رێڤهبهرێ نهخۆشخانا ئازادی ل دهۆكێ هاته گوهۆرین
د بهردهوامیا گورانكاریێن كهرتێ ساخلهمیێ، دوهی 23/10/2012 ل هۆلا نهخۆشخانا ئازادی یا فێركرنێ رێ و رهسمێن دانانا رێڤهبهرێ نوو بۆ نهخۆشخانێ برێڤهچوون و د.ئهفراسیاب موسا وهك رێڤهبهرێ نهخۆشخانێ هاته دانان. د.نزار عسمهت، رێڤهبهرێ گشتیێ ساخلهمیا پارێزگهها دهۆكێ دیاركر كو ئارمانجا وان ژ گورانكاریان گوهۆرینا سیستهمێ ساخلهمیێ و خزمهتكرنا نهخۆشانه و گۆت: بهری چهندهكێ رێڤهبهرێ نهخۆشخانا ئازادی بوو رێڤهبرنا سهنتهرێ گولچیسكان هاتبوو ڤهگوهاستن و نوشدارهك ب وهكالهت ل جهێ وی هاتبوو دانان و ئهڤرۆ ژی ب گرنگی زانی رێڤهبهرهكێ نوو دهست ب كارببیت. د.عهبدوللا جاسم رێكانی، شیرهتكارێ وهزارهتا ساخلهمیێ كو بۆ دهمهكێ كورت رێڤهبهریا نهخۆشخانا ئازادی ب وهكالهت وهرگرتبوو د پهیڤهكێ دا كار و چالاكی یێن نهخۆشخانێ و ئهركێن ل سهر مللێن كارمهند و نوشداران و چهند خالێن گرێدای رێڤهبهریا كاری دایه خویاكرن و خواست كو رێڤهبهرێ نوو بشێت ب دروستی كارنهمهیا رێڤهبرنا نهخۆشخانێ ب كاربینیت. د.ئهفراسیاب موسا رێڤهبهرێ نوو یێ نهخۆشخانا ئازادی یا فێركرنێ دیاركر كو ئهو دێ كار ل دووڤ سیستهمێ نوو یێ كارگێریێ كهت بۆ هندێ ههموو كارمهندێن نهخۆشخانێ ژ بۆ خزمهتكرنا نهخۆشان كاربكهن و گۆت: ئهم دێ رێ نیشاندهر بین بۆ هندێ مافێن نهخۆش و فهرمانبهران بهێنه پاراستن.