ئسكوتله‌ندا دێ‌ پشته‌ڤانیێ‌ ل پێشڤه‌برنا سیسته‌مێ‌ ساخله‌میا دهۆكێ‌ كه‌ت

شانده‌كێ‌ وه‌لاتێ‌ ئسكوتله‌ندا ب سه‌رۆكاتیا رێڤه‌به‌رێ‌ گشتیێ‌ ساخله‌میا باژێرێ‌ ده‌ندی دوهی گه‌هشته‌ دهۆكێ‌ و بڕیاره‌ كار د پێشڤه‌برنا سیسته‌مێ‌ ساخله‌میێ‌ و خواندنا بلند ل دهۆكێ‌ بكه‌ت.
د. نزار عسمه‌ت، رێڤه‌به‌رێ‌ گشتی یا ساخله‌میا پارێزگه‌ها دهوكێ‌ دیاركر كو  شانده‌كێ‌  ئسكوتله‌ندی  ژ زانكۆیا ده‌ندی هاتینه‌ بو  خورتكرنا په‌یوه‌ندیان و هاریكاریا وان بكه‌ن بۆ پێشڤه‌برنا سیسته‌مێ‌ ساخله‌میێ‌ و چاره‌سه‌ركرنا ئاسته‌نگێن دكه‌ڤنه‌ درێكا ساخله‌میێ‌ دا و گۆت: ئه‌ڤ شانده‌ دێ‌ بو چوار رۆژان ل دهۆكێ‌ بن و دێ‌ سه‌ره‌دانا چه‌ند نه‌خوشخانه‌ و زانكۆیێ‌ كه‌ن و چه‌ندین روونشتنێن جودا دێ‌ هێنه‌كرن كو ئه‌م بشێین هنده‌ك پرا دروست بكه‌ین دناڤبه‌را مه‌ و وان دا,
د. عارف یونس، راگرێ‌ فاكۆلتیا زانستێن پزیشكی دیاركر كو ئه‌و دێ‌ هه‌ول ده‌ن هه‌ر سێ‌ قۆتابیێن سه‌ركه‌فتی یێن ئێكێ‌ فرێكه‌نه‌ ئسكوتله‌ندا بۆ خواندنێ‌ و گۆت: باشترین تشت ئه‌وه‌ كو نوشدار به‌رده‌وام بهێته‌ نووكرن و یا گرنگتر ئه‌وه‌ كو كاره‌كی ئه‌م بكه‌ین بو په‌رستارا چ ئه‌وێن ل نه‌خوشخانا كاردكه‌ین یان ل قوناغێن خواندنێ‌ دا و هه‌روه‌سان چێكرنا ئاستێ‌ ستاندارێن په‌رستارێن مه‌یه‌، چونكو چه‌ند نوشدارێن مه‌ چه‌ند دزیره‌ك بن و په‌رستارێن مه‌ د باش نه‌بن، من باوه‌ره‌ ئه‌و خزمه‌تێن دهێنه‌ پێشكێشكرن د ئاستێ‌ پێدڤی دا نابن.
د. ستیڤن دیاركر كو ئه‌و دێ‌ ته‌ماشه‌ی وان به‌رناما كه‌ن یێن بو سیسته‌مێ‌ ساخله‌میێ‌ هاتینه‌ دانان و گۆت: باشترین رێك ئه‌وه‌ كو سیسته‌مه‌ك بهێته‌ دانان بگونجیت دگه‌ل وی وه‌لاتی، ئه‌م یێن هاتین كو بزانین پێدڤی ب چ هه‌نه‌، داكو كاره‌كی بۆ وان بكه‌ین و بشێن سیسته‌می باشتر لێ‌ بكه‌ین.