15 هزار ئامیره بۆ نه‌خۆشێن شه‌كرێ دێ هێنه دان
هاتیه بلاڤکرن روژا پێنج شه‌مبێ, 11 نيسان 2013 - 8:56am
ل سه‌نته‌رێ نه‌خۆشیا شه‌كرێ ئه‌ڤرۆ سێ هزار ئامیرێن پشكنینا نه‌خۆشیا شه‌كرێ دێ ل سه‌ر تووشبۆیێن نه‌خۆشیێ هێنه به‌لاڤكرن و بڕیاره د ماوێ سێ هه‌یڤێن بهێت دا 15 هزار ئامیره بۆ نه‌خۆشان بهێنه دان.
د.یونس ئه‌سوه‌د، به‌رپرسێ سه‌نته‌رێ نه‌خۆشیا شه‌كرێ بۆ رۆژناما ئه‌ڤرۆ دیاركر كو ژبه‌ر زێده داخوازیا نه‌خۆشان ل سه‌ر ئامیرێن پشكنینا نه‌خۆشیا شه‌كرێ و ژبه‌ركو ئه‌و نه‌خۆش گه‌له‌ك پێدڤی ب پشكنینا دبن بۆ زانینا رێژا شه‌كرێ رۆژانه، له‌ورا دێ رابن ب به‌لاڤكرنا سێ هزار ئامیران وه‌كو قۆناعا ئێكێ و ب هه‌روه بۆ نه‌خۆشان دێ هێنه دان.
د.یونس ئه‌سوه‌د دیاركر ژی ل به‌ری دابه‌شكرنا ئامیران ئه‌و دێ چه‌ند سمینارێن جودا جودا ده‌نه نه‌خۆشان ل دۆر چاوانیا ب كارئینانا ئامیرێن نوو و گۆت: ئه‌ڤ ئامیره ب تنێ بۆ وان نه‌خۆشانه یێن به‌ری نوكه ل سه‌نته‌ری هاتینه توماركرن و هه‌ر نه‌خۆشه‌ك ل ده‌مێ ل دووڤ ژڤانێ خوه سه‌ره‌دانا سه‌نته‌ری دكه‌ت دێ ئامیره‌كێ پشكنینێ ژی وه‌رگریت.
هه‌روه‌سا دیاركر كو د سێ هه‌یڤێن بهێت دا ئه‌ڤ پرۆسه دێ یا به‌رده‌وام بیت و گۆت: ل دهۆكێ دۆرێن 10 هزار نه‌خۆشێن شه‌كرێ هه‌نه و 15 هزار ئامیره دێ گه‌هنه مه، له‌ورا ئه‌و نه‌خۆشێن به‌ری نوكه ژی ئامیره مه دابنێ دێ شێن دوباره وه‌رگرنه‌ڤه.
ئه‌ڤ مالپه‌ره فرێکه
