رۆژا جیهانی یا ساخلهمیا قوتابخانهیان ل زاخۆ هاته ساخكرن
هاتیه بلاڤکرن روژا پێنج شهمبێ, 22 چریا دووى 2012 - 12:51pm
ژ بۆ بهلاڤكرنا رهوشهنبیریا ساخلهمیێ دناڤ قوتابخانهیان دا سالانه رۆژا جیهانی یا ساخلهمیا قوتابخانهیان دهێته ساخكرن، دوهی ل قوتابخانا ههڤال یا نموونهی ل زاخۆ و ل ژێر درووشمێ ( ساخلهمیا قوتابخانهیان وهبهرهێنان و ئاڤاكرنه)رێ و رهسمێن ڤێ رۆژێ هاتنه گێران.
ئیحسان تهوفیق محهمهد، رێڤهبهرێ پهروهردا زاخۆ دیاركر كو ساخلهمی رێیا ههره گرنگه بۆ پاراستنا گیانێ مرۆڤان و گۆت: پێدڤیه قوتابی شانازیێ ب ڤێ رۆژێ بكهن و گرنگیێ بدهنه ڤێ رۆژێ و ساخلهمیا خوه ل مال و قوتابخانێ و ژینگههێ ب پارێزن و گرێدانا ڤان ههر سێ فاكتهران دبیته هاندهر مرۆڤ ب ساخلهم بژیت.
د.نورهدین عهبدوللا حهمدی، بهرپرسێ بنگههێ زانین یێ ساخلهمیا قوتابخانهیان دیاركر كو یا گرنگ ئهوه ئێدی درووشمێ مه بهلێ بۆ پاقژیێ بهێته گوهارتن و ببیته (نهخێر بۆ پیسكرنێ) و ساخلهمی و پهروهرده پێكڤه كاربكهن ژبۆ بجهئینانا ڤی درووشمی و گۆت: ههكه ئهم بهرێخوهدانێ ل ئاستێ قوتابیان بكهین دێ بۆ مه دیاربیت كو قوتابیێ ساخلهم تێگههشتنا وی باشتره ژ قوتابیێ نهساخلهم، دیسا ئهڤ رۆژه دهێته ساخكرن ژبهركو قوتابی باشترین ههلگرێن نامهیێن ساخلهمیێ نه بۆ جڤاكی و ب رێیا وان ههموو نامهیێن كو ساخلهمیێ حهزههی بگههینیته خهلكهكی دێ شێت گههینیت.
رۆژا جیهانی یا ساخلهمیا قوتابخانهیان ب ڤهكرنا پێشانگهها شێوهكاری یا دو قوتابیان ب ناڤێن( ئالاو عهبدولجهبار و خهولا عهلی) دهستپێكر و ب چهند سرۆد و شانوگهریان ژلایێ قوتابیان ڤه و دیسا ب خهلاتكرنا قوتابیان ب دووماهی هات