ساخله‌میا دهۆكێ‌ به‌رهه‌ڤكاریێن كونترۆلكرنا ئه‌نفلاوه‌نزا به‌ربه‌لاڤ دكه‌ت

پشتی دیاربوونا چه‌ند حاله‌تێن نه‌خۆشیا ئه‌نفلاوه‌نزا به‌ربه‌لاڤh1n1 ل ده‌ڤه‌رێن ژێریا عیراقێ‌، رێڤه‌به‌ریا كارۆبارێن خوپاراستنێ‌ هه‌موو به‌رهه‌ڤكاریێن خوه‌ ژ دابینكرنا ده‌رمانان و قایشێن تایبه‌ت ل نه‌خوشخانا ئاماده‌كرینه‌ بۆ كونترۆلكرنا ڤێ‌ نه‌خۆشیێ‌ و داخواز ژ وه‌لاتیان دهێته‌ كرن خوه‌ ژ جهێن ب قه‌ره‌بالغ دووربێخن و ساخله‌میا خوه‌ یا كه‌سایه‌تی ب پارێزن.
د.سیروان محه‌مه‌د ئه‌سوه‌د، رێڤه‌به‌رێ‌ كارۆبارێن خوپاراستنێ‌ ل پارێزگه‌ها دهۆكێ‌ دیاركر هه‌ر ژرۆژا ئیكێ‌ ده‌مێ‌ ئه‌ڤ نه‌خۆشیه‌ به‌لاڤبووی  و چه‌ند حاله‌ته‌ك ل وه‌لاتێن ئوردنێ‌ و فه‌له‌ستینێ‌ په‌یدابووین و پشتی ده‌نگ و باسێن بۆ وان هاتین كو دو حاله‌ت ل پارێزگه‌ها  بابل تووشی ڤێ‌ نه‌خۆشیێ‌ بووینه‌، وان وه‌ك رێڤه‌به‌ریا كاروبارین خوباراستنێ‌ سه‌ر ب رێڤه‌به‌ریا گشتی یا ساخله‌میا دهۆكێ‌ هه‌موو ئاماده‌كاری بۆ به‌رهنگاریا ڤێ‌ نه‌خۆشیێ‌ كرینه‌ و گۆت: ده‌سپێكێ‌ هه‌موو حاله‌تێن ئه‌نفلوه‌نزا ب ره‌نگه‌كێ‌ حه‌فتیانه‌ بۆ مه‌ دهێنه‌ ریپۆرتكرن ژ هه‌موو ده‌زگه‌هێن ساخله‌میێ‌ و مه‌ دوپاتكریه‌ كو هه‌ر حاله‌ته‌كێ‌ په‌رسیڤا ڤه‌گر جاره‌كا دی بهێته‌ ریپورتكرن و بۆ رێڤه‌به‌ریا كارۆبارێن خوپاراستنێ‌ بهێته‌ فرێكرن بره‌نگه‌كێ‌ حه‌فتیانه‌ و حاله‌تێن دژوار روژانه‌ بهێنه‌ دیاركرن.
رێڤه‌به‌رێ‌ كارۆبارێن خوپاراستنێ‌ دیاركر ژی هه‌موو نه‌خۆشخانێن مه‌زن قایشێن تایبه‌ت ب نه‌خۆشیا ئه‌نفلاوه‌نزا به‌ربه‌لاڤ ئاماده‌كرینه‌ و گۆتژی: ده‌رمانێ‌ دژی ڤێ‌ نه‌خۆشیێ‌ كو دبێژنێ‌ (تامیفلۆ) مه‌ ل هه‌موو نه‌خوشخانه‌ و ده‌زگه‌هێن ساخله‌میێ‌ دابین كریه‌ و هه‌ر نه‌خۆشه‌كێ‌ په‌رسیڤه‌كا دژوار لێ‌ هه‌بیت و بهێته‌ نه‌خۆشخانێ‌ ده‌رمان دێ‌ بۆ هێته‌ دابینكرن.
د.سیروان ده‌رباره‌ی پاراستنا كارمه‌ندێن نه‌خۆشخانێ‌ ژ نه‌خۆشیا ئه‌نفلاوه‌نزا به‌ربه‌لاڤ دیاركر كو وان جل و به‌گێن تایبه‌ت بۆ هه‌موو ستافێ‌ كو سه‌ره‌ده‌ریێ‌ ل گه‌ل نه‌خۆشیێ‌ دكه‌ت ئاماده‌كرینه‌ داكو تووشی نه‌خۆشیێ‌ نه‌بن و گۆت: چونكو ئه‌م دزانین ئه‌ڤ جورێ‌ ئه‌نفلاوه‌نزایێ‌ دهێته‌ به‌لاڤكرن ب ره‌نگه‌كێ‌ راسته‌ وخو ژ مروڤی بۆ مروڤی و ئه‌و كه‌سێ‌ سه‌ره‌ده‌ریێ‌ دگه‌ل ڤێ‌ نه‌خوشیێ‌ بكه‌ت پێدڤیه‌ ده‌ستگورك دبه‌ر بن و كولاڤی بكه‌ته‌ سه‌رێ‌ خوه‌  و به‌رچافك ل به‌ر چاڤا بن داكو تووشی نه‌خۆشیێ‌ نه‌بیت.
ده‌رباره‌ی رێكا ده‌ستنیشانكرنا  نه‌خۆشیێ‌ ژی د.سیروان دیاركر پالپشتیا وان به‌هرا پتر سه‌ر حاله‌تێن كلینیكی یا نه‌خوشی یه‌ و گۆت: هه‌كه‌ حاله‌تێ‌ وی گه‌له‌كێ‌ دژوار بیت و تا یا وی گه‌له‌ك یا بلند بیت یان چه‌ند نیشانێن دی دگه‌ل دا بن،  مه‌ داخوازیه‌ك یا چێكری بۆ كلینیكا پێكڤه‌ گرێ‌ دده‌ت د اكو ب زووترین ده‌م بزانین كا ئه‌ڤه‌ ئه‌و نه‌خۆشیه‌ یان نه‌ و نموونه‌ك دهێته‌ وه‌رگرتن بۆ تاقیگه‌ها مه‌لبه‌ندی بو پشت راست بوون ژ نه‌خۆشیێ‌ و گۆت: هه‌تا نوكه‌ ژ حاله‌تێن ڤێ‌ نه‌خۆشیێ‌ نه‌هاتینه‌ ریپۆرتكرن و ب تنێ‌ مه‌ پێرابوونێن خوپاراستنێ‌ وه‌رگرتینه‌.