53 ژێ‌ بۆ وه‌لاتیێن توركیا بوون ل دهۆكێ‌ 349 گولچیسك هاتینه‌ چاندن

ب هه‌لكه‌فتا رۆژا جیهانی یا نه‌خۆشیێن گولچیسكان، ب چاڤدیرَیا د.نزار عسمه‌ت، رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌، بۆ جارا ئێكێ‌ ل سه‌ر ئاستێ‌ هه‌رێمێ‌ رۆژا 9/3/2013 ل هۆلا نه‌خوشخانا ئازادی ئه‌ڤ رۆژه‌ هاته‌ ساخكرن.
 د.شاكر سه‌لیم بالندی، رێڤه‌به‌رێ‌ سه‌نته‌رێ‌ گولچیسكان ل دهۆكێ‌ دیاركر كو هه‌تا نوكه‌ ئه‌و شیاینه‌ ل سه‌نته‌رێ‌ ناڤبری 349 گولچیسكان بچینن و گۆت: ل سالا 2012 مه‌زنترین ژمارا گولچیسكان هاتیه‌ چاندن كو ئه‌وژی 145 گولچیسك بوون و ژوانژی 38 بۆ كوردان و 76 بۆ عیراقیان و 29 بۆ توركان و 2 ژی بۆ ئاكنجیێن وه‌لاتێ‌ سۆریا و هه‌كه‌ ل گه‌ل یێن سالا 2013 كۆم بكه‌ین دێ‌ دیاربیت 53 وه‌لاتیێن تۆرك و سێ‌ وه‌لاتیین سوریایێ‌ گولچیسك ل دهۆكێ‌ چاندینه‌ و دیاركر ژی كو ئه‌و ب كوژمێ‌ دو هزار دولاران بۆ ئاكنجیێن هه‌رێمێ‌ و ب چوار هزار دولاران بۆ ئاكنجیێن وه‌لاتێن بیانی گولچیسكان دچینن.
د.شاكر دیاركر ژی كو ل كریارێن چاندنا نیڤ تایبه‌تمه‌ند ئه‌وێن ژ مه‌ها ئیلونا 2012ێ‌ هاتینه‌ ئه‌نجامدان و تا نوكه‌ حكوومه‌تا هه‌رێما كوردستانێ‌ هاریكاریا 61 نه‌خۆشان كریه‌ ب كوژمێ‌ 1600 دولاران بۆ هه‌ر نه‌خۆشه‌كی و گۆتژی: ژوان ب تنێ‌ 14 وه‌لاتیێن هه‌رێما كوردستانێ‌ كوردستانێ‌ بوون و یێن دی یێن پارێزگه‌هێن دیترێن عیراقێ‌ بوون.
د.شاكر سه‌لیم بالندی ل دۆر كریارێن شكاندنا به‌ركان ژی دیاركر كو ل سالا 2012 ل سنورێ‌ پارێزگه‌ها دهۆكێ‌ 819 نه‌خۆشان مفا ژ شكاندنا به‌ركان دیتیه‌ و گولچیسكێن 11939 نه‌خۆشا ل سنورێ‌ پارێزگه‌ها دهۆكێ‌ هاتینه‌ شووشتن كو ئه‌ڤه‌ژی ژماره‌كا مه‌زنه‌ و وه‌لاتیان گه‌له‌ك مفا ژ خزمه‌تێن ئامیرێن به‌رك شكاندنێ‌ دیتینه‌.