ئه‌ڤرۆ نوشدارێن ئه‌مریكی بۆ جارا ئێكێ دێ نشته‌رگه‌ریه‌كێ ل دهۆكێ ئه‌نجام ده‌ن
هاتیه بلاڤکرن روژا دوو شه‌مبێ, 11 ئادار 2013 - 5:19pm
شانده‌كێ ئه‌مریكی كو پێكهاتیبوو ژ 17 نوشدار و كارمه‌ندان گه‌هشته پارێزگه‌ها دهۆكێ و بڕیارا چه‌ندین نشته‌رگه‌ریان ل نه‌خۆشخانێن دهۆكێ ئه‌نجام بده‌ن، كو ئێك ژوان بۆ جارا ئێكێ یه دهێته ئه‌نجامدان.
د پرێس كونفرانسه‌كی دا، رێڤه‌به‌رێ گشتیێ ساخله‌میا پارێزگه‌ها دهۆكێ د.نزار عسمه‌ت ته‌یب دیاركر كو تیمێ نوشدارێن ئه‌مریكی ژ گه‌له‌ك تایبه‌تمه‌ندیان پێكهاتیه و دێ چه‌ندین كارێن نشته‌رگه‌ری و راهێنانان بۆ نوشدارێن دهۆكێ كه‌ن و دێ سمیناره‌كا تایبه‌ت ل دۆر نووترین داهێنانێن نشته‌رگه‌ریێ دێ گێرن ل گه‌ل چه‌ند بزاڤێن دی و گۆت: ئه‌ڤ بزاڤه سالانه نه و هاریكاریا مه دكه‌ن كو تشته‌كێ نوو ل دهۆكێ ژی په‌یدابكه‌ین.
پروفیسور د.غازی زێباری كو سه‌رپه‌رشتیا تیمێ ئه‌مریكی دكه‌ت دیاركر كو مه‌ره‌م ژ هاتنا وان بۆ كوردستانێ پێراگه‌هاندنا زانستێ نوو یێ نوشداریێ یه بۆ نوشدارێن دهۆكێ و دیسا چاره‌سه‌ركرنا نه‌خۆشێن كورد بكه‌ن و گۆت: شاندێ نوشدارێن ئه‌مریكی پێكهاتیه ژ نوشدارێن تایبه‌تمه‌ند یێن( ته‌نگاڤیان، ڤه‌ژاندنا دلی، ده‌ماران، ده‌ڤ و دفنێ و چاندنا گولچیسكان و ساخله‌میا جڤاكی) و ب هه‌ڤكاری ل گه‌ل نوشدارێن دهۆكێ و رێڤه‌به‌ریا گشتی یا ساخله‌میا پارێزگه‌ها دهۆكێ دێ گه‌له‌ك كارێن باش هێنه ئه‌نجامدان و ل رۆژا 16/3/2013 ئه‌و دێ ل هه‌له‌بچه ئاماده‌بن بۆ دیتنا ئێش و ئازارێن خه‌لكێ وێ.
ژلایێ خوه‌ڤه د.جون توماس وه‌ك ئێك ژ تایبه‌تمه‌ندێن نشته‌رگه‌ریا گشتی دیاركر كو بڕیاره ئه‌ڤرۆ نشته‌رگه‌ریه‌كا بچووككرنا مه‌عیده‌ی بۆ جارا ئێكێ ل دهۆكێ ئه‌نجام بده‌ت و گۆت: ئه‌و نشته‌رگه‌ری بۆ ژنه‌كا دژیێ بیست و سێ سالیێ دایه كو سه‌نگێ وێ ژ 125 كیلویان ده‌ربازبوویه و گه‌له‌ك نه‌خوشیا خوه ژێ دبینیت.
د.جون دیاركر ژی كو 70% ژ مه‌عیدێ وێ ژنێ دێ هێته بچووككرن و پشتی دو سالان هه‌كه پێگیریێ ب رێنمایێ، نوشداران بكه‌ت دێ پتری 50 كیلۆیان ژ سه‌نگێ وێ كێم بن و گۆت: ئه‌ڤ نشته‌رگه‌ری یه چ سه‌رباركان ل دووڤ خوه ناهێلیت و دێ چه‌ند نوشدارێن دهۆكێ ژی ل سه‌ر ڤی جورێ نشته‌رگه‌ریێ هێنه راهێنان.
ئه‌ڤ مالپه‌ره فرێکه
