60 خۆبه‌خشێن كه‌مپا دۆمیز پشكداری خوله‌كا ساخله‌میێ دبن
هاتیه بلاڤکرن روژا پێنج شه‌مبێ, 16 گولان 2013 - 11:24am
ب مه‌ره‌ما پتر خزمه‌تكرنا ئاواره‌یێن كه‌مپا دومیز، رێڤه‌به‌رییا كاروبارێن خۆپاراستنا ساخله‌میێ خۆله‌كا 8 رۆژی بۆ ژماره‌یه‌كا خوبه‌خشا ژ كچ و كورێن كه‌مپێ لدور پرۆگرامێن ساخله‌میێ ڤه‌كر.
د. نه‌سرین حه‌مه‌ره‌ش به‌رپرسا هوبا پشتگیریا ساخله‌میێ راگه‌هاند، هه‌ر ژ دروستكرنا كه‌مپا ناڤبری ئه‌م كه‌فتینه د كاریدا ژ پێخه‌مه‌ت به‌لاڤكرنا ره‌وشه‌نبیریا ساخله‌میێ و بابه‌تێ خۆپاراستنێ، زێده‌باری پێشكێشكرنا خزمه‌تێن چاره‌سه‌ریێ و گۆت: دڤێ خۆلێ دا 60 كچ و كور پشكدارن وه‌كو خۆبه‌خش دناڤ كه‌مپێ دا دێ كاركه‌ن ژ پێخه‌مه‌ت گه‌هاندنا نامه‌یا ساخله‌میێ.
ناڤهاتی زێده‌تر گۆت: پارسال ژی ژماره‌یه‌كا گه‌نجێن كه‌مپێ مه به‌رهه‌ڤكربوون وه‌كو خۆبه‌خش دگه‌ل مه كاربكه‌ن كو تا نها ژی هنده‌ك به‌رده‌وامن، ئاماژه‌كر ژ به‌ر به‌رفره‌هبوونا كه‌مپێ مه‌ژی ژماره‌یا خۆبه‌خشێن خۆ زێده‌كر كو لدووڤ حه‌زا خۆ هاتینه خزمه‌تا خه‌لكێ خۆ یێ كه‌مپێ بكه‌ن، دیاركر ژی رۆژانه سمینار و بابه‌تێن خۆلێ ژ ئالیێ نوشدارێن رێڤه‌به‌رییا مه‌ڤه دهێنه پێشكێشكرن.
دهێته زانین دگه‌ل دروستكرنا كه‌مپا ئاواره‌یێن كوردێن سووریێ سازیێن حوكمه‌تا هه‌رێمێ ل پارێزگه‌ها دهۆكێ و رێكخراوێن بیانی و ناڤخۆیی خزمه‌تێن به‌رچاڤ ئاراسته‌كرینه و تا نهاژی د به‌رده‌وامن.
ئه‌ڤ مالپه‌ره فرێکه
