چه‌ند حاله‌تێن نه‌خۆشیا سۆركا ل كه‌مپا دومیز په‌یدابوون

نوونه‌رێن حه‌فت رێڤه‌به‌ریێن گشتی یێن ساخله‌میێ‌ ل عیراقێ‌ 27/1/2013 ل دهۆكێ‌ كۆمبوون و ب سه‌رپه‌رشتیا رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ كۆمبوونه‌ك ل دۆر چاوانیا كونترۆلكرنا نه‌خۆشیا سۆركا ل كه‌مپا دومیز و قائم هاته‌ كرن، پشتی كو چه‌ند حاله‌تێن نه‌خۆشیا ناڤبری ل ناڤ كه‌مپێ‌ په‌یدابووین.
د.نزار عسمه‌ت، رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ دیاركر كو هنده‌ك كاودانێن نه‌چاڤه‌رێكری ل ناڤ په‌نابه‌رێن كه‌مپا دومیز په‌یدادبن و گۆت: وه‌لاتێ‌ سۆریێ‌ چو گرنگی ب ساخله‌می و پاراستنا وه‌لاتیان نه‌دایه‌ و هه‌تا ره‌وشه‌نبیریا ساخله‌میێ‌ ژی ب گرنگی نه‌هاتیه‌ وه‌رگرتن، له‌ورا رێڤه‌به‌ریا گشتی یا ساخله‌میا پارێزگه‌ها دهۆكێ‌ هه‌ر ژ ده‌ستپێكێ‌ گرنگیه‌كا مه‌زن ب ڤاكسینان دایه‌ و گۆت: د هه‌وا بۆری دا دۆرێن 1800 زارۆیان دژی نه‌خۆشیا سۆركا هاتبوونه‌ ڤاكسین دان و هه‌ر ئێكێ‌ ل ده‌ستپێكێ‌ دهێته‌ كه‌مپێ‌ ڤاكسین بۆ دهێنه‌ دان و خشته‌یه‌ك بۆ ڤاكسندانێ‌ دهێته‌ دانان.
د.نزار عسمه‌ت دیاركر ژی كو هه‌موو پێشبینی ئه‌ون ل سالا 2013 پێله‌كا نه‌خۆشیا سۆركا هه‌رێما كوردستانێ‌ ڤه‌گریت و ئه‌ڤه‌ ئێك ژوان نیشانایه‌ و خواست كو هه‌ڤبه‌ندیه‌كا باش دناڤبه‌را وه‌زاره‌تێن ساخله‌میێ‌ ل هه‌رێمێ‌ و عیراقێ‌ هه‌بیت بۆ رێگرتنێ‌ ل نه‌خۆشیێ‌.
د كومبوونێ‌ دا كو سه‌ره‌رای نوونه‌رێن رێڤه‌به‌ریێن گشتی یێن هه‌رێمێ‌، نوونه‌رێن پارێزگه‌ها ئه‌نبار و مووسل ژی ئاماده‌ببوون و د ڤێ‌ ده‌ربارێ‌ دا، د.موعته‌ز محمه‌د عه‌باس، به‌رپرسێ‌ هۆبا ڤاكسیندانێ‌ ل وه‌زاره‌تا ساخله‌میا عیراقێ‌ دیاركر كو ئه‌ڤان پارێزگه‌هان كونتاكه‌كا ئێكسه‌ر ب بابه‌تی ڤه‌ هه‌یه‌ و پشتی كو ساخله‌میا دهۆكێ‌ شیای سۆركا كونترۆل بكه‌ت وان دڤێت مفای ژێ‌ وه‌ربگرن بۆ كه‌مپا ( قائم) و گۆت: مه‌ره‌م ژ خرڤه‌بوونا ل پارێزگه‌ها دهۆكێ‌ ئه‌وه‌ كو پشتی چه‌ند حاله‌تێن نه‌خۆشیا سۆركا ل كه‌مپا دومیز ده‌ركه‌تین و هاتینه‌ كونترۆلكرن دێ‌ چ پلان بۆ كونترۆلكرنا وێ‌ دانین كو ل كه‌مپا ( قائم) ژی په‌یدانه‌بیت و بۆ چ ده‌ڤه‌رێن دی نه‌هێته‌ ڤه‌گوهاستن.