ب هه‌لكه‌فتا رۆژا ئالایێ‌ كوردستانێ‌ لیژنا ناوچا په‌یمانگه‌هان یا پارتی ده‌ست ب خوین به‌خشینێ‌ كر

وه‌كو نه‌ریته‌كێ‌ سالانه‌ و پێخه‌مه‌ت پتر خزمه‌تكرنا نه‌خۆشێن باژێری، لیژنا ناوچا په‌یمانگه‌هان یا پارتی دیموكراتی كوردستان دوهی 17/12/2012 ب ئاماده‌بوونا عومه‌ر ئوره‌ی، به‌رپرسێ‌ رێكخستنێ‌ ل لقێ‌ ئێكێ‌ پارتی ده‌ست ب هه‌وه‌كا به‌خشینا خوینێ‌ كر.
د.ئیسماعیل ئه‌حمه‌د سمو به‌رپرسێ‌ لژناناوچا په‌یمانگه‌ها دیاكر  ب هه‌لكه‌فتا رۆژا ئالایێ‌ كوردستانێ‌ و وه‌كو رێزگرتنه‌ك بۆ وێ‌ رۆژێ‌ و هاریكاری بۆ نه‌خۆشان ئه‌و رابوون ب به‌خشینا 60 بوتلێن خوینێ‌ و گۆت: خوین ب هاریكاریا كاردر و ئه‌ندامێن ناوچێ‌ و قوتابیێن سه‌ر ب لیژنێ‌ ڤه‌ هاته‌ كۆمكرن.
محه‌مه‌د صالح رێڤه‌به‌رێ‌ په‌یمانگه‌ها وه‌رزشی ل دهۆكێ‌ دیاركر كو حه‌زكرنا وه‌لاتی ب حه‌زكرنا ئالیێ‌ مرۆڤی ڤه‌ گرێدایه‌ و گۆت: ب به‌خشینا خوینێ‌ د ئه‌ڤێ‌ هه‌وێ‌َ دا ئه‌م ئاماده‌ینه‌ مل ب ملێ‌ پێشمه‌رگه‌ی به‌رخودانێ‌ بكه‌ین.
عه‌بدولره‌زاق صالح محه‌مه‌د، ئه‌ندامێ‌ كۆمه‌لا خوین به‌خشێن كوردستانێ‌ لقی دهۆك دیاركر كو ده‌م بۆ ده‌می ده‌زگه‌هێن ساخله‌میێ‌ زێده‌دبن و وان به‌رده‌وام پێدڤی ب خوینێ‌ هه‌یه‌ بۆ خزمه‌تكرنا نه‌خۆش و كه‌سانێن تووشی روودانان دبن و گۆت: ئه‌وێن ب ڤی ره‌نگی ب پشته‌ڤانیا پارتی دیموكراتی كوردستان دبنه‌ هانده‌ر بۆ وێ‌ چه‌ندێ‌ گیانێ‌ نه‌خۆشان بهێته‌ پاراستن، له‌ورا كومه‌لا خوین به‌خشان ب هه‌ڤكاریا به‌نكا خوینێ‌ یا سه‌ر ب رێڤه‌به‌ریا گشتی یا ساخله‌میا پارێزگه‌ها دهۆكێ‌ ڤه‌ ب گرنگی دزانن هه‌ر جهێ‌ ئه‌وێن خوین به‌خشینێ‌ هه‌بن ئه‌و قه‌ست بكه‌نێ‌ داكو نه‌بیته‌ بارگرانی بۆ وان ده‌زگه‌هان ژی و بشێن ب شێوه‌یه‌كێ‌ ئاسانتر كارێ‌ خوه‌ ژی بكه‌ن.