ساخله‌میا دهۆكێ 120 كارمه‌ندان دێ هنێریته وه‌لاتێ ئوردن بۆ جارا ئێكێ هاریكاره‌كێ رێڤه‌به‌رێ گشتی بۆ كارمه‌ندێن ساخله‌میێ دهێته دانان
هاتیه بلاڤکرن روژا شه‌مبی, 8 کانونا بچیک 2012 - 7:09pm
ب ئارمانجا پتر خزمه‌تكرنا نه‌خۆشان و سه‌رهلبوونا نووترین رێكێن وارێ په‌رستاری و ئه‌ندازیاری، رێڤه‌به‌ریا گشتی یا ساخله‌میا پارێزگه‌ها دهۆكێ ل رۆژا 6/12/2012 پرۆژێ هنارتنا 120 كارمه‌ندێن خوه بۆ وه‌لاتێ ئوردنێ راگه‌هاند و هاریكارێ رێڤه‌به‌رێ گشتی بۆ كاروبارێن كارمه‌ندێن ساخله‌میێ ده‌ست ب كاربوو.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو پرۆژێ هنارتنا كارمه‌ندێن ساخله‌میێ ب هه‌ڤكاری ل گه‌ل كارگێریا پارێزگه‌ها دهۆكێ بۆ جارا ئێكێ ل سه‌ر ئاستێ هه‌رێمێ دێ ل دهۆكێ ده‌ست پێ كه‌ت و گۆت: كارمه‌ند بۆ ده‌مێ سێ هه‌یڤان ل وه‌لاتێ ئوردن دێ كه‌ڤنه خولێن راهێنانێ و پشتی ڤه‌گه‌ریانا وان دێ شێن تایبه‌تمه‌نده‌كێ د وارێ په‌رستاریێ دا وه‌رگرن و هه‌لبه‌ت ب ڤێ رێكێ دێ پتر خزمه‌تا نه‌خۆشان هێته كرن ژلایێ په‌رستاریێ ڤه.
هه‌روه‌سان د.نزار عصمه‌ت دیاركر ژی كو چه‌ند ئه‌ندازیاران ژی ئه‌و دێ هنێرنه ده‌رڤه‌ی وه‌لاتی ژ پێخه‌مه‌ت وه‌رگرتنا تایبه‌تمه‌ندیێ د وارێ ئه‌ندازیا ساخله‌میێ دا، ژبه‌ركو ئه‌ندازیاریا ساخله‌میێ و ئاڤاكرنا ده‌زگه‌هێن ساخله‌میێ پێدڤی ب پتر شاره‌زایی هه‌یه.
یوسف حسێن عه‌بدوللا، كو ده‌ست ب كاربوو وه‌كو هاریكارێ رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو ب دانانا ڤی پۆسته‌ی دێ شیان هه‌بن ئاریشه‌یێن كارمه‌ندێن ساخله‌میێ كێمتر لێ بهێن و پتر هاندانا كارمه‌ندێن ساخله‌میێ دناڤ دام و ده‌زگه‌هێن ساخله‌میێ دا دێ هێته كرن، ده‌رباره‌ی هنارتنا كارمه‌ندان بۆ وه‌لاتێ ئوردن ژی، هاریكارێ رێڤه‌به‌رێ گشتی بۆ كاروبارێن كارمه‌ندێن ساخله‌میێ گۆت: مه چه‌ند خال هه‌بوون و ل سه‌ر وان بنه‌مایان كارمه‌ند هاتینه هه‌لبژارتن وه‌كو ده‌رچوویێن كولیژا و ره‌گه‌ز و سالێن خزمه‌تێ و تایبه‌تمه‌ندی و زانینا زمانی پتر ل به‌ر چاڤ هاتینه وه‌رگرتن.
د.هشیار موسا، رێڤه‌به‌رێ پشكا پلاندانانا ساخله‌میێ دیاركر كو ل گه‌را ئێكێ 39 كه‌س هاتینه هه‌لبژارتن كو قسه‌تا وه‌لاتێ ئوردن بكه‌ن وگۆت: ئه‌ڤ پرۆژه ب هاریكاریا پارێزگه‌رێ دهۆكێ دێ یێ به‌رده‌وام بیت و هه‌موو مه‌زاختنێن كارمه‌ندان ژ راهێنان و نڤستن و مه‌زاختنێن رۆژانه پارێزگه‌ها دهۆكێ ب خوڤه گرتینه.
ئه‌ڤ مالپه‌ره فرێکه
