10 نوشدارێن دهۆكێ دێ ل وه‌لاتێ هندێ فێری تایبه‌تمه‌ندیێن هوور بن
هاتیه بلاڤکرن روژا شه‌مبی, 19 کانونا مه‌زن 2013 - 9:28pm
رێڤه‌به‌ریا گشتی یا ساخله‌میا پارێزگه‌ها دهۆكێ ب پشته‌ڤانیا كارگێریا پارێزگه‌ها دهۆكێ پرۆژێ هنارتنا نوشداران بۆ وه‌لاتێ هندێ راگه‌هاند و ل گه‌را ئێكێ 10 نوشدار بۆ ده‌مێ سێ هه‌یڤان دێ تایبه‌تمه‌ندیێن هوور وه‌رگرن.
د.هشیار موسا، رێڤه‌به‌رێ پشكا پلاندانێ ل رێڤه‌به‌ریا گشتی یا ساخله‌میا پارێزگه‌ها دهۆكێ دیاركر كو رێڤه‌به‌ریا گشتی یا ساخله‌میا پارێزگه‌ها دهۆكێ گرێبه‌سته‌ك ل گه‌ل كومپانیا Geo healthcon كو گرێدای كارێ نه‌خۆشخانایه گرێدا بۆ راهێنانا ده‌ه نوشدارێن گه‌نج كو هه‌لگرێن باوه‌رنامه‌یێن بلندن و گۆت: نوشدار دێ هێنه راهێنان ل سه‌ر هنده‌ك شاره‌زاییان كو ل پارێزگه‌ها دهۆكێ نینن و بۆ ده‌مێ سێ هه‌یڤان دێ ل ژێر راهێنانێ بن.
د.هشیار دیاركر كو ئه‌ڤ پرۆژه ب پشته‌ڤانیا پارێزگه‌ها دهۆكێ و ل سه‌ر بۆدجا گه‌شه‌پێدانا هه‌رێمان دێ هێته بجهئینان و دیاركر ژی ئه‌و تایبه‌تمه‌ندی پێكهاتینه ژ ( نشته‌رگه‌ریێن نازوورێ بۆ ژنان و نازوورا ده‌ستنیشانكرن و چاره‌سه‌ركرنا گه‌هان و دیسا چاره‌سه‌ریا نه‌خۆشیێن گولچیسكا و میزه‌روویێ ب رێیا نازوورێ و راهێنان ل دۆر چاوانیا خواندنا تیشكێن میفراسێ و نشته‌رگه‌ریێن كوئه‌نداممێ هه‌رسێ ب رێكا نازوورێ) و گۆتژی: بۆ هه‌ر بسپۆریه‌كێ دو نوشدار هاتینه ده‌ستنیشانكرن و ئه‌ڤ پرۆژه دێ یێ به‌رده‌وام بیت.
رێڤه‌به‌رێ پشكا پلاندانانا ساخله‌میێ دیاركر ژی كو پرۆژه‌كێ دیتر ژی هه‌یه بۆ نوشدارێن تازه باوه‌رناما بۆردێ وه‌ردگرن كو بچنه وه‌لاتێن پێشكه‌فتی د بوارێ نوشداریێ دا بۆ ماوێ ئێك هه‌تا دو سالا تایبه‌تمه‌ندیێن هوور بخوینن و هه‌ر ده‌مێ بۆدجه بۆ هاته ته‌رخانكرن دێ ئه‌و پرۆژه ژی كه‌ڤیته كاری.
ئه‌ڤ مالپه‌ره فرێکه
