د رۆژا ساخكرنا په‌نجه‌شێرێ دا پێشنیاره كۆنفرانسه‌كێ زانستی یێ په‌نجه‌شێرێ لدهۆكێ بهێته سازكرن
هاتیه بلاڤکرن روژا جارشه‌مبێ, 6 شوات 2013 - 10:12am
ب هه‌لكه‌فتا روژا جیهانی یا په‌نجه‌شێرێ ساخله‌مییا پارێزگه‌ها دهۆكێ هوشیاریا ڤێ نه‌خوشیێ و چه‌وانیا رێكێن خۆپاراستنێ دناڤ وه‌لاتیاندا به‌لاڤه دكه‌ت، بڤی َهه‌لكه‌فتێ دوهی ل نه‌خۆشخانه‌یا ئازادی ئه‌ڤ رۆژه هاته ساخكرن.
د په‌یڤه‌كێدا نوونه‌رێ رێڤه‌به‌رێ گشتی یێ ساخله‌میێ ل پارێزگه‌ها دهۆكێ د. سه‌روه‌ر سادق به‌حسێ گرنگیا ساخكرنا ئه‌ڤێ رۆژێ كر و هه‌روه‌سا ئاماژه دا وان پێنگاڤێن حوكمه‌تێ هاڤێتین د بیاڤێ خزمه‌تكرنا نه‌خۆشێن په‌نجه‌شێرێ دا ل پارێزگه‌ها دهۆكێ و دیاركر،نها سه‌نته‌ره‌كێ تایبه‌ت ب نه‌خۆشییا په‌نجه‌شێرێ هاتیه ڤه‌كرن بۆ چاره‌سه‌رییا وان و زێده‌باری دانا ده‌رمانا بۆ وان نه‌خۆشان ب هه‌روه.
ژ ئالیێ خۆ ڤه د. فه‌رهاد خورشید ئه‌ندامێ لیژنه‌یا په‌نجه‌شێرا مه‌مكی ل پارێزگه‌هێ دیاركر، نها تێگه‌هشتنه‌ك دناڤ وه‌لاتیاندا په‌یدا بوویه كۆ هه‌ر كه‌سێ نه‌خۆشیا په‌نجه‌شێرێ هاتێ چ چاره‌سه‌ری بۆ نینه و گۆت: پێدڤییه وه‌لاتیێن مه و نه‌خۆشێن په‌نجه‌شێرێ بزانن چاره‌سه‌ری هه‌یه و پێدڤییه به‌رده‌وام هه‌موو كه‌سه‌ك چاڤدێریا خۆ بكه‌ت و خوپارێزیت ژ وان خوارنێن دبنه ئه‌گه‌رێ چێكرنا قه‌له‌ویێ و هه‌روه‌سان جگارا.
ده‌رباره‌یی كاری َهاتیه كرن ژ ئالیێ ساخله‌مییا دهۆكێ بۆ نه‌خۆشێن په‌نجه‌شێرێ د. ته‌لال ره‌شید جێگرێ رێڤه‌به‌رێ نه‌خۆشخانا ئازادی دیاركر، د سالا بوریدا 425 حاله‌تێن نه‌خۆشییا په‌نجه‌شێرێ ل پارێزگه‌هێ هاتبوونه توماركرن و 103 ژ وان په‌نجه‌شێرا مه‌مكی بوون و گۆت: حوكمه‌تا هه‌رێمێ د سالا 2012 دا هاریكاریێن تایبه‌ت ب وان نه‌خۆشانا په‌خشیینه كۆ ل پارێزگه‌هێ 303 نه‌خۆشان 2 ملیۆن دینار وه‌كو هاریكاری وه‌رگرتینه و زێده‌باری دانا ده‌رمانا ب رێژه‌ییا 95% ب هه‌روه و دگه‌ل ڤه‌كرنا سه‌نته‌ره‌كی َتایبه‌ت یێ نه‌خۆشیێن په‌نجه‌شێرێ ل پارێزگه‌ها دهۆكێ.
سه‌باره‌ت ئارمانجا ساخكرنا ڤێ رۆژێ و پارێزگه‌ها دهۆكێ ل چ قوناغه همبه‌ر نه‌خۆشییا په‌نجه‌شێرێ د. نۆفه‌ل محه‌مه‌د ره‌شید تایبه‌تمه‌ندێ نه‌خوشیێن ڤه‌گر ل نه‌خۆشخانا ئازادی گۆت: دو ئارمانج مه هه‌بوون ئێك بۆ نۆشداران بوو كا چ پێزانینه‌كا نوو لسه‌ر ڤێ نه‌خۆشیێ ده‌ركه‌فتییه بۆ دیاركرن و چاره‌كرنا نه‌خۆشێن په‌نجه‌شێرێ و دیاركر، ئارمانجا دوێ نه‌خۆشێن بخوونه و ئه‌وژی په‌یدا بوونا په‌نجه‌شێرێ ئارێشه‌یێ بتنێ بۆ نه‌خوشی په‌یدا ناكه‌ت به‌لكو ئارێشه‌ییا جڤاكی و نوشدار و حوكمه‌تێ یه ژی، چونكه ئه‌ڤ نه‌خۆشه پێدڤی ب ده‌رمانایه و نه‌خۆشخانێ و پێدڤێ ب چاڤدێرییه‌كا تایبه‌ته ژ به‌ر ڤێ چه‌ندێ دبێژینه نه‌خۆشان تو نه بتنێ ئه‌م هه‌می دگه‌ل ته‌ینه.
د ئالییه‌كێ دی دا د. نوفه‌ل دیاركر، نه هه‌ر كه‌سێ په‌نجه‌شێر هاتی چاره‌سه‌ری بوو نینه ، به‌لكو گه‌له‌ك جور هه‌نه چاره‌سه‌ری بوو هه‌یه، بتایبه‌ت ژی ئه‌گه‌ر توشبووی زوو سه‌ره‌دانێ بكه‌ت و گۆت: پترییا جورێ نه‌خۆشییا په‌نجه‌شێرا به‌ربه‌لاڤ ل پارێزگه‌هێ په‌نجه‌شێرا مه‌مكی یه كۆ ل سالا بوری 103 حاله‌ت هاتبوونه تۆماركرن، ئاماژه‌كر ئه‌گه‌ر به‌راوردیێ بكه‌ین رێژه‌ییا توشبویێن په‌نجه‌شێرێ ل پارێزگه‌هێ د زێده‌بوونێ دا، لێ تا نها نه‌هاتیه دیاركرن ئه‌گه‌ر ئه‌وه نه‌خوشی زێده دبیت یان ژی ئامیرێن مه پێشكه‌تی تر لێهاتینه و زووتر نه‌خۆشی دهێته دیاركرن یان ژی خه‌لكێ مه زێده‌تر هشایربوویه پشكنینێن خۆ دكه‌ت.
ناڤهاتی زێده‌تر گۆت: گه‌له‌ك وه‌سان تێدگه‌هن بتنێ لده‌ڤ مه‌زنا ئه‌ڤ نه‌خۆشییه په‌یدا دبیت،لێ ئه‌ڤه ل ده‌ڤ گه‌نج و زارۆیان ژی په‌یدا دبیت و پێدڤییه هه‌ر كه‌سه‌كێ گۆمانا ڤێ نه‌خۆشیێ لسه‌ر خۆ هه‌بیت سه‌ره‌دانا نه‌خشخانێ بكه‌ت بۆ پشكنینێ و دیاركر، كه‌سێن زێده‌تر ئه‌ڤ نه‌خۆشییه لده‌ڤ په‌یدا دبیت یێن ژ 45 سالیێ و زێده‌تره نه بتنێ ل دهۆكێ به‌لكو ل هه‌موو جیهانێ.
لدور گێرانا كۆنفرانسه‌كێ زانسی ل پارێزگه‌هێ د.نه‌سرین حه‌مه‌ره‌ش به‌رپرسا هۆبا پشتگیریا ل خۆاپارستنا ساخله‌مییا دهۆكێ راگه‌هاند، مه لبه‌ره كۆنفرانسه‌كێ زانستی یێ تایبه‌ت ب په‌نجه‌شێرێ ل پارێزگه‌ها دهۆكێ بگێرین و گۆت: پێشنیار د رۆژا جیهانیا په‌نجه‌شێرێ دا هاته‌كرن كۆنفرانسه‌كێ زانستی بهێته سازكرن ل دهۆكێ پتر لسه‌ر ڤی َنه‌خۆشیێ ل پارێزگه‌هێ ب راوه‌ستێن، ئاماژه‌كر نها ساخله‌میێ مژوولی دارێشتنا ڤێ پێشنیارێ یه.
ئه‌ڤ مالپه‌ره فرێکه
