هه‌وه‌كا خوین به‌خشینێ‌ بۆ زارۆیێن په‌نجه‌شێرێ‌ هاته‌ كرن

ب بیره‌وه‌ریا وه‌غه‌ركرنا بارزانیێ‌ نه‌مر، دوهی 2/3/2013ل به‌نكا خوینێ‌ ل دهۆكێ‌ هه‌وه‌كا  خوین به‌خشینێ‌ بۆ زارۆیێن تووشی نه‌خوشیا په‌نجه‌شێرا خوینێ‌ بووین هاته‌ ئه‌نجامدان و ژماره‌یه‌كا زور یا خه‌لكی پشكداری تێدا كر.
د. مه‌جید خه‌مو رێڤه‌به‌رێ‌ به‌نكا خوینێ‌ دیاركر كو هه‌وا ناڤبری بۆ ده‌مێ‌ سێ‌ رۆژان دێ‌ یا به‌رده‌وام بیت و گۆت: زارۆیێن تووشی په‌نجه‌شێرا خوینێ‌ بووین به‌رده‌وام پێدڤی ب خوینێ‌ هه‌یه‌ و خواست كو وه‌لاتی ب شێوازه‌كێ‌ به‌رفره‌ه پشكداریێ‌ د هه‌وا ناڤبری دا بكه‌ن.
د. عه‌بدولره‌حمان عه‌بدوللا، به‌رپرسێ‌ سه‌نته‌رێ‌ ژین یێ‌ نه‌خۆشێن په‌نجه‌شێرا خوینێ‌ دیاركر كو گه‌له‌ك جورێن په‌نجه‌شێرێ‌ هه‌نه‌ لێ‌ یا گه‌له‌ك مشه‌ په‌نجه‌شێرا خوینێ‌ یه‌ ئه‌وا دبێژنێ‌ ( لوكیمیا ) و گۆت: ئه‌ڤ جوره‌ نه‌خۆشه‌ تووشی كێم خوینیێ‌ دبن له‌ورا وان پێدڤی ب خوینێ‌ هه‌یه‌ و به‌رگریا له‌شێ‌ وان كێم دبیت، هه‌روه‌سا ژبه‌ر دژواریا چاره‌سه‌ریا وان ب ده‌رمانێن زور ب هێز كارتێكرن گه‌له‌ك ل نه‌خوشی دبیت و ب تایبه‌ت ل ده‌ستپێكا چاره‌سه‌ریێ‌. هه‌روه‌سان دیاركر كو هه‌كه‌ خوین به‌ربوون هه‌بوو دبیت پتر پێدڤی ب خوینێ‌ ببیت.
هه‌ڤال عومه‌ر ئێك ژ كه‌س و كارێن نه‌خۆشێن په‌نجه‌شێرا خوینێ‌ ژی دیاركر كو ئه‌نجامدانا ڤان جوره‌ هه‌وان دێ‌ بوارێ‌ وان سڤك كه‌ت نه‌خاسمه‌ كو نوكه‌ زارۆیێ‌ وان به‌رده‌وام ب خوینێ‌ دبیت و گۆت: پشكداریا خه‌لكی د هه‌وا به‌خشینا خوینێ‌ دا دێ‌ بیته‌ ئه‌گه‌ر كو ژیانا زارۆیێن مه‌ ڤه‌ژیته‌ڤه‌ و ئه‌ڤه‌ژی ئارماتجا مه‌یه‌.