بۆ جارا ئێكێ‌ سیسته‌مێ‌ سرا ئه‌لكترونی ل نه‌خۆشخانا هیڤی یا زارۆیان كه‌فته‌ كاری

ژبۆ رێكخستنا سرایا نه‌خۆشان ل شیره‌تكاریا نه‌خۆشخانا هیڤی یا زارۆیان، بۆ جارا ئێكێ‌ سیسته‌مه‌كێ‌ ئه‌لكترونی بۆ برێڤه‌برنا نه‌خۆشان ل نه‌خۆشخانێ‌ كه‌ته‌ د كاری دا.
الدكتور.نزار به‌كر، رێڤه‌به‌رێ‌ نه‌خوشخانا هیڤی یا زارۆیان دیاركر كو ل ده‌ستپێكێ‌ ده‌مێ‌ نه‌خۆش قه‌ستا نه‌خۆشخانێ‌ دكه‌ت دێ‌ پلێته‌كا نوشداری یا ئه‌لكترونی بڕیت و ژماره‌یه‌ك ل سه‌ر وێ‌ پلێتێ‌ هه‌یه‌ و دێ‌ نه‌خۆش ل جهێ‌ چاڤه‌رێبوونێ‌ ل ژڤانێ‌ خواندنا ژمارا خوه‌ مینیت و ب رێیه‌كا ئه‌لكترونی ژمارا نه‌خۆشی ل سه‌ر شاشێ‌ دێ‌ هێته‌ نڤیسین و دیسا ب ده‌نگی ژی دێ‌ هێته‌ گازیكرن كو خودانێ‌ فلان ژمارێ‌ ل ژوورا نوشداری ئاماده‌ببیت و گۆت: پشتی نوشدار ژ بشكنینا نه‌خوشی ب دووماهی دهێت، ئێكسه‌ر دێ‌ ب رێیا ئه‌لكترونی نه‌خوشه‌كێ‌ دی هێته‌ ئاگه‌هداركرن و مه‌ره‌م ژ دانانا ڤی سیسته‌می ئه‌وه‌ هه‌ر نه‌خوشه‌كی سرایا خوه‌ و ده‌مێ‌ خوه‌ یێ‌ تایبه‌ت هه‌یه‌ و چ واسته‌كاری د برنا نه‌خۆشان بۆ لایێ‌ نوشداری نامینیت و كه‌س بێ‌ پلێت ژی نه‌شێت قه‌ستا نوشداری بكه‌ت و دیسا ژ نه‌خۆشه‌كی پێهه‌لتر ژی نه‌شێن بچنه‌ ژوور هه‌تا سرایا وان بهێت.
الدكتور.نزار به‌كر دیاركر ژی كو ئه‌ڤ سیسته‌مه‌ جارێ‌ ب تنێ‌ ل پشكا شیره‌تكاریێ‌ هاتیه‌ دانان كو نه‌خۆش دشێت چاڤه‌رێبوونێ‌ بكه‌ن و گۆت: هه‌كه‌ نه‌خۆش یێ‌ ب له‌ز بیت و د حاله‌تێن دژوار دا دێ‌ شێت قه‌ستا پشكا ته‌نگاڤیان كه‌ت و ییر ل وێ‌ چه‌ندێ‌ دهێته‌ كرن سیسته‌مێ‌ نه‌خۆشخانێ‌ هه‌موو ب رێییێن ئه‌لكترونی بكه‌ڤیته‌ كاری.