گرێبه‌سته‌ك ب 108 ملیار دیناران بۆ دروستكرنا نه‌خۆشخانه‌كێ ل دهۆكێ هاته ئیمزاكرن
هاتیه بلاڤکرن روژا دوو شه‌مبێ, 14 کانونا مه‌زن 2013 - 11:35am
د رێوره‌سمه‌كێ تایبه‌ت دا و ب به‌رهه‌ڤبوونا د. رێكه‌وت حه‌مه‌ره‌شید وه‌زیرێ ساخله‌میا هه‌رێمێ دوهی 13/1 گرێبه‌سته‌ك ب كۆژمێ 108 ملیار دیناران د ناڤبه‌را وه‌زاره‌تا ساخله‌میێ و كۆمپانیا ڤینیس دا بۆ دروستكرنا نه‌خۆشخانه‌كا هه‌وارهاتنێ ل باژێرێ دهۆكێ هاته ئیمزاكرن.
ئه‌ڤ نه‌خۆشخانه دێ یا 300 ته‌ختی بیت و ل سه‌ر شێوازه‌كێ پێشكه‌فتی دهێته ئاڤاكرن و دێ هه‌موو پشكێن چاره‌سه‌ركرنا نه‌خۆشان ب خوه‌ڤه گریت.
د. رێكه‌وت د په‌یڤه‌كێ دا ئاماژه ب گرنگیا بجهئینانا ڤی پرۆژه‌ی كر و گۆت:( ئارمانجا مه ژ ئیمزاكرنا ڤێ گرێبه‌ستێ پتر مفا گه‌هاندنا خه‌لكێ پارێزگه‌ها دهۆكێ یه د وارێ ساخله‌میێ دا و گه‌هاندنا خزمه‌تكاریانه د وارێ ساخله‌میێ و چاره‌سه‌ریا نه‌خۆشان دا).
هه‌روه‌سا د. نزار عسمه‌ت رێڤه‌به‌رێ گشتی ساخله‌میا پارێزگه‌ها دهۆكێ دیار كر كو ئیمزاكرنا ڤی گرێبه‌ستێ گه‌له‌كا گرنگه و گۆت:( پشتی ئه‌ڤ پرۆژه ب دووماهی دهێت دێ شێین زێده‌تر خزمه‌تان پێشكێشی خه‌لكێ پارێزگه‌ها دهۆكێ كه‌ین).
ئه‌ڤ پرۆژه نها ل كۆمه‌لگه‌ها ته‌ناهی دهێته بجهئینان و به‌ری ماوه‌یه‌كی سه‌رۆكێ حكوومه‌تا هه‌رێما كوردستانێ د رێوره‌سمه‌كێ تایبه‌ت دا به‌رێ بنیاتی بۆ دانابوو.
ئه‌ڤ مالپه‌ره فرێکه
