپه‌رشتیا رێڤه‌به‌رێ گشتیێ ساخله‌میا پارێزگه‌ها دهۆكێ ل رۆژا 29/9/2012 كۆمبوونه‌ك هاته سازكرن وه‌كو خۆئاماده‌كرن بۆ كونترولكرنا نه‌خۆشیا ناڤبری. د.نزار عسمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو ئارمانجا وان ژ كۆمبوونێ پێكئینانا لیژنه‌یه‌كێ بوویه ب سه‌رۆكاتیا پارێزگه‌رێ دهۆكێ و ئه‌ندامه‌تیا چه‌ند رێڤه‌به‌ریێن په‌یوه‌ندیدار ژ بۆ هشیاركرنا جڤاكی و ره‌وشه‌نبیركرنا وه‌لاتیان ل دۆر نه‌خۆشیا ناڤبری و دیسان به‌رهه‌ڤكرنا ده‌رمان و پێدڤیێن نوشداری ل ده‌زگه‌هێن ساخله‌میێ یێن په‌یوه‌ندیدار و دیسان خورتكرنا زێره‌ڤانیا ساخله‌میێ و پتر دووڤچۆنا خوارنگه‌ه و جهێن گه‌شتیاری كر گرنگی ب پاقژیا كه‌سایه‌تی و گشتی بهێته دان. رێڤه‌به‌رێ گشتیێ ساخله‌میا پارێزگه‌ها دهۆكێ دیاركر ژی وان ل به‌ره پتر روومالین ل ده‌ڤه‌رێن سنوری بهێنه كرن و دیسان ل قوتابخانه‌یان ژی ئه‌و ده‌ست ب ره‌وشه‌نبیركرنا قوتابیان بكه‌ن و ب رێیا ئاماده‌كرن و چاپكرنا پۆسته‌ر و لیفلێتان ئه‌و دێ رێیێن خوپاراستنێ ده‌نه خویاكرن. د.نزار عسمه‌ت ل وێ باوه‌رێ نه‌بوو كو ئه‌ڤ نه‌خۆشیه ل دهۆكێ سه‌رهلبده‌ت و گۆت: ل گه‌ل ڤێ چه‌ندێ پێدڤیه هه‌رده‌م پێرابوونێن خوپاراستنێ هه‌بن و ب تایبه‌ت بۆ كه‌مپێن مشه‌ختبوویان ژی مینا كه‌مپا دومیز یا مشه‌ختیێن رۆژئاڤایێ كوردستانێ كو هه‌موو پێرابوون ل وێرێ ژی بهێنه وه‌رگرتن. ل دووماهیا كومبوونێ ژی بریار هاته دانان ل سه‌ر ئاستێ قه‌زایان ژی لیژنه‌یێن به‌رهنگاریێ بهێنه دروستكرن و بڕیاره ئه‌ڤرۆ ئه‌و لیژنه‌ژی كۆم ببن بۆ دارێتنا پلانه‌كا هه‌ڤپشك ژبۆ به‌رهنگاربوونا ڤێ نه‌خۆشیێ.
ئه‌ڤ مالپه‌ره فرێکه
