ساخله‌میا دهۆكێ پتر ژ 7 ملیار دیناران ل نه‌خۆشێن په‌نجه‌شێرێ مه‌زاختینه
هاتیه بلاڤکرن روژا ئێک شه‌مبێ, 3 شوات 2013 - 1:17pm
رێڤه‌به‌ریا گشتی یا ساخله‌میا پارێزگه‌ها دهۆكێ بۆ دابینكرنا ده‌رمان و پێدڤیێن نه‌خۆشێن په‌نجه‌شێرێ چه‌ندین پشكێن تایبه‌ت ڤه‌كرینه بۆ پشكنین و چاڤدێریا نه‌خۆشێن په‌نجه‌شێرێ و دیسا جورێن چاره‌سه‌ریێ ژ ده‌رمان و پێدڤیان دابین دكه‌ت و سه‌نته‌ره‌كێ تایبه‌ت بۆ نه‌خۆشێن په‌نجه‌شێرا خوینێ ل دهۆكێ هاتیه ڤه‌كرن و ل دووڤ پرۆگرامه‌كێ حكوومه‌تا هه‌رێما كوردستانێ ژی هاریكاریێن تایبه‌ت پێشكێشی نه‌خۆشێن په‌نجه‌شێرێ دكه‌ت.
د.نزار عصمه‌ت ته‌یب، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو ب هه‌لكه‌فتا رۆژا جیهانی یا په‌نجه‌شێرێ ئه‌و دێ كار ژ بۆ به‌لاڤكرنا هشیاركرنا ساخله‌میێ دناڤ وه‌لاتیان دا كه‌ن و نامه‌یێن تایبه‌تێن خوپاراستنێ ژ ڤێ نه‌خۆشیا كوژه‌ك بۆ خه‌لكی بده‌نه خویاكرن و گۆت: ل سالا 2012 ل سنورێ پارێزگه‌ها دهۆكێ 425 نه‌خۆشێن په‌نجه‌شێرێ هه‌بوون كو ل دووڤ پرۆكرامه‌كێ حكوومه‌تا هه‌رێما كوردستانێ ئه‌م شیاین هاریكاریان بده‌ینه 303 نه‌خۆشان كو بۆ هه‌ر نه‌خۆشه‌كی دو ملیون دینار بهێنه دان و ئه‌م شیاینه د سالا 2012 كوژمێ 606 ملیون دیناران وه‌كو هاریكاری بده‌ینه وان نه‌خۆشان.
رێڤه‌به‌ری گشتیێ ساخله‌میا پارێزگه‌ها دهۆكێ دیاركر ژی كو د سالا بۆری دا و ژبه‌ركو ده‌رمانێن په‌نجه‌شێرێ ب شێوه‌یه‌كێ گشتی گه‌له‌ك د گران بهانه، داكو ئه‌و گرانی نه‌كه‌ڤیته ل سه‌ر مللێن نه‌خۆشان له‌ورا ژ بۆدجا ته‌خانكری یا ده‌رمانان ب رێژا 35% بۆ دابینكرنا ده‌رمانێن په‌نجه‌شێرێ هاتبوو ته‌رخانكرن و گۆت: د سالا 2012 ب كوژمێ 6 ملیار و 607 ملیون دینارێن عیراقی ده‌رمان و پێدڤی بۆ نه‌خۆشێن په‌نجه‌شێرێ هاتینه دابینكرن و ب رێژا پتری 95% ده‌رمانێن په‌نجه‌شێرێ بۆ نه‌خۆشان ب هه‌روه هاتینه دان.
د.نزار عصمه‌ت دیاركر ژی بۆ سالا نوو ژی ئه‌و دێ د به‌رده‌وام بن ل سه‌ر هاریكاریكرنا نه‌خۆشان و دیسا دابینكرنا ده‌رمانان بۆ نه‌خۆشێن تووشی په‌نجه‌شێرێ دبن.
ئه‌ڤ مالپه‌ره فرێکه
