ساخله‌میێ‌ و ڤیته‌رنه‌ریێ‌ هنده‌ك بڕیارێن نوو ده‌ركرن

ژبۆ پێكئینانا لیژنێن هه‌ڤپشك دناڤ بازاری دا و كونترولكرنا جهێن فرۆتنا به‌رهه‌مێن گیانه‌وه‌ری، رێڤه‌به‌ریا خوپاراستنا ساخله‌میێ‌ و رێڤه‌به‌ریا ڤێتێنه‌ریا دهۆكێ‌ كومبوونه‌كا هه‌ڤپشك ئه‌نجام دا و چه‌ند بڕیارێن نوو ده‌ركرن.
د.سیروان محه‌مه‌د ئه‌سوه‌د، رێڤه‌به‌رێ‌ كارۆبارێن خوپاراستنێ‌ دیاركر ب مه‌ره‌ما هه‌ماهه‌نگیا  كاری دناڤبه‌را هه‌ردو رێڤه‌به‌ریان دا، كومبوون هاته‌ ئه‌نجامدان و گۆت:چه‌ندین كارێ‌ هه‌ڤپشك مه‌ هه‌بوون وه‌كی تیمێن هه‌ڤپشك سه‌ره‌دانا جهێن جودا جودا بكه‌ن ، ژ به‌ركو هنده‌ك كا ر گرێدایی ب ساخله‌میێ‌ ڤه‌نه‌ هنده‌ك تایبه‌تن ب ڤێتێرنه‌ری ڤه‌ دا كو هه‌ڤكاریا دناڤبه‌را مه‌ دا هه‌بیت:.
د.سیروان دیار كر ژی كو بریارهاته‌ دان نابیت ماسی ل ناڤ باژێری بهێنه‌ فروتن ب تنێ‌ جهێن ده‌رڤه‌ی باژێری، تیمێن مه‌ هه‌ردوو رێڤه‌به‌ریا پێكڤه‌ ده‌ركه‌ڤن، دووڤچوونا جهێن سه‌رژێكرنا گیانه‌وه‌را بهێته‌ كرن، نابیت گوشتێ‌ (حه‌لاندی)قیمه‌ كری ب قه‌باره‌یه‌كێ‌ زۆر بهێته‌ دروست كرن و دوباره‌ بهێته‌ قه‌رساندن و پاشان بهێته‌ فروتن ، دووڤچون بۆ باخچێ‌ گیانه‌وه‌را و دوكانێن فروتنا بالندێن جوانی و جورێن دی بهێته‌ كرن.
د.دیارته‌یب، رێڤه‌به‌رێ‌ ڤێتێرنه‌ری ل پارێزگه‌ها دهوكێ‌ دیار كر د كومبوونێ‌ دا بابه‌تێن گرێدایی ب ساخله‌میا گشتی ڤه‌ هاتنه‌ به‌حسكرن و گۆت: ژ به‌ركو رێڤه‌به‌ریا مه‌ گرێدایی ب گیانه‌وه‌را و ساخله‌میا گیانه‌وه‌را ڤه‌ هه‌یه‌ و هه‌روه‌سا پاراستنا به‌رهه‌مێن گیانه‌وه‌را ژ زیان و ڤایروسێن ڤه‌گر و كریارێن سه‌ر ڤان به‌رهه‌ما دهێنه‌ كرن و داكو بشێوه‌یه‌كێ‌ ساخله‌م بگه‌هنه‌ به‌ر ده‌ستێ‌ خه‌لكی و گوتژی: گه‌نگه‌شه‌ هاته‌ كرن ل سه‌ر چاوانیا سه‌ربرینا گیانه‌وه‌را وچاوانیا ڤه‌گوهاستنا وان ب تایبه‌تی لسه‌ر سنورا كا دێ‌ چاوان سه‌ره‌ده‌ریی كه‌ن.