زێره‌ڤانیا ساخله‌میێ: 12 ته‌نێن ده‌رمان و كه‌لوپه‌لێن خوارنێ ژناڤ دبه‌ت
هاتیه بلاڤکرن روژا جارشه‌مبێ, 10 چریا ئيكى 2012 - 4:39pm
هۆبا زێره‌ڤانیا ساخله‌میا دهۆكێ ژ ناڤبرنا 12 ته‌نێن ده‌رمان و كه‌لوپه‌لێن خوارنێ و ڤه‌خوارنێ راگه‌هاند، به‌رپرسێ هۆبا ناڤبری دیاركر، ده‌رمان و كه‌لوپه‌لێن ناڤبری ب هاریكاریا هۆبا ئابووری یا ئاسایشا شارێ دهۆكێ هاتنه ژناڤبرن.
شوكری سلێمان گۆت: د هه‌ر دو رۆژێن بووریدا ب هاریكارییا هۆبا ئابووریێ یا ئاسایشێ 7 ته‌نێن ده‌رمانێن ماوه بسه‌رڤه‌چوویی برێكا لیژنه‌یه‌كا تایبه‌ت یا هه‌ڤپشك هاتنه ژناڤبرن و دیاركر، ئه‌ڤ ده‌رمانه ب هاریكارییا خودانێن كۆگه‌هێن ده‌رمانا راده‌ستی هۆبا ئابووری یا ئاسایشێ كرینه.
ناڤهاتی زێده‌تر گۆت: ب هه‌مان شێوه 5 ته‌نێن كه‌لوپه‌لێن خوارنێ و ڤه‌خوارنێ كۆ ژ ئالیێ تیمێن زێره‌ڤانییا ساخله‌میێ و ئاسایشێ ڤه دناڤ بازارێ دهۆكێ دا هاتینه ده‌سته‌سه‌ركرن و خویاكر، دوهی د گه‌ل ده‌رمانێن ناڤبری ژناڤبرن.
ژ ئالیه‌كێ دیڤه به‌رپرسێ زێره‌ڤانییا ساخله‌میێ داخواز ژ هه‌موو وه‌لاتییان كر هاریكاربن دگه‌ل تیمێن زێره‌ڤانیێ بۆ دیتنا هه‌ر كه‌رسته‌یه‌كێ ماوه بسه‌رڤه‌چوویی و گۆت: ژ خودانێن جهێن گشتی د خوازین پێگیریێ ب رێنۆمایێن ساخله‌میێ بكه‌ن و به‌رژه‌وه‌ندییا گشتی یا وه‌لاتیان بپارێزن ژ پێخه‌مه‌ت نه به‌ربه‌لاڤبوونا نه‌خۆشییان.
ئه‌ڤ مالپه‌ره فرێکه
