بۆ جارا ئیكێ ل دهۆكێ نشته‌رگه‌ریه‌كا ده‌گمه‌ن بۆ زارۆیه‌كێ پێنج سالی دهێته كرن
هاتیه بلاڤکرن روژا شه‌مبی, 8 کانونا بچیک 2012 - 7:07pm
بۆ جارا ئیكێ ل هه‌رێما كوردستانێ و ل نه‌خۆشخانا ته‌نگاڤیان ل دهۆكێ نشته‌رگه‌ریه‌كا ڤه‌كرنا سه‌ری بۆ نه‌خۆشه‌كێ پێنج سالی هاته كرن، پشتی كو وی نه‌خۆشی ئازارێن خوه ژ دیتنێ دیتین و نه‌شیای ژیانا خوه رۆژانه نورمال ببوورینیت، د.رێبه‌ر سه‌عید كو ب ڤی كاری راببوو دیاركر كو به‌ری نوكه هنده‌ك زارۆ د ژیێ ئێك سالی دا هاتینه نشته‌رگه‌ریكرن به‌لێ گه‌هشتنا زارۆی بۆ پێنج سالیێ تشته‌كێ ده‌گمه‌نه و جارا ئێكێ یه ئه‌و شیاین كاره‌كێ ب ڤی ره‌نگی ئه‌نجام بده‌ن.
ئه‌ڤرۆ، به‌رپه‌رێ ساخله‌میێ:
د.رێبه‌ر سه‌عید سندی، تایبه‌تمه‌ندێ نه‌خۆشیێن مێشكی و كۆما ده‌ماران بۆ رۆژنامه‌یا ئه‌ڤرۆ دیاركر كو دبێژنه ڤێ نه‌خۆشیێ گرتنا ده‌رزێن كلوخكی یا پێش وه‌خت و ئێشه‌كا زكماكی یه و دۆرێن هه‌ر دو هزار ئێكی دگریت و گه‌له‌ك یا ده‌گمه‌ن و كێمه و یا باشتر ئه‌وه ب هه‌بوونا ڤان حاله‌تان نشته‌رگه‌ری به‌ری ژیێ زارۆی بگه‌هیته ساله‌كێ بهێته كرن و گۆت: هه‌كه نه‌هێته كرن دێ كارتێكرنێ ل سه‌ر مێشكی وی كه‌ت و بیردانك و هزرێن وی كێم دبن.
هه‌روه‌سان دیاركر كو ئه‌و نه‌خۆش هاتبوو گیرۆكرن بۆ نشته‌رگه‌ریێ و ل ده‌مێ خوه نه‌هاتبوو كرن له‌ورا نه‌خۆشی ئازار ژ چاڤێن خوه ددیتن و دیتنا چاڤێن وی كێم ببوو و دلێ وی رادبوو و بیردانكا وی گه‌له‌ك كارتێكرن لێ هاتبوو كرن و سه‌رێ وی ب شێوه‌یه‌كێ نه‌شرین كرێت ببوو و دایكا وی نه‌دشیا ژ مالێ ده‌ربێخیت.
د.رێبه‌ر سه‌عید ئه‌وژی گۆت كو ڤێ جورێ نه‌خۆشیێ گه‌له‌ك ئه‌گه‌ر هه‌نه ئێك ژوان ژ ئه‌گه‌رێ زكماكیێ یه، ئه‌ڤجا چ دایكێ نه‌خۆشیا په‌رێزادێ هه‌بیت یان هنده‌ك جورێن حه‌بكان ب كاربینیت یانژی دبیت ل ده‌مێ ژ دایكبوونا زارۆی یا ب زه‌حمه‌ت بیت كارتێكرن ل سه‌رێ وی ببیت و فشاره‌كا زێده ل مێشكی بهێته كرن و گۆت: ده‌رزێن ل كلوخكی ل سێ سالیێ ژ نوو دهێنه گرتن، له‌ورا هه‌كه به‌ری وی ده‌می هاتنه گرتن دێ فشار ل سه‌ری هێته كرن و رێكێ ناده‌ت مێشك وه‌رارێ بكه‌ت و دیسا دێ فشار گه‌هیته چاڤان ژی و دیتنا وی دێ كێم بیت و هه‌تا وه دكه‌ت كو نه‌خۆشی شیانێن لڤینێ ژی نه‌بن، له‌ورا ئه‌م نه‌چاربووین نشته‌رگه‌ریێ بكه‌ین.
د.رێبه‌ر دیاركر ژی كو نشته‌رگه‌ریێ بۆ ده‌مێ چار ده‌مژمێران ڤه‌كێشا و ب سه‌ركه‌فتیان ب دووماهی هات و ل وێ باوه‌رێ بوو كو نه‌خۆش دێ 100% مفای ژێ بینیت.
هه‌روه‌سان دیاركر كو ژ به‌ركو هه‌موو نه‌خۆش قه‌ستا وان ناكه‌ن له‌ورا چ ئامارێ، ل به‌رده‌ست نینن بزانن چه‌ند نه‌خۆش ل دهۆكێ هه‌نه و گۆت: تشتێ گرنگ ئه‌وه بزانین كو ئه‌ڤ نه‌خۆشیه چار جور هه‌نه و هه‌ر سێ جورێن ئێكێ ب سڤكی دهێنه نیاسین و گه‌له‌ك كارتێكرنێ ل نه‌خۆشی ناكه‌ن و نشته‌رگه‌ری ژی ب ساناهی بۆ نه‌خۆشی دهێته كرن، به‌لێ جورێ چارێ ئه‌وێ ل ده‌ڤ ڤی زارۆكی یێ ب زه‌حمه‌ته بۆ نشته‌رگه‌ریێ و دیسا بۆ كارتێكرنێ ژی.
د.رێبه‌ر سه‌عید دیاركر ژی كو ب پشته‌ڤانیا رێڤه‌به‌ریا گشتی یا ساخله‌میا دهۆكێ رۆله‌كێ كاریگه‌ر هه‌یه بۆ دابینكرنا پێدڤیێن نشته‌رگه‌ریان ژ بۆ هندێ هه‌موو نشته‌رگه‌ریێن ده‌گمه‌ن ل نه‌خۆشخانێ بهێنه كرن و گۆت: ژبه‌ر وێ چه‌ندێ نوكه نشته‌رگه‌ریێن جورا و جور یێن مێشكی و مۆركێن پشتێ دهێنه كرن.
ئه‌ڤ مالپه‌ره فرێکه
