ساخلهمییا دهۆكێ: لدهمێ قهیرانا ئارمانجامه نههێلانا نهخۆشیا و كێمكرنا رێژا مرنێ یه
ساخلهمییا پارێزگهها دهۆكێ بهرههڤییا دروستكرنا كادرهكێ شارهزا دكهت لدهمێ پهیدابوونا قهیرانا و چهوانییا گههاندنا خزمهتێن ساخلهمی بۆ لێقهومییان.
دوهی رێڤهبهرییا گشتی یا ساخلهمیێ ل پارێزگهها دهۆكێ ب ههڤكاری دگهل رێكخراوا unfpa رابوو ب سازكرنا وركشووپهكێ لدهمێ پهیدابوونا قهیرانا بتایبهت ژی بابهتێن توندوتیژیا سكسی و ساخلهمییا ژدایكبوونێ بۆ كهسێن لێقهومایی.
د. سیروان محهمهد ئهسوهد رێڤهبهرێ كارۆبارێن خوپاراستنا ساخلهمیا دهۆكێ د پهیڤهكێ دا بهحسێ گرنگییا خۆلێن بڤی شێوهیی بۆ ئامادهبوویان كر و ئاماژه دا گرنگییا كارێ پشكدارێن ورك شووپێ بۆ هندی ل پاشهرۆژێ بێخنه د خزمهتا وهلاتییان دا نهخاسمه ل كهمپا دۆمیز.
ژ ئالییهكی َدیڤه د.لوما حازم بهرپرسا هوبا دایك و زارۆیان ل خوپاراستنا ساخلهمییا دهۆكێ دیاركر، بهشداربوویێن خۆلێ ژ سازیێن ساخلهمیێ و چهند فهرمانگههێن پهیوهندیدار دگهل رێكخراوێن مروڤایهتی پشكدارن و گۆت: بۆ ماوێ چوار رۆژ دێ راهێنان پی َهێنه كرن بۆ هندێ د بهرههڤبن بۆ قهیرانا نهمازه مینا دروستكرنا كهمپا دومیز و چهوانیا سهرهدهریكرن دگهل ئاكنجیێن وێ و چاوانیا پێشكێشكرنا خزمهتێن ساخلهمیێ دبیاڤێ كێمكرنا رێژا مرنێ و نههێلانا نهخۆشییا لدهڤ وان. بتایبهت ژی وان نهخۆشیێن برێكا كرییارێن سكس دهێنه بهلاڤكرن.
د. بهختیار رهشید سهرپهرشتێ ساخلهمییا پارێزگهها دهۆكێ ل كهمپا دومیز ئاماژه دا بهرنامێ هاتییه ئهنجامدان و پێشكێشكرنا و خزمهتێن ساخلهمیێ ههر ژ دروستكرنا كهمپا ناڤبری و گۆت: لدووڤ بهرنامهیێ و راسپاردێن سهرۆكاتیێن ههرێمێ و حوكمهتێ و وهزارهتا ساخلهمیێ ههموو خزمهتێن ساخلهمیێ بۆ ئاوارهیێن كوردێن سوریێ ب ههروه بهێنهكرن.
بهرپرسا سهنتهرێ نهخوشیێن دهرونی ل پارێزگهها دهۆكێ د.بهار سلێمان گۆت: پێدڤییه خهلكی رهوشهنبیرییا ساخلهمیێ دناڤدا بهێته بهلاڤكرن ب مهرهما پاراستنا گیانێ وان ژ ههر نهخۆشییهكێ و ئاماژهكر، لدهمێ ههبوونا قهیرانا زۆر جاران كارتێكرن ل دهرونێ وان كهسا دبیت یێن دناڤا قهیرانا دژین ، لهو ئهڤرۆ كادرهكێ تایبهتمهند دێ هێته بهرههڤكرن بۆ هندێ ل ههر قهیرانهكا ههبیت یێ بهرههڤبیت كاربكهت بۆ هشیاركرنا وهلاتیان لسهر نههێلانا و بهرهنگاربوونا توندوتیژییا سكسی و ههروهسان پاراستنا گیانێ ژنێن دوگیان و زارۆیان.